އައު ޓެލެކޮމް އޮޕަރޭޓަރަކަށް ލައިސަންސް ދިނުމަށް ނިންމައިފި
އިންޓަރނެޓްގެ އަގުހެޔޮ ކުރުމަކީ މި ސަރުކާރުގެ ވައުދެއް
ފިނޭންސް މިނިސްޓަރ އިބްރާހިމް އަމީރު
އައު ޓެލެކޮމް އޮޕަރޭޓަރަކަށް ލައިސަންސް ދިނުމަށް ހުޅުވާލުމަށް ރާވާފައިވާ ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
ހޯމަ ދުވަހު ރައްޔިތުންގެ މަޖިލީހަށް 2021 ވަނަ އަހަރުގެ ދައުލަތުގެ ބަޖެޓު ހުށައަޅުއްވަމުން މިނިސްޓަރ ވިދާޅުވެފައިވަނީ ފްރިކުއެންސީ ސްޕެކްޓްރަމް ޗާޖެއް ނެގުމުގެ އިތުރުން ޓެލެކޮމް އޮޕަރޭޓަރަކަށް ލައިސަންސް ދިނުމަށް ހުޅުވާލުމަށް ރޭވިފައިވާ ކަމަށެވެ.
އިންޓަރނެޓްގެ އަގުހެޔޮ ކުރުމަކީ މި ސަރުކާރުގެ ވައުދެކެވެ. އިންޓަރނެޓް އަގު ހެޔޮ ނުކުރާ މައްސަލައިގައި ސަރުކާރަށާއި ރާއްޖޭގައި މުއާސަލާތީ ހިދުމަތްދޭ ދެ ކުންފުނިތަކަށް ގިނަ ބަޔަކު އަންނަނީ ފާޑުކިޔަމުންނެވެ.
ދުނިޔޭގެ އެންމެ އިންޓަރނެޓް އަގުހެޔޮ ލިސްޓުގައި ރާއްޖެ އުޅެނީ 116 ވަނަ އަށެވެ. ރާއްޖޭގެ އިންޓަރނެޓްގެ އަގަކީ ދެކުނު އޭޝިޔާގެ ގައުމުތަކުގެ އިތުރުން ދުނިޔޭގެ އިގްތިސާދު ކުރިއަރާފައިވާ ސިންގަޕޫރް، ހޮންގކޮންގ، އޮސްޓްރޭލިޔާ ފަދަ ގައުމުތަކަށްވުރެ ބޮޑު އަދަދެކެވެ. ދުނިޔޭގެ އެންމެ އިންޓަރނެޓް އަގުހެޔޮ ގައުމުތަކުގެ ތެރޭގައި އަވަށްޓެރި އިންޑިއާ ހިމެނޭ އެވެ.
