މަސައްކަތް ނުފެށި ހުރި ހުރިހާ ރަށެއްގައި 2021 ވަނަ އަހަރު ފެނާ ނަރުދަމާގެ އަމަލީ މަސައްކަތް ފެށޭނެ!
ފެނާއި ނަރުދަމާގެ ޚިދުމަތަކީ ކޮންމެ ރައްޔިތަކަށްވެސް ލިބިދޭންޖެހޭ އަސާސީ ޚައްޤެއް
ފެނާ ނަރުދަމާގެ ނިޒާމަކީ ރައްޔިތުންނަށް ބޭނުންވާ އަސާސީ ހައްޤެއް ކަމަށް މިނިސްޓަރ ވިދާޅުވި
މިހާތަނަށް މަސައްކަތް ނުފެށި ހުރި ހުރިހާ ރަށެއްގައި 2021 ވަނަ އަހަރު ފެނާ ނަރުދަމާގެ އަމަލީ މަސައްކަތް ފެށޭނެ ކަމަށް ފިނޭންސް މިނިސްޓަރ އިބްރާޙިމް އަމީރު ވިދާޅުވެއްޖެ އެވެ.
2021 ވަނަ އަހަރަށް ލަފާ ކުރާ ދައުލަތުގެ ބަޖެޓް މަޖިލީހުގައި އިއްވަވަމުން ހޯމަ ދުވަހުގެ ޖަލްސާގައި މިނިސްޓަރ ވިދާޅުވީ، ފެނާއި ނަރުދަމާގެ ޚިދުމަތަކީ ކޮންމެ ރައްޔިތަކަށްވެސް ލިބިދޭންޖެހޭ އަސާސީ ޚައްޤެއް ކަމަށެވެ. އަދި ސަރުކާރުން ވަޢުދު ވެފައިވާ ގޮތަށް، 2023 ގެ ނިޔަލަށް ރާއްޖޭގެ ހުރިހާ ރަށެއްގައިވެސް ސާފު ބޯފެނާއި ނަރުދަމާ ނިޒާމު ގާއިމު ކުރުމަކީ އަމާޒެއް ކަމަށް މިނިސްޓަރ ވިދާޅުވި އެވެ.
އަންނަ އަހަރުގެ ބަޖެޓުގައި 143 ރަށެއްގެ ފެނާއި ނަރުދަމާ ނިޒާމުގެ މަސައްކަތްތައް ކުރިއަށް ގެންދިއުމަށްޓަކައި 998.5 މިލިއަން ރުފިޔާ ހިމަނާފައިވާނެކަން ފާހަގަ ކުރައްވައި މިނިސްޓަރ ވިދާޅުވީ، މިއީ ވޭތުވެދިޔާ އެއްވެސް ސަރުކާރަކުން އަތޮޅުތަކުގައި ހިންގާފައި ނުވާވަރުގެ ބޮޑު މަޝްރޫޢެއް ކަމަށެވެ.
މިނިސްޓަރ ވިދާޅުވީ، މިހާތަނަށް މަސައްކަތް ނުފެށި ހުރި ހުރިހާ ރަށެއްގައި 2021 ވަނަ އަހަރު ފެނާއި ނަރުދަމާގެ އަމަލީ މަސައްކަތް ފެށުމަކީވެސް އަންނަ އަހަރަށް ކަނޑައަޅާފައިވާ މުހިއްމު އަމާޒެއް ކަަމަށެވެ.
ރަށް ރަށުގެ ބަނދަރު މަރާމާތު ކުރުމުގެ މަސައްކަތާއި، ފެނާއި ނަރުދަމާގެ މަސައްކަތް ނުފެށި އޮތުމުން އެކަމުގެ ކަންބޮޑުވުން އެކި ރަށްރަށުން ފާޅު ކޮށްފައިވާއިރު، މި ސަރުކާރުން ގެންދަނީ ކޮވިޑް ގެ މި ޙާލަތުގައިވެސް އަތޮޅު ތެރޭގައި ހިންގާ ތަރައްޤީގެ މަޝްރޫއުތައް ހުއްޓުމެއް ނެތި ކުރަމުންނެވެ.
އޭގެ އިތުރުން، ޤާނޫނު ނަންބަރު 8/2020 (ފެނާއި ނަރުދަމާގެ ޤާނޫނު) ގެ ދަށުން ތައްޔާރުކުރަންޖެހޭ ފެނާއި ނަރުދަމާގެ ޤައުމީ ސްޓްރެޓީޖިކް ޕްލޭންވެސް މި ސަރުކާރުން ވަނީ އިއުލާނު ކޮށްފައެވެ.
ފެނާއި ނަރުދަމާގެ ޤައުމީ ސްޓްރެޓީޖިކް ޕްލޭނުގައި ހިމެނޭ މައިގަނޑު 6 (ހައެއް) ސިޔާސަތު ބިނާވަނީ ރައްކާތެރި ފެނާއި ނަރުދަމާގެ ޚިދުމަތް އެންމެނަށް ކަށަވަރުކޮށްދިނުމަށާއި، ތިމާވެއްޓާ ރައްޓެހި، ޚަރަދު ކުޑަ ފެނާއި ނަރުދަމާގެ ނިޒާމު ތަރައްޤީކުރުމަށާއި، ފެނާއި ނަރުދަމާގެ ދާއިރާއިން މީހުން ތަމްރީނު ކުރުމަށާއި، މިދާއިރާއަށް މީހުންގެ ހޭލުންތެރިކަން އިތުރުކުރުމަށާއި، ފެނުގެ ވަސީލަތްތައް ރައްކާތެރިކޮށް ހިމާޔަތް ކުރުމަށާއި އަދި ފެންބޮޑުވުމުގެ ކާރިސާތަކަށް ވިލުންވެރި މުޖުތަމަޢެއް ބިނާކުރުމުގެ މައްޗަށެވެ.
