އަންނަ އަހަރަށް ލަފާ ކުރާ ބަޖެޓުގައި ޒުވާނުންގެ ތަރައްގީއަށް ގިނަ ކަންތައްތަކެއް!
9 ނޮވެމްބަރު 2020 | ހޯމަ 04:31ކޮވިޑް-19 އިން ދަސްވި ފިލާވަޅަކީ، ޒުވާނުންނަށް ތަފާތު އެކިއެކި ހުނަރުތައް ދަސްކޮށްދިނުމުގެ މުހިއްމުކަން
ފާއިތުވެ ދިޔަ އަހަރު ޔޫތް މިނިސްޓްރީން ވަނީ ޒުވާނުންނަށް އަމާޒުކޮށްގެން ގިނަ ހަރަކާތްތައް ހިންގާފައިވާ
އަންނަ އަހަރަށް ލަފާ ކުރާ ސައުލަތުގެ ބަޖެޓުގައި ޒުވާނުންގެ ތަރައްގީއަށް ގިނަ ކަންތައްތައް ހިމަނާފައިވާނެ ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
ހޯމަ ދުވަހުގެ ޖަލްސާގައި 2021 ވަނަ އަހަރަށް ލަފާ ކުރާ ދައުލަތުގެ ބަޖެޓު ފިނޭންސް މިނިސްޓަރ އިބްރާހިމް އަމީރު ވަނީ ހުށައަޅުއްވާފައެވެ.
އެގޮތުން އަމީރު ވިދާޅުވީ މި ސަރުކާރުގެ އަމާޒަކީ ޒުވާނުންގެ ގާބިލިއްޔަތު އިތުރުކޮށް، އެމީހުންގެ ހުނަރާއި ގާބިލިއްޔަތު އުފެއްދުންތެރި ދާއިރާތަކަށް ލިބޭނެ މަގު ފަހިކޮށްދިނުން ކަމަށެވެ. އަދި އިގުތިސާދު އާރާސްތުކޮށް ވިލުންވެރި އިގުތިސާދެއް ބިނާކުރުމުގައި ޒުވާނުންގެ ދައުރު ފުޅާކުރުމަށް ވެސް މަސައްކަތް ކުރައްވާނެ ކަމަށް ވިދާޅުވި އެވެ.
ކޮވިޑް-19 ގެ ޙާލަތުން ދަސްވި ފިލާވަޅަކީ، ޒުވާނުންނަށް ތަފާތު އެކިއެކި ހުނަރުތައް ދަސްކޮށްދިނުމުގެ މުހިއްމުކަން ކަމަށާއި ރެޒީލިއަންޓް ވަރކްފޯސްއެއް ބިނާކުރުމުގެ މުހިއްމުކަން އެނގިގެންދިޔަ ކަމަށް އަމީރު ވިފާޅުވި އެވެ. އޭނާ ވިދާޅުވީ ޒުވާނުންގެ ހުނަރު ތަރައްގީކުރުމަށް ހުރި ފުރުސަތުތައް ފަހިކޮށްދިނުމުގެ ގޮތުން، 2021 ވަނަ އަހަރުގެ ބަޖެޓުގައި ވާނީ ގިނަ މަޝްރޫއުތަކަކާއި ޕްރޮގްރާމް ތަކެއް ރޭވިފައި ކަމަށެވެ.
ފާއިތުވެ ދިޔަ އަހަރު ޔޫތް މިނިސްޓްރީން ޒުވާނުންނަށް އަމާޒުކޮށްގެން ހިންގާފައިވާ މުހިއްމު ކަންތައްތަކަށް ބަލާލާއިރު ޒުވާނުންގެ ގައުމީ މަޖިލީހުގެ ބައިވެރިވުމާއި ޒުވާނުންގެ ހޮޅުއަށި ޕްރޮގްރާމް، ނަފްސާނީ ދުޅަހެޔޮކަން އިތުރު ކުރުމުގެ ޕްރޮގްރާމް، ލައިފް ސްކިލްސް ޕްރޮގްރާމްތަކާއި ވަޒީފާގެ މާހައުލަށް ޒުވާނުން އަހުލުވެރި ކުރުވުމުގެ ޕްރޮގްރާމްގެ އިތުރުން ޒުވާން ލީޑަރުން އުފެއްދުމަށް ކުރިޔަށް ގެންދިޔަ ކޭމްޕްތައް ހިމެނެ އެވެ.
