ކޮވިޑް-19 ފަދަ ބަލިމަޑު ކަމުގައި އެކި ފަރާތްތަކާއި ގުޅިގެން މަސައްކަތް ކުރުމަކީ މުހިއްމު ކަމެއް: މިނިސްޓަރ ޝާހިދު
8 ނޮވެމްބަރު 2020 | އާދީއްތަ 12:44މިނިސްޓަރގެ ވާހަކަފުޅުގައި ވަނީ ދިވެހިރާއްޖެއާ ޔޫ.އެން.ޑީ.ޕީގެ ގުޅުމުގެ މައްޗަށް އަލިއަޅުވާލައްވާފަ
ޔޫއެންޑީޕީއިން ރާއްޖެއަށް ޕީޕީއީ ހަދިޔާކުރުމަށް ބޭއްވި ރަސްމިއްޔާތުގައި މިނިސްޓަރ ޝާހިދު ވާހަކަފުޅު ދައްކަވަނީ
ޤުދުރަތީ ގޮތުން ދިމާވާ ކާރިސާތަކާއި، ކޮވިޑް-19 ފަދަ ބަލިމަޑުކަމުގައި އެކި ފަރާތްތަކާ ގުޅިގެން މަސައްކަތް ކުރުމަކީ މުހިއްމު ކަމެއް ކަމުގައި މިނިސްޓަރ އޮފް ފޮރިން އެފެއަރޒް އަބްދުﷲ ޝާހިދު ވިދާޅުވެއްޖެ އެވެ.
މިނިސްޓަރ ޝާހިދު މިހެން ވިދާޅުވީ ކޮވިޑް-19 އިން ރައްކާތެރި ވުމުގެ ގޮތުން ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާމް (ޔޫއެންޑީޕީ) އިން ރާއްޖެއަށް ޕަރސަނަލް ޕްރޮޓެކްޓިވް އިކުއިޕްމެންޓްސް (ޕީޕީއީ) ހަދިޔާ ކުރުމަށް މިނިސްޓްރީ އޮފް ފޮރިން އެފެއަރޒްގައި އާދިއްތަ ދުވަހު ބޭއްވި ރަސްމިއްޔާތެއްގައި ވާހަކަފުޅު ދައްކަވަމުންނެވެ.
ދިވެހިރާއްޖެއާ ޔޫއެންޑީޕީގެ ގުޅުމުގެ މައްޗަށް އަލިއަޅުވާލައްވާ ވާހަކަފުޅު ދައްކަވަމުން މިނިސްޓަރ ވިދާޅުވީ މިފަދަ ދަނޑިވަޅުތަކުގައި އެ ފަރާތުން ވެދެއްވާ އެހީތައް އަބަދުވެސް އުފަލާއެކު ގަބޫލު ކުރައްވާކަމަށެވެ.
މީގެ އިތުރުން މިނިސްޓަރ އަބްދުﷲ ޝާހިދު ވަނީ ޔޫ.އެން.ޑީ.ޕީ އިން ދިވެހިރާއްޖޭގެ ތަރައްޤީއަށް އެކި ގޮތް ގޮތުން އަބަދުވެސް އެހީތެރިވަމުން ދާކަމަށް ވިދާޅުވެ ޔޫ.އެން.ޑީ.ޕީ އިން ވެދެއްވާ އެހީތެރިކަމަށް ޝުކުރު އަދާކުރައްވާފަ އެވެ.
މި ރަސްމިއްޔާތުގައި ޔޫއެންޑީޕީ އިން ޕީޕީއީގެ ގޮތުގައި ހަދިޔާކުރި ތަކެތީގެ ތެރޭގައި ހަޒްމަތް ސޫޓާއި، މާސްކް، ގްލަވްސް އަދި ގޮގްލްސް ހިމެނޭއިރު މީގެ އިތުރުން ވެސް ޔޫއެންޑީޕީއިން ވަނީ ޓިއޯޗިއު އިންޓަނޭޝަނަލް ފެޑެރޭޝަންގެ އެހީތެރިކަމާއެކު ހޯދާފައިވާ 1 މިލިއަން ނަން-ސަރޖިކަލް މާސްކްވެސް ހަދިޔާކޮށްފަ އެވެ.
