15 މީހުންނަށް އެއްފަހަރާ އެއްތަނެއްގައި އުޅެވޭ ގޮތަށް ހުއްދަ ދީފި

އެއްފަހަރާ 15 މީހުންނަށް އެއްތަނެއްގައި ތިބެވޭ ގޮތަށް ހުއްދަ ދީ މާލެ ސަރަހައްދުގައި އަޅާފައިވާ ފިޔަވަޅުތަކަށް ލުއިދީފިއެވެ.

އެޗްޕީއޭއިން އާންމުކޮށްފައިވާ އެންގުމުގައި ވަނީ މާލެ، ހުޅުމާލެ، ވިލިމާލޭގައި އެއްވެސް ވަގުތެއްގައި، އެއްފަހަރާ 15 މީހުންނަށް ވުރެ ގިނަ މީހުން މަގުމަތީގައި އެއްވެއުޅުން ހުއްޓާލުމަށް ވަނީ އަންގާފައެވެ.

މީގެ އިތުރުން ގްރޭޓަރ މާލެ ސަރަހައްދުން ރާއްޖޭގެ އެހެނިހެން ރަށްރަށަށް ދަތުރުކުރާ ފަރާތްތައް ކަރަންޓީނުވުމާއި، ރާއްޖޭގެ އެތެރޭގައި ވައިގެ މަގުންނާއި ކަނޑުމަގުން ދަތުރުކުރާ ފަރާތްތައް ހެލްތު ޕްރޮޓެކްޝަން އެޖެންސީގެ ގައިޑްލައިނާ އެއްގޮތަށް ޢަމަލުކުރުމާއި، ހުރިހާ ވަގުތެއްގައި ވެސް މާސްކު އެޅުމަށް ވަނީ އަންގާފައެވެ.

މީގެ ކުރިން މާލޭގައި ކާފިއު ހިންގި ގަޑިއަށް ވެސް ވަނީ ބަދަލުތަކެއް ގެނެސްފައެވެ. އެގޮތުން ކުރިން ރޭގަނޑު 11 އިން ފަތިހު 4:00 އަށް މަގުމަތީގައި އުޅުމާއި އެއްގަމު އުޅަނދު ދުއްވުން މަނާކުރި ކުރުމަށް ބަދަލު ގެނެސް ރޭގަނޑު 12:00 އިން ފަތިހު 4:00 އަށް ކާފިއު ހިންގުމަށް ވަނީ ނިންމާފައެވެ.

އެޗްޕީއޭއިން ދީފައިވާ އިތުރު ލުއިތަކުގެ ތެރޭގައި އެޗްޕީއޭގެ ގައިޑްލައިންތަކާ އެއްގޮތަށް، ކޮންޓެކްޓް ސްޕޯޓްސް އާއި އައުޓްޑޯ ކުޅިވަރުތައް ކުޅުމަށް ހުޅުވާލުމާއި، ގައިޑްލައިންތަކާ އެއްގޮތަށް، ވިޔަފާރިކުރާ ތަންތަނާއި ކާބޯތަކެތީގެ ޚިދުމަތްދޭ ތަންތަން، އެކަމާ ގުޅޭ އިދާރާތަކުން ކަނޑައަޅާ ގޮތެއްގެ މަތިން ހުޅުވުމަށް ވަނީ ހުއްދަ ދީފައެވެ.

އޭގެ އިތުރުން 15 މީހުންނަށް ވުރެ ގިނަ ނުވާގޮތަށް ކުޅިވަރުތައް ބަލަން ދިޔުމުގެ ހުއްދައާއި، ހެލްތު ޕްރޮޓެކްޝަން އެޖެންސީގެ ގައިޑްލައިންތަކާ އެއްގޮތަށް، ޕާކުތަކާއި މައިޒާންތަކާއި ދާރުލް އާސާރުތަކާއު އާންމުން އެއްވެ އުޅޭ ތަންތަން ހުޅުވާލުމާއި، ގޭގައި މަސައްކަތްކުރާ ގޮތަށް އޮފީސްތަކުން ހަމަޖައްސާފައިވާ ހައި ރިސްކު ފަރާތްތައް ރައްކައުތެރިކަމުގެ ފިޔަވަޅުތަކާއެކު އޮފީސްތަކަށް ނިކުމެ މަސައްކަތްކުރުމަށް ވަނީ ހުއްދަ ދީފައެވެ.