ރާއްޖޭގައި ގަވާއިދާ ހިލާފަށް އުޅެމުންދާ ބިދޭސީން ފޮނުވާލުމަށް އިކޮނޮމިކް މިނިސްޓްރީ ކުރަމުންދާ މަސައްކަތްތަކުގެ ތެރެއިން މިހާތަނަށް 15،000 އަށް ވުރެ ގިނަ ބިދޭސީން އަނބުރާ ގައުމަށް ފޮނުވާ ލެވިފައިވާ ކަމަށް އިކޮނޮމިކް މިނިސްޓްރީން ބުނެފިއެވެ.

ރާއްޖެޓީވީގެ "ފަލަ ސުރުހީ" ޕްރޮގްރާމްގައި ވާހަކަ ދައްކަވަމުން އިކޮނޮމިކް މިނިސްޓްރީގެ ޑެޕިއުޓީ މިނިސްޓަރު މަރިޔަމް ނާޒިމާ ވިދާޅުވީ، ވޮލަންޓަރީ ރީޕެޓްރިއަޝަންގެ ދަށުން ކޮންމެ ހަފްތާއަކު ވެސް ގައުމަށް ދާން ބޭނުންވާ ބިދޭސީން ފޮނުވުމުގެ މަސައްކަތް ވަރަށް ހަލުވިކަމާއި އެކު ކުރިޔަށްދާ ކަމަށެވެ.

ނަމަވެސް އެކަމުގެ ގޮންޖެހުންތައް އެބަހުރި ކަމަށް ވިދާޅުވިއެވެ. އޭގެ ތެރޭގައި ދާން ބޭނުންވާ މީހުންގެ ތެރެއިން ގިނަ މީހުންގެ ލިޔެކިޔުންތައް ނެތުމަކީ ދިމާވާ އެންމެ ބޮޑު ގޮންޖެހުން ގޮތުގައި އޭނާ ފާހަގަކުރެއްވިއެވެ.

މި ޕްރޮގްރާމްގައި ބައިވެރިވާ ބިދޭސީންގެ ތެރެއިން ގިނަ ބަޔަކީ ބަންގްލަދޭޝް މީހުންކަން ފާހަގަކުރައްވަމުން ނާޒިމާ ވިދާޅުވީ، އެ މީހުން ފުރުވާލުމުގައި ފޮރިން މިނިސްޓްރީގެ އިތުރުން ރާއްޖޭގައި ހުންނަ ބަންގަލަދޭޝްގެ ހައި ކޮމިޝަނުން އެހީތެރިކަން ލިބެމުންދާ ކަމަށެވެ.

ގައުމަށް ދާން ބޭނުންވާ ބިދޭސިންނަށް ހާއްސަކޮށްގެން އިކޮނޮމިކް މިނިސްޓްރީން ހިންގާ ޕްރޮގްރާމް ކުރިޔަށް ދަނީ ދެ ގޮތަށެވެ. އެއީ އަމިއްލައަށް ބޭނުންވެގެން ދާން ވެގެން ރަޖިސްޓްރީވާ ބިދޭސީންގެ އިތުރުން ވަޒީފާދޭ ފަރާތްތަކުން އެމީހުން ރަޖިސްޓްރީ ކޮށްގެން ރެގިއުލަރައިޒޭޝަން ސިސްޓަމް ތެރޭގައި ފެއްތުމަށް ގައުމަށް އަނބުރާ ފޮނުވާލެވޭ މީހުންނެވެ.

ނާޒިމާ ވިދާޅުވީ، ރެގިއުލަރައިޒޭޝަން ޕްރޮގްރާމްގެ ތެރޭގައި 5000 އެއްހާ މީހުން ސިސްޓަމްގައި ރަޖިސްޓްރީ ކުރެވިފައިވާ ކަމަށާއި، ސިސްޓަމް ތެރެއަށް ވެއްދުމަށް ވަގުތު ނަގާ ކަމަށެވެ. އަދި ވިދާޅުވީ، ކޮވިޑް-19 އާ ގުޅިގެން އަޅާފައިވާ ފިޔަވަޅުތަކާއި ގުޅިގެން ކޮންމެވެސް ވަރަކަށް މަޑުޖެހުނު ކަމަށާއި، އެކަމަކު އޮންލައިންކޮށް ބައެއް ކަންތައްތައް ހިންގުނު ކަމަށެވެ.

ބިދޭސީންގެ މައްސަލަ ހައްލު ނުކުރެވި އޮތީ އެންމެ ރަނގަޅަށް އެކަން މޮނިޓަރ ނުކުރެވޭތީ ކަމަށާއި، އަލަށް އެކުލަވާލެވުނު ގަވާއިދުގެ ދަށުން ބިދޭސީ މީހާގެ އިތުރުން އެ މީހާ ލައްވާ ގަވާއިދާ ހިލާފަށް މަސައްކަތްކުރުވާ ފަރާތްތަކާއި ދެމެދު ފިޔަވަޅު އެޅޭކަން އޭނާ ފާހަގަކުރެއްވިއެވެ.