ބަރިސްތާ އަށް ކޯޓުއަމުރެއްގެ ދަށުން ފުލުހުން ވަތް، ބަޔަކު ހައްޔަރެއް ނުކުރޭ: ބަރިސްތާ

ބަރިސްތާ ކޮފީ ޝޮޕަށް ފުލުހުން ވަދެ އެތާ ތެރެއިން ބަޔަކު ހައްޔަރު ކުރި ކަމަށް ބައެއް މީޑިއާތަކުގައި ރިޕޯޓްކޮށްފައި ވީނަމަވެސް ބަރިސްތާއިން އެކަން ދޮގުކޮށްފިއެވެ.

ބަރިސްތާގެ ޑައިރެކްޓާ އޮފް ބިޒްނަސް ޑިވެލޮޕްމަންޓް ވަދީފް ހަސަން ސައީދު ރާއްޖެ އެމްވީއަށް މައުލޫމާތު ދެއްވަމުން ވިދާޅުވީ ހުކުރު ދުވަހުގެ ރޭގެ ވަގުތެއްގައި ފުލުހުން ބަރިސްތާއަށް ވަނީ ފުލުހުން ހިންގަމުންދިޔަ އޮޕަރޭޝަނަކާ ގުޅިގެން ބަޔަކު ހޯދުމަށް ކަމަށެވެ. އަދި ފުލުހުން ވަދެފައި ވަނީ ކޯޓު އަމުރެއްގެ ދަށުން ކަމަށާއި އެތާތެރޭގައި ފުލުހުން މިނިޓެއްހާއިރު ހަރަކާތްތެރިވުމަށް ފަހު ތަން ދޫކޮށް ގޮސްފައިވާ ކަމަށެވެ. ބަރިސްތާ ތެރެއިން އެއްވެސް މީހަކު ހައްޔަރު ނުކުރާ ކަމަށް ވަދީފް ބުންޏެވެ.

ފުލުހުންގެ ތަރުޖަމާނު އަހުމަދު ޝިފާން ރާއްޖެ އެމްވީއަށް ވިދާޅުވީ ހުކުރު ދުވަހުގެ ރޭ ފުލުހުން ހިންގި އޮޕަރޭޝަންގައި ފުލުހުންގެ ބެލުމުގެ ދަށަށް ގެންދިޔަ މީހުންނާ ސުވާލުކޮށް ދޫކޮށްލާފައިވާ ކަމަށެވެ. އެހެން ނަމެވެސް އެއްވެސް މީހަކު ހައްޔަރު ކޮށްފައި ނުވާނެ ކަމަށެވެ.

ބައެއް މީހުން ހައްޔަރު ކޮށްފައިވާ ކަމަށް ބައެއް މީޑިއާތަކުގައި ގެނެސްދީފައިވާ ޚަބަރަކީ ސައްހަ މައުލޫމާތުތަކެއް ނޫން ކަމަށް ވެސް ފުލުހުން ބުންޏެވެ.

ހުކުރުދުވަހުގެ ރޭ ހާއްސަ އޮޕަރޭޝަނެއް ހިންގާފައިވާ ކަމަށް ބުނެފައިވާއިރު އެ އޮޕަރޭޝަނާ ބެހޭ އެއްވެސް މައުލޫމާތެއް ދީފައެއް ނުވެއެވެ. އަދި ބަލާ ފާސްކޮށް ސުވާލު ކޮށްފައި ވަނީ ކިތައް މީހުންނާ ކަމެއް ވެސް ބުނެފައެއް ނުވެއެވެ.

އިންޑިއާގެ މަޝްހޫރު ފުޑް ޗެއިން، "ބަރިސްތާ" މާލޭގައި ހުޅުވާފައި ވަނީ މިދިޔަ މާޗް މަހުގެ ތެރޭގައެވެ. ބަރިސްތާ ހުންނަނީ އެމްޕީއެލް ކައިރިން ބޮޑުތަކުރުފާނު މަގުގަ އެވެ. ބަރިސްތާ އަކީ އިންޑިއާ އަށް އުފަން، އޭޝިއާގެ ގިނަ ގައުމުތަކެއްގައި މަގުބޫލު ބްރޭންޑެކެވެ.