ވެމްކޯ އާއި ސިޓީ ކައުންސިލް ގުޅިގެން މާލެތެރެ ސާފު ކުރުމުގެ ޕްރޮގްރާމެއް ފަށައިފި

ވޭސްޓް މެނޭޖްމެންޓް ކޯޕަރޭޝަން ލިމިޓެޑް (ވެމްކޯ) އާއި މާލެ ސިޓީ ކައުންސިލް ގުޅިގެން މާލެތެރެ ސާފު ކުރުމުގެ ޕްރޮގްރާމެއް ފަށައިފިއެވެ.

ހޮނިހިރު ދުވަހު ފެށި މި ޕްރޮގްރާމު ފައްޓަވައި ދެއްވީ ސިޓީ ކައުންސިލްގެ މޭޔަރ ޝިފާ މުހައްމަދުއެވެ. މި ޕްރޮގްރާމު ފައްޓަވައި ދެއްވާ ރާއްޖެ އެމްވީ އަށް މައުލޫމާތު ދެއްވަމުން ޝިފާ ވިދާޅުވީ ހޮނިހިރު ދުވަހު ފެށި މި ޕްރޮގްރާމަކީ ހަމައެކަނި މާލެއަށް އަމާޒުކޮށްގެން ފައްޓާފައިވާ ޕްރޮގްރާމެއް ކަމަށާއި ނަމަވެސް މިހަފްތާ ތެރޭގައި ވިލިނގިލި އަދި ހުޅުމާލޭ ގައިވެސް މި ޕްރޮގްރާމް ފަށާނެ ކަމަށެވެ.

މި ޕްރޮގްރާމުގެ މަގްސަދަކީ މިވަގުތު މާލޭގެ މަގުތަކަށް ކުނިތައް އަޅާ ގޮނޑު ކޮށްފައިވާ ސަރަހައްދުތައް އެއްކޮށް ނަގާ ސާފުކޮށްލުމުގެ ނިޔަތުގައި ފަށާފައިވާ ޕްރޮގްރާމެއް ކަމަށް ޝިފާ ވިދާޅުވިއެވެ. އަދި މި ޕްރޮގްރާމް މި ހިންގަނީ ނޮވެމްބަރ 11 ވަނަ ދުވަހަށް ތައްޔާރު ވުމުގެ ގޮތުން ކަމަަށްވެސް މޭޔަރ ވިދާޅުވިއެވެ.

މި ޕްރޮގްރާމު ކުރިއަށް ގެންދަން ހަމަޖެހިފައިވަނީ ވެމްކޯގެ 40 ވަރަކަށް މުއައްޒަފުންނާއި މާލެ ސިޓީ ކައުންސިލްގެ ހުރިހާ މުއައްޒަފުން 7 ގުރޫޕަކަށް ބަހާލައިގެންނެވެ. އަދި މި ޕްރޮގްރާމް ކުރިޔަށް ދާނީ ހަފްތާއެއްގެ ތެރޭގައި މުޅި މާލެ އެއްކޮށް ސާފު ކުރުމުގެ އަމާޒުގައި ކަމަށްވެސް ޝިފާ ވިދާޅުވިއެވެ.

އެގޮތުން މަސައްކަތު ގަޑިތަށް ބަހާލެވިފައި ވަނީ މުވައްޒަފުންނަށް ބުރަ ނުވާނޭހެން ހެނދުނު 9 އަކުން ފެށިގެން މެންދުރު ނަމާދުގެ ވަގުތައް ހުއްޓާލުމަށް ފަހު ދެން ފައްޓާނީ ހަވީރު ކަމަށް ޝިފާ ވިދާޅުވިއެވެ. މީގެ އިތުރުން މޭޔަރ ޝިފާ ވަނީ މުވައްޒަފުން ކުރާ މަސައްކަތައް ތައުރީފު ކުރައްވާ އެކަމުގެ އަގުވަޒަން ކޮށްފައިއެވެ.