އިންޑިއަން އޯޝަން އައިލެންޑްސް ގޭމްސް (އައިއޯއައިޖީ) 2023 ވަނަ އަހަރު ރާއްޖޭގައި ބޭއްވޭނެ ކަމަށާއި، މި ހާލަތުގައި އައިއޯއައިޖޭ ބޭއްވޭނެ ގޮތްތަކެއް ހޯދޭނެ ކަމަށް ގަބޫލުކުރައްވާ ކަމަށް މޯލްޑިވްސް އޮލިމްޕިކް ކޮމިޓީ (އެމްއޯސީ) ގެ ޖެނެރަލް ސެކްރެޓްރީ އަޙްމަދު މަރުޒޫގް (މަރޭ) ވިދާޅުވެއްޖެއެވެ.

މީގެ ކުރިން ރާއްޖެޓީވީގެ "ކުޅިވަރު ފައިލް" ޕްރޮގްރާމުގައި ވާހަކަދައްކަވަމުން ކުޅިވަރާ ބެހޭ ވަޒީރު އަޙްމަދު މަޙްލޫފް ވަނީ ގޭމްސް ބޭއްވުމަށް ކުރަންޖެހޭ ހުރިހާ މަސައްކަތެއް ފަށަން ޕްލޭން ކުރެވިފައި އޮތް އަހަރަކީ މި އަހަރު ކަމަށާއި، އެހެން ނަމަވެސް މުޅި ދުނިޔެއަށް ކުރިމަތިވި ކޮވިޑް-19 ގެ ހާލަތާއެކު ގޭމްސްއަށް އަމާޒުކުރި ބޮޑެތި މަސައްކަތް ނުފެށި ހުރި ކަމަށް ވިދާޅުވެފައެވެ. އެހެންކަމުން ކޮވިޑް-19 ގެ ހާލަތު ރަނގަޅުވެ، އަންނަ އަހަރު އެ މަސައްކަތް ފަށައިގެން އައިއޯއައިޖީ ރާއްޖޭގެ ބޭއްވޭނެ ކަމަށް މިހާރު ގަބޫލުނުކުރައްވާ ކަމަށާއި، 2023 ވަނަ އަހަރުގެ އައިއޯއައިޖީ 2025 ވަނަ އަހަރަށް ފަސްކުރުމަށް، ނޫނީ ކުރިއަށް އޮތް ގޭމްސް މިފަހަރު ދޫކޮށްލާފައި، ދެން އަންނަ ގޭމްސް ބޭއްވުމަށް އެދޭނެ ކަމަށް ވަޒީރު ވިދާޅުވިއެވެ.

އެކަމަކު މިދިޔަ ހަފުތާގައި ރާއްޖެޓީވީގެ "ކުޅިވަރު ފައިލް" ޕްރޮގްރާމުގައި ވާހަކަދައްކަވަމުން މަރުޒޫގް ވިދާޅުވީ އައިއޯއައިޖީ ރާއްޖޭގައި ބޭއްވުން އެއީ ކުޅިވަރު އެތުލީޓުންނާއި އެސޯސިއޭޝަންތަކުން ދެކެމުން އަންނަ ހުވަފެނެއް ކަމަށާއި، ގޭމްސް ރާއްޖެގައި ނުބޭއްވިއްޖެނަމަ، ގޭމްސް ބާއްވަން އެހެން ގައުމުތަކުން ތިބީ ފާރަވެރިވެގެން ކަމަށެވެ. އަދި އައިއޯއައިޖީއަށް ރާއްޖެއިން ބިޑުކުރީ އެކަމާ ބެހޭ ގޮތުން ވަރަށް ފުޅާ ދާއިރާއެއްގައި ޓެކްނިކަލް މީހުންނާ މަޝްވަރާ ކުރެވިގެން ކަމަށާއި، މިވަގުތު އެންމެ މުހިންމީ ގޭމްސް ބޭއްވޭނެ ގޮތަކާ މެދު، އެކަމުގެ މާހިރުންނާއެކު ވާހަކަދެއްކުން ކަމަށް ގަބޫލުކުރައްވާ ކަމަށްވެސް ވިދާޅުވިއެވެ.

މަރުޒޫގު އިތުރަށް ވިދާޅުވީ އޭނާއަށް މިހާރުވެސް އައިއޯއައިޖީ ބޭއްވޭނެ ކަމަށް ގަބޫލުކުރާ ކުޅިވަރުގެ މީހުންނާ ދިމާވާ ކަމަށާއި، ގޭމްސް ބާއްވަން އެމީހުންގެ ޚިޔާލުތައްވެސް އެބަހުރި ކަމަށެވެ. އަދި އޭނާ ބޭނުންވަނީ ސަރުކާރުން އެހާ އަވަސް އަރުވާލައިގެން ގޭމްސް ލަސްކުރުމުގެ ވާހަކަ ނުދައްކައި، ކަމާ ބެހޭ މާހިރުންނާއެކު ގޭމްސް ބޭއްވޭނެ މަގެއް ހޯދުމަށް ކަމަށްވެސް ވިދާޅުވިއެވެ.

އަދި ވިދާޅުވީ އައިއޯއައިޖީއަށް ރާއްޖެއިން ބިޑުކުރިއިރު، ބިޑުކުރީ އެންމެ "ވޯސްޓް ސިޗުއޭޝަން" ގައިވެސް ގޭމްސް ބޭއްވޭނެ ގޮތް ހޯދައިގެން ކަމަށާއި، އެހެންކަމަށް ވާނަމަ މިހާލަތުގައިވެސް ގޭމްސް ބޭއްވޭނެ މަގެއް ހޯދޭނެ ކަމަށެވެ. އަދި މި ފުރުސަތު ނަގާލުމަކީ ކޮށްގެން ވާނެ ކަމެއް ނޫން ކަމަށްވެސް މަރުޒޫގް ވިދާޅުވިއެވެ.

މަރުޒޫގް ވިދާޅުވީ ރާއްޖޭގައި ގޭމްސް ބާއްވަން އޮތް އެންމެ ބޮޑު ދައްޗަކީ ފައިސާގެ ދަތިކަން ކަމަށާއި، ދެން ސަރުކާރުން ދައްކަމުން އަންނަނީ ގޭމްސްތަކާއި ބޮޑެތި މުބާރާތްތައް ފަސްކުރާ ވާހަކަ ކަމަށެވެ. އެކަމަކު ހަގީގަތަކީ ފަސްކުރަމުން އަންނަނީ މިއަހަރާއި އަންނަ އަހަރު ބާއްވަން ނިންމާފައިވާ ގޭމްސްތައް އެކަނިކަން ކަމަށާއި، 2022 ވަނަ އަހަރުގެ ފަހުގައި ބާއްވަން ނިންމާފައިވާ އެއްވެސް މުބާރާތެއް އަދި ފަސްކޮށްފައި ނުވާ ކަމަށްވެސް މަރުޒޫގް ވިދާޅުވިއެވެ.

މަރުޒޫގް މިހެން ވިދާޅުވިއިރު، މިދިޔަ މަހުގެ މެދުތެރޭގައި ކުޅިވަރާ ބެހޭ ވަޒީރު ވަނީ އައިއޯއައިޖީ ބޭއްވުމާ ގުޅޭ ގޮތުން އެމްއޯސީ އާއި ގައުމީ ކުޅިވަރު އެސޯސިއޭޝަންތަކާއެކު މަޝްވަރާކުރައްވާފައެވެ.

ބައިނަލްއަގުވާމީ ކުޅިވަރު މުބާރާތްތައް ރާއްޖޭގައި ބޭއްވުމަކީ މި ސަރުކާރުގެ ރިޔާސީ ވައުދުތަކުގެ ތެރޭގައި ހިމެނޭ ކަމަކަށްވާއިރު، ރާއްޖޭން އައިއޯއައިޖީ ބޭއްވުމުގެ ބިޑް ކާމިޔާބުކުރީ މި ސަރަހައްދުގެ އެންމެ ބޮޑު ޖަޒީރާ ކަމަށްވާ މަޑަގަސްކަރަ އާއި ކޮމޮރޯސްއާ ވާދަކޮށްގެންނެވެ.

އައިއޯއައިޖީއަކީ މިހާތަނަށް ރާއްޖޭގައި ބާއްވަން ފުރުސަތު ލިބުނު ބައިނަލްއަގުވާމީ ފުރަތަމަ ކުޅިވަރު ގޭމްސްއެވެ. ރާއްޖޭގައި ރަސްމީކޮށް ކުޅިވަރު ކުޅެންފެށިތާ 88 ވުރެން ގިނަ އަހަރުވެފައިވާއިރު، އައިއޯއައިޖީގެ ބިޑު ކާމިޔާބުވުމަކީ ދިވެހި ކުޅިވަރަށް ލިބުނު އެންމެ ބޮޑު ޝަރަފަށެވެ.