ލޮނުޒިޔާރަތް ބަގީޗާ ހުޅުވަނީ މި މަހު 11 ގައި
ލަސްވީ ކޮވިޑް-19 ގެ ހާލަތާއި ގުޅިގެން
ލޮނުޒިޔާރަތް ބަގީޗާ، މިއީ މާލެ ސަރަހައްދުން ފެންނާނެ އެންމެ ހިތްގައިމު އެން މަންޒިލް
މާލޭގެ ލޮނުޒިޔާރަތް ކޮޅުގައި ސިޓީ ކައުންސިލުން ހަދާފައިވާ ''ލޮނުޒިޔާރަތް ބަގީޗާ'' މި މަހުގެ 11 ވަނަ ދުވަހު އާންމުންނަށް ހުޅުވާލާން ނިންމައިފިއެވެ.
ސިޓީ ކައުންސިލުން ކުރިން ނިންމާފައި އޮތީ ޖުލައި މަހު ބަގީޗާ ހުޅުވުމަށެވެ. އެކަމަކު އެ މުއްދަތު ފަހަނަ އަޅައި ދިޔައިރުވެސް ''ލޮނުޒިޔާރަތް ބަގީޗާ" އެއް ނުހުޅަވައެވެ. ސިޓީ ކައުންސިލުން ބުނެފައިވާ ގޮތުން ބަގީޗާ ހުޅުވުން ލަސްވަނީ މާލޭގައި ކޮވިޑުގެ ހާލަތު ގޯސްވުމުގެ ސަބަބުންނެވެ. ނަމަވެސް މިހާރު ސިޓީ ކައުންސިލުން ނިންމާފައިވަނީ ޖުމްހޫރީ ދުވަހާ ދިމާކޮށް ބަގީޗާ އާންމުންނަށް ހުޅުވާލުމަށެ އެވެ.
މީގެ ކުރިން ''ރާއްޖެ.އެމްވީ'' އަށް ދެއްވި އިންޓަވިއުއެއްގައި މާލެ ސިޓީގެ މޭޔަރު ޝިފާ މުހައްމަދު ވިދާޅުވެފައިވާ ގޮތުން ބަގީޗާ ހުޅުވުން ލަސްވަނީ، ބަގީޗާ ހުޅުވަން މަސައްކަތް ކުރާ ކޮންމެ ފަހަރަކު ބަޔަކު ހުރަސް އަޅަމުން އަންނާތީ ކަމަށެވެ.
"ލޮނުޒިޔާރަތް ބަގީޗާ" އަކީ ގިނަ އަދަދެއްގެ ގަސްތައް އިންދައިގެން ތަރައްގީ ކޮށްފައިވާ ރާއްޖޭގައި މިވަގުތު ހުރި އެންމެ ބޮޑު ބަގީޗާއެވެ. އަދި ބަގީޗާގެ ހިތްގައިމުކަން އިހުސާސް ކުރެވޭނީ، އެތަނަށް ޒިޔާރަތް ކޮށްލުމުން ކަމަށާއި، އެ ބަގީޗާގައި ތިބޭއިރު، ބޭރުން ދުއްވާ ވެހިކަލްތަކުގެ އަޑުތައް ކޮންޓްރޯލް ކުރުމަށް ސައުންޑް ޕްރޫފް ކުރުމުގެ ގޮތުން ވެސް ބައެއް ކަންކަން ކޮށްފައިވާނެ ކަމަށް ސިޓީ ކައުންސިލުން ބުންޏެވެ.
ލޮނު ޒިޔާރަތްކޮޅުގައި ޕާކެއް ގާއިމު ކުރުމުގެ މަސައްކަތް ފެށީ، މާލެ-ހުޅުމާލެ ބްރިޖްގެ މަސައްކަތް ނިމި، ހުޅުވި ފަހުންނެވެ. ބްރިޖްގެ މަސައްކަތް ކުރިއަށް ދިއައިރު، އެތަނަކީ، ކޮންޓްސްޓްރަކްޝަން ސައިޓެކެވެ. އެތަން ޕާކެއްގެ ގޮތަށް ތަރައްގީ ކުރުމުގެ މަސައްކަތް ފެށީ މިދިއަ އަހަރުން ފެށިގެންނެވެ.
