ހޯރަފުށި އެއަރޕޯޓުގެ މަސައްކަތް އާދިއްތަ ދުވަހަށް ނިންމާލެވޭނެ: އެމްޓީސީސީ

ހއ. ހޯރަފުށީގައި ސަރުކާރުން ތަރައްޤީ ކުރަމުން ގެންދާ އެއަރޕޯޓްގެ އަމަލީ މަސައްކަތްތައް އާދިއްތަ ދުވަހަށް ނިންމާލާނެކަމަށް އެމްޓީސީސީން ބުނެފި އެވެ.

އެގޮތުން ބުދަ ދުވަހު އެމްޓީސީސީން ބުނީ، ހޯރަފުށީ އެއަރޕޯޓުގެ މަޝްރޫޢުގެ މަސައްކަތުގެ 84 އިންސައްތަ މަސައްކަތް މިހާތަނަށް ނިންމާލެވިފައިވާ ކަމަށެވެ. އެގޮތުން އެމްޓީސީސީގެ ސީއީއޯ އާޒިމް ވަނީ ބުދަ ދުވަހު އެއަރޕޯޓުގެ މަސައްކަތް ހިނގާ ސަރަހައްދަށް ވަޑައިގެން އެ މަސައްކަތް ބައްލަވާލައްވާފައެވެ.

އެއަރޕޯޓުގެ ޕެސެންޖަރ ޓަރމިނަލާއި ފަޔަރ ބިލްޑިންގ ގާއިމުކުރުމުގެ މަސައްކަތް ވެސް ހަވާލުކޮށްފައި ވަނީ އެމްޓީސީސީއާއެވެ. އެކަމުގެ އެއްބަސްވުމުގައި މިދިޔަ އޯގަސްޓް މަހު ސޮއި ކޮށްފައިވާއިރު މި މަސައްކަތް ނިންމަން ޓްރާންސްޕޯޓު މިނިސްޓްރީން ވަނީ އެމްޓީސީސީއަށް 80 ދުވަހުގެ މުއްދަތެއް ދީފައެވެ.

ހޯރަފުށީ އެއަރޕޯޓްގެ ރަންވޭއާއި ޓެކްސީވޭ އަދި އޭޕްރަން ތަރައްގީ ކުރުމުގެ މަޝްރޫއުގެ އަގު 198 މިލިއަނަށް އަރާއިރު އެއަރޕޯޓް ޓާމިނަލް އަދި ފަޔަރ ބިލްޑިން ތަރައްގީ ކުރުމަށް 13.8 މިލިއަން ރުފިޔާ ހަރަދު ވާނެ ކަމަށް އެމްޓީސީސީއިން ވަނީ ބުނެފައެވެ.

ހޯރަފުށީ އެއަރޕޯޓް ހަދަނީ ހޯރަފުށީގެ ފަޅުން ބައެއް ހިއްކައިގެންނެވެ. މި އެއަރޕޯޓުގައި ހަދަނީ 1200 މީޓަރު ދިގު، 35 މީޓަރު ފުޅާ ރަންވޭއެކެވެ. މީގެ އިތުރުން ޓެކްސީވޭ އަކާއި، ޓާމިނަލް ކުރިމަތީގެ މަގުތައް ތަރައްގީ ކުރުމާއި 9473 އަކަމީޓަރުގެ ޕާކިން އޭރިއާއަކާއި، 1718 އަކަމީޓަރުގެ ފަޔާ އެކްސެސް މަގެއްގެ އިތުރުން 720 މީޓަރުގެ އެއަރޕޯޓް ސެކިއުރިޓީ އަދި ބީޗް ފެންސްގެ މަސައްކަތް ވެސް ކުރިއަށްދާ ކަމަށް އެމްޓީސީސީން ބުންޏެވެ.

މީގެ އިތުރުން އެއަރޕޯޓަށް ބޭނުންވާނޭ ކަރަންޓް ފޯރުކޮށްދެވޭނެ ނިޒާމެއް ފެނަކައިން ޤާއިމުކޮށް ކަރަންޓްގެ ހިދުމަތް ދޭން ފަށާފައިވަނީވެސް އޮކްޓޯބަރ 29 ވަނަ ދުވަހުއެވެ. އަދި އެއަރޕޯޓަށް ބޭނުންވާ ފެނާއި ނަރުދަމާގެ މަސައްކަތްތައް ވެސް ބާރު ސްޕީޑެއްގައި ކުރިޔަށް ދާކަމަށް ބުނެފައިވެއެވެ.

ހޯރަފުށީ އެއަރޕޯޓް ނޮވެމްބަރު 8 ގައި ނިންމައި 11 ވަނަ ދުވަހު ހުޅުވުމަށްޓަކައި އެމްޓީސީސީއިން ދަނީ 24 ގަޑިއިރުގައި މެދުނުކެނޑި މަސައްކަތް ކުރަމުންނެވެ. 24 ގަޑިއިރު މަސައްކަތް ކުރިއަށް ގެންދާ އިރު މުވައްޒަފުންގެ މަސައްކަތްތައް ރާވާފައި ހުރީ، މަސައްކަތް ބުރަ ނުވާނެހެން ކަމަށް އެމްޓީސީސީއިން ވަނީ ބުނެފައެވެ.