ދިވެހިރާއްޖެއަކީ ކުޑަ ގައުމަކަށް ވިޔަސް ޔުނިވަރސަލް ޕީރިއޮޑިކް ރިވިއު (ޔޫޕީއާރު) އަށް ފުރިހަމައަށް އެއްބާރުލުންދޭނެ ކަމަށް އދ. ގެ ދާއިމީ މިޝަންގެ ޖެނީވާ އޮފީހުގެ ދާއިމީ މަންދޫބު ޑރ. އާސިމް އަހުމަދު ވިދާޅުވެއްޖެއެވެ.
ބުދަ ދުވަހުގެ ރޭ ޔޫޕީއާރު ސެޝަންގައި ވާހަކަ ދައްކަވަމުން އާސިމް ވިދާޅުވީ ޔޫޕީއާރުގައި ގައުމުތަކުން ފާހަގަކުރި ކަންބޮޑުވުންތައް އަޑުއައްސަވާފައިވާ ކަމަށެވެ. އަދި އެކަންބޮޑުވުންތައް ހައްލުކުރުމަށް އެއްބާރުލުން ދެއްވާނެ ކަމަށް ވިދާޅުވިއެވެ. އާސިމް ވިދާޅުވީ މި ސެޝަންގައި ހުރިހާ ކަމަކަށް އަލިއަޅުވާލާ ވާހަކަ ދެއްކުނުކަމުގައި އުއްމީދު ކުރައްވާކަމަށެވެ.
މި ސެޝަންގައި ރާއްޖޭގެ ޑެލިގޭޝަނުން ވަނީ އިންސާނީ ހައްގުތައް ކަށަވަރުކުރުމަށް ކުރެވުނު ކަންތައްތަކާއި ދިމާވާ ގޮންޖެހުންތައް ހިއްސާކޮށްފައެވެ. އަދި ގައުމުތަކުން ދިން ރިކޮމެންޑޭޝަން އިމްޕްލިމެންޓް ކުރުމަށް ޤައުމީ ފެންވަރުގައި މެކޭނިޒަމެއް ތައްޔާރުކުރަމުންދާނެ ކަމަށާއި، އެ މެކޭނިޒަމްގެ ތެރެއިން ރިކޮމެންޑޭޝަން އިމްޕްލިމެންޓް ކުރެވޭވަރާއި، ކުރިއަށްދާ މިންވަރު ބަލަމުންދާނެ ކަމަށެވެ.
