އެމެރިކާގެ ރިޔާސީ އިންތިޚާބުގެ ނަތީޖާ ކޮންމެގޮތަކަށް ނިކުތަސް އިރާނުން އެމެރިކާއާ މެދު ގެންގުޅޭ ސިޔާސަތު ބަދަލެއްނުވާނެ

އެމެރިކާގެ ރިޔާސީ އިންތިޚާބުގެ ނަތީޖާ ކޮންމެ ގޮތަކަށް ނިކުތަސް އިރާނުން އެމެރިކާ އާއި ގުޅޭގޮތުން ގެންގުޅޭ ސިޔާސަތަށް ބަދަލެއް ނާންނާނެކަމަށް އިރާނުގެ ސްޕްރީމް ލީޑަރ އާޔަތުﷲ އަލީ ޚާމަނާއީ ވިދާޅުވެއްޖެ އެވެ.

އިރާނުގެ ދައުލަތުގެ މީޑިޔާއިން ވަގުތުން ދައްކަމުންދިޔަ ކަވަރޭޖެއްގައި ވާހަކަދައްކަވަމުން ޚާމަނާއީ ވިދާޅުވީ އެމެރިކާ އާ މެދު އިރާނުން ގެންގުޅޭ ސިޔާސަތަކީ ވަރަށް ސާފު އަދި ބަދަލުނުވާނެ ސިޔާސަތެއްކަމަށެވެ. ވަކި މީހަކު އައުމަކުން އެސިޔާސަތަށް ބަދަލެއް ނާންނާނެކަމަށާއި ކޮންމެ މީހަކު ވެރިކަމަށް އަޔަސް އަދި ފޭބިއަސް އެކަމާއި ގުޅުމެއް ނެތްކަމަށް ޚާމަނާއީ ވިދާޅުވިއެވެ.

ޚާމަނާއީ މިމޭރުމުން ވާހަކަދެއްކެވީ 1979 ވަނަ އަހަރު ތެހެރާންގައި ހުރި އެމެރިކާ އެމްބަސީ ހިފައިގެން ހިނގި ހާދިސާ ފާހަގަކުރުމަށް ބޭއްވި ރަސްމިއްޔާތުގައެވެ. ޚާމަނާއީ ވަނީ ކިޔަވާކުދިންތަކެއް އެމެރިކާ އެމްބަސީއަށް ވަދެ އެތަނުގެ 52 ސްޓާފުން ހޮސްޓޭޖުންގެ ގޮތުގައި 444 ދުވަސްވަންދެން ގެންގުޅުނު ހާދިސާއަށް އިޝާރާތްކުރައްވާ އެއީ ރަނގަޅު އަމަލެއްގެ ގޮތުގައި ސިފަކުރައްވާ ވާހަކަ ދައްކަވާފައެވެ. އެހާދިސާ އަށް ފަހު އެމެރިކާ އާއި އިރާނާ ދެމެދު ޑިޕްލޮމެޓިކް ގުޅުމެއްނޯވެ އެވެ.

އެމެރިކާގެ ރިޔާސީ އިންތިޚާބުގައި ވާދަކުރައްވާ ޑިމޮކްރަޓިކް ކެންޑިޑޭޓް ޖޯ ބައިޑަން ވަނީ އިރާނާއެކު ހަދާފައިވާ ނިޔުކްލިޔަރ އެއްބަސްވުން އަލުން ހަދާނެ ކަމަށް ވިދާޅުވެފައެވެ.