އެމެރިކާ ރިޔާސީ އިންތިޚާބުގެ ކަވަރޭޖް ވަގުތުން ބެލޭނެ ކަމަށް މީޑިއާނެޓުން ބުނެފިއެވެ.

މީޑިއާނެޓުން ބުނީ ކޮންމެ ހަތަރަކުން އެއް އަހަރު އޮންނަ އެމެރިކާގެ ރިޔާސީ އިންތިޚާބުގެ ޚާއްސަ ލައިވް ކަވަރޭޖް މީޑިއާނެޓްގެ ސީއެންއެންގެ އެޗްޑީ ޗެނަލްއިން ފެންނާނެ ކަމަށެވެ. މި ލައިވް ކަވަރޭޖް ފެށިގެން ދާނީ ރާއްޖޭގެ ގަޑިން ބުދަ ދުވަހުގެ ފަތިހު 2:00 ގައެވެ.

އެމެރިކާގައި މިކަމުގެ ނިޒާމު ހަމަޖެހިފައި އޮންނަ ގޮތުން އިންތިޚާބުތަކުގެ އެންމެ ގިނަ ވޯޓުލިބޭ މީހުން ކޮންގްރެސް އާއި، މޭޔަރުންނާއި ގަވަރުނަރުންނަށް އަދި ޤާނޫނު ހަދާ މަޖިލީހުގެ މެމްބަރުންނާއި ސްޓޭޓްތަކުގެ އޮފިޝަލުންނަށް އައްޔަނުކުރެވުނަސް އެންމެ މަތީވެރިޔާ ހޮވާނީ އެގޮތަކަށް ނޫނެވެ. އެކަމުގެ ބާރު ލިބިދީފައި ވަނީ އިލެކްޓޯރަލް ކޮލެޖްގައި ތިބޭ މީހުންނަށެވެ. އެމެރިކާގެ ރައްޔިތުން އެމީހުން ބޭނުންވާ ކެންޑިޑޭޓަށް ރިޔާސީ އިންތިޚާބުގައި ވޯޓުދިން ކަމުގައިވިޔަސް ކެންޑިޑޭޓް ހޮވަން ވޯޓުދޭނީ އެ ސްޓޭޓަކުން ކަނޑައަޅާފައި ތިބޭ އިލެކްޓާސްއެވެ.

ކަމާބެހޭ މާހިރުން ގަބާލުކުރާ ގޮތުގައި 2016 ވަނަ އަހަރުގެ އިންތިޚާބުގައި ވޯޓުލާން ނިކުތް 138 މިލިއަން މީހުންނަށް ވުރެ ގިނަ މީހުން މި ފަހަރުގެ އިންތިޚާބުގައި ވޯޓުލާނެއެވެ. އެ ފަހަރުގެ އިންތިޚާބުގައި ކުރިން ވޯޓުލުމުގެ މަރުހަލާގެ ދަށުން ވޯޓުލާފައި ވަނީ 47 މިލިއަން މީހުންނެވެ.