ދައުލަތުގެ ބަޖެޓުން އިންޑިއާ ސިފައިންނަށް ޚަރަދެއް ނުކުރަން: ޑިފެންސް މިނިސްޓަރ
3 ނޮވެމްބަރު 2020 | އަންގާރަ 17:34ގައުމީ ދިފާއީ ބާރުން ކުރާ ޚަރަދުތަކުގެ ތަފްސީލް މަޖިލީހަށް އިނގޭނެކަމަށް ވިދާޅުވި
ޑިފެންސް މިނިސްޓަރ މާރިޔާ އަހުމަދު ދީދީ
ދައުލަތުގެ ބަޖެޓުން އިންޑިއާ ސިފައިންނަށް ޚަރަދު ނުކުރާ ކަމަށް ޑިފެންސް މިނިސްޓަރ މާރިޔާ އަހުމަދު ދީދީ ވިދާޅުވެއްޖެއެވެ.
އަންގާރަ ދުވަހުގެ ރޭ ރާއްޖެޓީވީގެ "ފަލަ ސުރުޚީ" ޕްރޮގްރާމުގައި ވާހަކަ ދައްކަވަމުން މިނިސްޓަރ ވިދާޅުވީ ބަޖެޓް ފާސްކުރީ ރައްޔިތުންގެ މަޖިލީހުން ކަމަށާއި ގައުމީ ދިފާއީ ބާރުން ޚަރަދުކުރާ ކޮންމެ ފައިސާ ފޮއްޗެއް ރައްޔިތުންގެ މަޖިލީހަށް އިނގޭނެ ކަމަށެވެ. އަދި އިދިކޮޅުން ދައްކާ ވާހަކަތަކަކީ ރައްޔިތުން ބިރުގަންނަވައިގެން މުޅި ރާއްޖެ ފިތުނަކުރަން ދައްކާ ވާހަކަތައް ކަމަށެވެ.
ދިވެހިރާއްޖޭގެ ޤާނޫނު އަސާސީ އިސްލާހުކުރިއިރު އެ ޚާއްސަ މަޖިލީހުގައި އެ ކަމަނާ އިންނެވި ކަމަށާއި އެއިރު އުފައްދާފައިވާ 241 ކޮމިޓީގައި ހުރިހާ ޕާޓީއެއްގެ މެންބަރުން ވެސް ހިމެނިފައިވާނެ ކަމަށެވެ. އަދި އެ ކޮމިޓީން ކުރާ ހުރިހާ ސުވާލުތަކަށް ޖަވާބު ދެއްވަމުންދާ ކަމަށް މިނިސްޓަރ ވަނީ ވިދާޅުވެފައެވެ.
މިނިސްޓަރ ވިދާޅުވީ އެހެން ގައުމުތަކުގެ ދާޚިލީ ކަންކަމުގެ ތެރެއަށް ވަންނަން ބޭނުން ނުވާ ކަމަށާއި ދިވެހިރާއްޖެއަކީ ހުރިހާ ގައުމަކާއި ވެސް ރަހުމަތްތެރި އެކުގައި މަސައްކަތްކުރާ ބައެއް ކަމަށެވެ.
ދިވެހިރާއްޖޭގެ ދުޝްމަން ގައުމުތަކެއް ނުހުންނާނެ ކަމަށާއި އެހެން ދެ ގައުމުތަކުން ހިންގާ ހަނގުރާމައިގެ ތެރެއަށް ދިވެހިރާއްޖެ ވަންނަން ރާއްޖޭގެ ރައްޔިތުން ވެސް ބޭނުން ނުވާ ކަމަށެވެ.
އިދިކޮޅުން ގައުމާއި ރައްޔިތުންނާއި ދޭތެރޭ ވިސްނާވަޑައިގެންނެވުމަށާއި ރައްޔިތުންނަށް ހެޔޮއެދޭ ކަމަށް ހެދި ރާއްޖެ ފިތުނައިގެ ތެރެއަށް ނުގެންދިއުމަށް ވަނީ އެދިވަޑައިގެންފައެވެ.
