ޝިރުމީނާ ރަހީނު ކުރި މައްސަލާގައި މީހަކު ހައްޔަރުކޮށްފި
3 ނޮވެމްބަރު 2020 | އަންގާރަ 10:59ހައްޔަރުކޮށްފައިވަނީ 31 އަހަރުގެ ދިވެހި ފިރިހެނެއް
ރ. ކިނޮޅަސް، ލަގްޒަރީ، ޝިރުމީނާ އަބޫބަކުރު (33އ) ފުލުހުން ދަނި މައްސަލަ އިތުރަށް ތަހުގީގު ކުރަމުން
ގެއްލިގެން ހޯދަން އިއުލާނުކުރި ރ. ކިނޮޅަސް، ލަގްޒަރީ، ޝިރުމީނާ އަބޫބަކުރު (33އ)، ރަހީނުކޮށް، އޭނާއާ މެދު އަނިޔާވެރި އަމަލުތަކެއް ހިންގާފައިވާ މައްސަލައިގެ ތުހުމަތުގައި މީހަކު ހައްޔަރުކޮށްފިއެވެ.
ފުލުހުންގެ މީޑިއާ އޮފިޝަލް "ރާއްޖެއެމްވީ" އަށް މައުލޫމާތު ދެމުން ވިދާޅުވީ، ޝިރުމީނާ ރަހީނުކުރި މައްސަލައިގައި 31 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށެވެ. އަދި އޭނާ ހައްޔަރުކޮށްފައިވަނީ އަންގާރަ ދުވަހު ކޯޓު އަމުރެއްގެ ދަށުން ކަމަށް ވެސް ފުލުހުންގެ މީޑިއާ އޮފިޝަލް ވިދާޅުވިއެވެ. މި މައްސަލައިގެ އިތުރު ތަފްސީލެއް ފުލުހުން ހާމަކޮށްފައެއް ނުވެއެވެ.
ފުލުހުން ބުނެފައި ވަނީ، ގެއްލިގެން ހޯދަމުން ދަނިކޮށް ގެއަށް އައި ޝިރުމީނާ، ބަޔަކު ވެގެން ރަހީނުކޮށް އޭނައާ މެދު އަނިޔާވެރި އަމަލުތަކެއް ހިންގައިފައިވާ ކަމަށެވެ. އަދި ބްލެކްމެއިލް ކޮށްގެން ފައިސާ އަތުލައިވާ ކަމަށް ބެލެވިފައިވާތީ އެ މައްސަލަ އިތުރަށް ތަހުގީގުކުރަމުން އަންނަ ކަމަށް ފުލުހުން ބުނެފައިވެއެވެ. މިހާރު ޝިރުމީނާއަށް ފަރުވާދެމުން އަންނަނީ ހޮސްޕިޓަލްގައި އެޑްމިޓްކޮށްގެންނެވެ.
ޝިރުމީނާ ގެއްލިގެން ކުރި އިއުލާނުގައި ފުލުހުން ބުނެފައި ވަނީ މިދިޔަ އޮކްޓޯބަރ މަހުގެ 31 ވަނަ ދުވަހުގެ 13:30 އިން ފެށިގެން ވީނުވީއެއް ނޭނގި ގެއްލިގެން އާއިލާގެ ފަރާތުން ފުލުހުންނަށް އެ މައްސަލަ ރިޕޯޓްކޮށްފައި ވަނީ ހަމަ އެ ދުވަހުގެ ރޭ 22:45 ގައި ކަމަށެވެ. އަދި އޭނާ ފެނިއްޖެކަން އިއުލާންކުރަމުން ފުލުހުން ބުނެފައި ވަނީ، އޭނާ ދިރިއުޅޭ ގެއަށް ހޯމަ ދުވަހުގެ ހެނދުނުގެ ވަގުތެއްގައި އައިސްފައިވާ ކަމަށް ޝިރުމީނާގެ އާއިލާއިން މައުލޫމާތު ދީފައިވާ ކަމަށެވެ.
ޝިރުމީނާގެ އާއިލާގެ މެމްބަރަކާ ހަވާލާދީ ބައެއް މީޑިއާތަކުގައި ރިޕޯޓުކޮށްފައިވާ ގޮތުގައި، އޭނާއަށް ބިރުދައްކާ 25,000ރ. އާއި 20000ރ. އާ ދޭތެރޭގެ އަދަދެއް ވަނީ އަތުލާފައެވެ. އަދި ފައިސާ ނުދީފިނަމަ މަރާލާނެ ކަމުގެ އިންޒާރު ދީފައިވާ ކަމަށް އައިލާއިން ބުނެފައިވެއެވެ.
