މިއަދަކީ ކުދި ގައުމުތަކަށް ކުރިމަތިވެފައިވާ ނުރައްކާތަކާއި، ދަތިތައް މަތިން ހަނދާން ކުރަންޖެހޭ ދުވަހެއް: ޝާހިދު

މިއަދަކީ ކުދި ގައުމުތަކަށް ކުރިމަތިވެފައިވާ ނުރައްކާތަކާއި، ދަތިތައް މަތިން ހަނދާން ކުރަންޖެހޭ ދުވަހެއް ކަމަށް ފޮރިން އެފެއަރޒް މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.

މިނިސްޓަރ ޝާހިދު މިހެން ވިދާޅުވީ ނަސްރުގެ ދުވަހުގެ މުނާސަބަތުގައި އަންގާރަ ދުވަހު ކުރެއްވި ޓްވީޓެއްގައެވެ. ޝާހިދު ވިދާޅުވީ މި މައްސަލައަކީ ދިވެހި ރާއްޖެއިން އދ. ގައި ވެސް ފާހަގަކޮށްފައިވާ މުހިންމުކަމެއް ކަމަށާއި މިނިސްޓަރގެ މަސައްކަތް ކުރިއަށް ގެންދަނީ ދަތިތަކުން އަވަހަށް އަރައިގަތުމަށް ބޭނުންވާ މަސައްކަތްތައް ހަރުދަނާކޮށް، ބައިނަލްއަޤްވާމީ މުޖުތަމަޢުއާއިއެކު ދާއިމީ ގުޅުންތަކެއް ގާއިމްކުރުމަށް ކަމަށެވެ. އަދި މިއީ 21 ވަނަ ގަރުނުގެ ނުރައްކާތަކުން އަރައިގަތުމަށް ބޭނުންވާ އެންމެ މުހިންމު ތަޅުދަނޑި ކަމަށް ޝާހިދު ވިދާޅުވިއެވެ.

ހަމައެހެންމެ ނޮވެމްބަރު 03 ގެ އުދުވާނީ ހަމަލާ ދިވެހި ޤައުމަށް ކުރިމަތިވި ވަގުތު، އަވައްޓެރި އިންޑިޔާއިން ވެދިން މަދަދާއި އެހީތެރިކަމުގެ ހަނދާންތައް ދިވެހިން އަބަދުވެސް އާކުރާނެ ކަމަށާއި އިންޑިޔާއަކީ އިތުބާރުއޮތް ހަޤީޤީ އެކުވެރިއެއް ކަމަށެވެ. އަދި އެކަމަށްޓަކައި އިންޑިޔާއަށް ޝުކުރު އަދާކޮށްފައިވެއެވެ.

މީގެ އިތުރުން ނަސްރުގެ ދުވަހު ހަނދާން އާކުރަމުން މިދަނީ ދިވެހި ޤައުމަށްޓަކައި ޤުރުބާންވެ، ޝަހީދު ވެފައިވާ ދިވެހި ސިފައިންނާއި، ދިވެހި ދަރީންގެ ހަނދާންތަށް ކަމަށް ވިދާޅުވިއެވެ. އަދި މިނިވަންކަމާއި، ޤައުމުގެ އިސްތިޤްލާލަށްޓަކައި ހަނގުރާމަކުރި ހިތްވަރުގަދަ ފަހުލަވާނުންގެ ޝަރަފުވެރި ޒިކުރާތަށް އާކޮށް ނޮވެމްބަރު 3 ގެ ބަތަލުންނަށް ޝުކުރާއި ތަހުނިޔާ އަރިސްކުރައްވާފައިވެއެވެ.