ނަސްރުގެ ދުވަހުގެ ހަނދާންތައް އައުކުރަންވީ ދެން އެފަދަ ދުވަހެއް މެދުވެރިނުވުމަށް އުއްމީދު ކުރަމުން: އެމްއާރްއެމް
ނޮވެމްބަރ 3 ގައި ރާއްޖެއަށް ކުރިމަތިވި ބަޣާވާތަކީ ދިވެހީންގެ މަދުބަޔަކާއި، ސްރީލަންކާގެ ޓެރަރިސްޓް ޖަމާޢަތަކާ އެކުވެގެން ހިންގި ބަޣާވާތެއް
ނޮވެމްބަރު 3 ގެ ހަމަލާއަށް ފަހު ރައީސް މައުމޫން ގައުމާ މުހާތަބުކުރައްވާ ވާހަކަ ދައްކަވަނީ
ނަސްރުގެ ދުވަހުގެ ހަނދާން އާކުރަން މިޖެހެނީ، ދިވެހިންނަށް ދެން އެފަދަ ދުވަހެއް މެދުވެރި ނުވުމުގެ މަތިވެރި އުއްމީދު އާކުރަމުން ކަމަށް މޯލްޑިވްސް ރިފޯމް މޫވްމެންޓް (އެމްއާރްއެމް) އިން ބުނެފިއެވެ.
ނަސްރުގެ ދުވަހުގެ ތަހުނިޔާ ދިވެހިންނަށް އަރިސްކުރަމުން އެމްއާރްއެމްއިން އަންގާރަ ދުވަހު ކުރި ޓްވީޓެއްގައި ބުނީ 1988 ވަނަ އަހަރުގެ ނޮވެމްބަރ 3 ގައި ރާއްޖެއަށް ކުރިމަތިވި ބަޣާވާތަކީ ދިވެހީންގެ މަދުބަޔަކާއި، ސްރީލަންކާގެ ޓެރަރިސްޓް ޖަމާޢަތަކާ އެކުވެގެން ހިންގި ބަޣާވާތެއް ކަމަށާއި އެ ދުވަހުގެ ހަމަލާއަކީ ދިވެހި ތާރީޚުގައި މިހާތަނަށް ފާހަގަކުރެވޭ އެންމެ ބާރުގަދަ އެންމެ ބިރުވެރި އަދި އެންމެ ނުރައްކާތެރި ޙަމަލާ ކަމަށެވެ.
އެ ދުވަހު 18 ވަރަކަށް ގަޑިއިރުވަންދެން ރާއްޖޭގެ ވެރިރަށް މާލޭގެ މައްޗަށް އަތްގަދަކޮށްލައިގެން ތިބީ ޤައުމުގެ އަދާވާތްތެރި ދުޝްމަނުން ކަމަށާއި އެ މީހުން ހަނގުރާމަ ކުރަމުން ގެންދިޔައީ މުޅި ރާއްޖެ އެ މީހުންގެ އަތްމައްޗަށް ގެންދިއުމަށް ކަމަށް ބުނެފައިވެއެވެ.
އެ ދުވަހު ގިނައިރުތަކެއް ވަންދެން ދިވެހިރާއްޖޭގެ ސިފައިން ބާޣީންނާއި ހަގުރާމަކުރަމުން ގެންދިޔައިރު ދެއްކި ހިތްވަރު ފާހަގަކުރައްވާ ދުޝްމިނުންގެ ބަޑީގެ ވަޒަންތަކުން ޝަހީދުވި ދިވެހި ސިފައިންގެ 8 މީހަކާއި އެ ހަމަލާތަކުގައި ޒަޚަމްވި މީހުންގެ ޒިކުރާ އާކޮށްފައިވެއެވެ. އަދި ދިވެހި ސިފައިން އެ ދުވަހު ދެމިތިބީ ޤައުމީ ވާޖިބު އަދާކުރުންމަތީ ތެދުވެރިކަމާއި އަމާނާތްތެރިކަމާއެކުގައި ކަމަށް ބުނެފައިވެއެވެ. އޭގެ އިތުރުން އެ ދުވަހު ޝަހީދުވި 19 ދިވެހިންނަށް ދުއާ ދަންނަވާ ކަމަށް އެމްއާރްއެމްގެ ބަޔާނުގައިވެއެވެ.
ހަމައެހެންމެ، ނޮވެމްބަރ 3 ގެ ޢުދުވާނީ ޙަމަލާއާއި ގުޅިގެން ދުނިޔޭގެ އެތައް ޤައުމަތަކެއް އޮތީ ދިވެހި ޤައުމާއި ރައްޔިތުން ހިމާޔަތްކޮށްދިނުމަށް ތައްޔާރަށް ކަމަށް އުފަލާއެކު ފާހަގަ ކުރައްވާފައިވެއެވެ. އަދި އެ ދުވަހު ދިވެހި ސަރުކާރު އެހީއަށް އެދުނު ޤައުމުތަކުގެ ތެރެއިން އެންމެ އަވަހަށް ރާއްޖެއަށް އެހީ ފޯރުކޮށްދިން ރަހުމަތްތެރި އިންޑިއާއިންކަން ފާހަގަކޮށް އިންޑިއާގެ ސަރުކާރާއި އެ ގައުމުގެ ރައްޔިތުންނަށް ދިވެހިރާއްޖޭގެ އެންމެހާ ރައްޔިތުންގެ ނަމުގައި އިޚުލާސްތެރިކަމާއެކު ޝުކުރު ދަންނަވާފައިވެއެވެ.
