ޝަހީދުންގެ ހަނދާނީ ބިނާގައި ދިދަ މައުންޓުކުރުމާއި ގާޑް މައުންޓުކުރުމުގެ ރަސްމިއްޔާތު ބާއްވައިފި

މިއަހަރުގެ ފަޚުރުވެރި ނަޞްރުގެ ދުވަހުގެ މުނާޞަބަތުގައި އެމްއެންޑީއެފުން ޝަހީދުންގެ ހަނދާނީ ބިނާގައި ދިދަ މައުންޓުކުރުމާއި ގާޑް މައުންޓުކުރުމުގެ ރަސްމިއްޔާތު ކުރިއަށް ގެންގޮސްފިއެވެ.

ނޮވެމްބަރު 3 ވަނަ ދުވަހު ޝަހީދުވި ޝަހީދުންގެ ޒިކުރާ އާކުރުމުގެ ގޮތުން އަންގާރަ ދުވަހުގެ ހެނދުނު 06:30 ގައި ޝަހީދުންގެ ހަނދާނީ ބިނާ ސަރަހައްދުގައި ހާއްސަ ރަސްމިއްޔާތެއް ބާއްވާފައިވާއިރު، ރަސްމިއްޔާތުގައި މިނިސްޓަރ އޮފް ޑިފެންސް މާރިޔާ ދީދީ. ކޮމިޝަނަރ އޮފް ޕޮލިސް އަދި މޯލްޑިވްސް ނޭޝަނަލް ޑިފެންސްފޯސްގެ އިސްވެރިން ވަނީ ބައިވެރި ވަޑައިގެންފައެވެ.

މީގެ އިތުރުން ނަޞްރުގެ ދުވަހު ޝަހީދުވި ޝަހީދުންގެ ޒިކުރާ އާކުރުމުގެ ގޮތުން ސިފައިންވަނީ ހަތް ބަޑީގެ ސަލާމެއް އަރުވާފައެވެ. މި ރަސްމިއްޔާތުގައި އަޒުމް އާކޮށްދެއްވައިފައިވަނީ ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް ޢަބްދުއްރަޙީމް ޢަބްދުއްލަޠީފްއެވެ. މީގެއިތުރުން ދުވަހާ ގުޅޭ ދުއާ އެއްވެސް ދަންނަވާފައިވެއެވެ. މި ދުއާ ދެންނެވީ ކެޕްޓަން އަބްދުލް ގަފޫރު މުހައްމަދެވެ.

މީގެ އިތުރުން ސިފައިންގެ ބޭންޑުން ސިފައިންގެ ހާއްސަ ލަވަ ކިޔުއްވާފައިވެއެވެ. މި ލަވަ އަޑު ހަރުކޮށް އެންމެހާ ސިފައިން ވަނީ ކިޔުއްވާފައެވެ. މިއަހަރު ކޮވިޑާއި ގުޅިގެން އެހެން އަހަރުތަކުގައި ބާއްވަމުން އައި މިއުޒިކަލް ޑްރިލް ޑިސްޕްލޭ މިއަހަރު ބާއްވަން އަދި ހަމަޖެހިފައެއް ނުވެއެވެ.