އެމެރިކާގެ ރިޔާސީ އިންތިޚާބުގެ އެންމެ ފަހު ދުވަހުގެ ކުރިން ވޯޓުލުމަށް އޮންނަ މަރުހަލާގައި 95 މިލިއަނަށްވުރެ ގިނަ މީހުން ވޯޓުލައިފި އެވެ.
އެމެރިކާގެ ރިޔާސީ އިންތިޚާބުގެ އެންމެ ފަހު ދުވަހަކީ ނޮވެމްބަރ މަހުގެ 3 ވަނަ ދުވަހު އެވެ. ނޮވެމްބަރ މަހުގެ 2 ވަނަ ދުވަހާ ހަމައަށް ކުރިން ވޯޓުލުމުގެ މަރުހަލާގެ ދަށުން 95 މިލިއަނަށްވުރެ ގިނަ މީހުން ވޯޓުލާފައިވާއިރު މިއީ މިފަހަކުން އެންމެ ގިނަ އަދަދެއްގެ ބަޔަކު އެމެރިކާގައި އިންތިޚާބުގައި ވޯޓުލީ ފަހަރެވެ.
އެންމެ ފަހުން އެމެރިކާގައި 2016 ވަނަ އަހަރު ބޭއްވި ރިޔާސީ އިންތިޚާބުގައި ވޯޓުލާން ނިކުމެފައިވަނީ 69 އިންސައްތަ މީހުންނެވެ. މިފަހަރު ކުރިން ވޯޓުލުމުގެ މަރުހަލާގައި ވޯޓުލީ މީހުންގެ އަދަދާއެކު މިހާރުވެސް މިވަނީ މިފަހަރުގެ އިންތިޚާބުގައި 69 އިންސައްތަ މީހުން ވޯޓުލާފައެވެ.
މެއިލް މެދުވެރިކޮށްނާއި ކުރިން ވޯޓުލުމުގެ މަރުހަލާގައި ނިކުމެ ގިނަ ބަޔަކު ވޯޓުލާފައި މިވަނީ އެމެރިކާގައި ހަލުވިމިނެއްގައި ކޮވިޑް-19 ފެތުރެމުންދާތީ ވައިރަހަށް ހުށަހެޅުމަށް އޮތް ފުރުސަތު ހަނިކުރުމުގެ ގޮތުންނެވެ. ގިނަ ބަޔަކު އެއް ފަހަރާ ނިކުމެ ވޯޓުލާން އުޅެފިނަމަ އަނެއްކާވެސް އެތައް ބަޔަކަށް ވައިރަސް ޖެހުމުގެ ފުރުސަތު ލިބިގެންދާނެތީ އެވެ. އެމެރިކާގައި މިހާތަނަށް އައިއިރު ކޮވިޑް-19 ޖެހިގެން 230،000 މީހުން ވަނީ މަރުވެފައެވެ. އަދި މިހާރުވެސް އެމެރިކާގެ ގިނަ ސްޓޭޓްތަކެއްގައި އަންނަނީ ހަލުވި މިނެއްގައި ވައިރަސް ފެތުރެމުންނެވެ.
އެމެރިކާގައި ނެގެމުންދާ ޕޯލްތަކަށް ބަލާއިރު ކުރީގައި އުޅުއްވަނީ ބައިޑަން އެވެ. އޮކްޓޯބަރ 27ން 29ށް ނަގާފައިވާ ޕޯލްތަކުން ދައްކާގޮތުގައި ބައިޑަން އަށް ވަނީ 51 އިންސައްތަ ލިބިވަޑައިގަންފައެވެ. ޓްރަމްޕަށް ލިބިވަޑައިގަންފައިވަނީ 43 އިންސައްތަ އެވެ.
އެހެންނަމަވެސް މި ޕޯލްތަކަކީ އެމެރިކާގެ ރިޔާސީ އިންތިޚާބު ކާމިޔާބު ކުރާނެ ކެންޑިޑޭޓު ކަނޑައަޅާ ޕޯލްތަކެއް ނޫނެވެ. އެކަން ކަނޑައަޅާނީ އިލޮކްޓޯރަލް ކޮލެޖްގައި ހިމެނޭ 538 މެންބަރުންގެ ވޯޓުންނެވެ. ސްޓޭޓްތަކުގެ މެދުގައި އޮންނަ އިންތިޚާބީ ނިޒާމެއްކަމަށްވާ އިލެކްޓޯރަލް ކޮލެޖް ގައި ހިމެނޭ މެންބަރުންގެ ވޯޓުން ނަތީޖާ ނިކުންނައިރު އެރިޒޯނާ، ފްލޮރިޑާ އަދި ނޯރތް ކެރޮލިން އަކީ އިންތިޚާބުގެ ނަތީޖާ ކަނޑައަޅާނެ މުހިންމު ތިން ސްޓޭޓެވެ.
ބެލެވޭ ގޮތުގައި އެމެރިކާގެ ރައީސް ޑޮނަލްޑް ޓްރަމްޕަށް ތާއީދުކުރާ ރިޕަބްލިކަންގެ ގިނަ މީހުން ވޯޓުލާން ނިކުންނާނީ އަންގާރަ ދުވަހު އެވެ. އިންތިޚާބަށް ކެމްޕެއިން ފެށުނީއްސުރެ ވެސް ޓްރަމްޕް ގެންދަވަނީ މެއިލް މެދުވެރިކޮށްލާ ވޯޓުލާތަކުގައި އޮޅުވާލުންތަކެއް އުޅޭ ކަމަށް ތުހުމަތުކުރައްވާ ވާހަކަދައްކަވަމުންނެވެ. އެހެންނަމަވެސް މިހާތަނަށް އައިއިރު އެކަމަށް އެއްވެސް ހެއްކެތް ޓްރަމްޕަށް ދެއްކިފައެއްނުވެ އެވެ.
ޖޯ ބައިޑަން ނިސްބަތްވެވަޑައިގަންނަވާ ޑިމޮކްރަޓުންގެ ގިނަ ބަޔަކު ވަނީ ކުރިން ވޯޓުލުމުގެ މަރުހަލާގައި ވޯޓުލާފައެވެ.
ކަމާބެހޭ މާހިރުން ގަބާލުކުރާ ގޮތުގައި 2016 ވަނަ އަހަރުގެ އިންތިޚާބުގައި ވޯޓުލާން ނިކުތް 138 މިލިއަން މީހުންނަށްވުރެ ގިނަ މީހުން މިފަހަރުގެ އިންތިޚާބުގައި ވޯޓުލާނެ އެވެ. އެފަހަރުގެ އިންތިޚާބުގައި ކުރިން ވޯޓުލުމުގެ މަރުހަލާގެ ދަށުން ވޯޓުލާފައިވަނީ 47 މިލިއަން މީހުންނެވެ.
