އިނގިރޭސިވިލާތުގެ ރާނީ އަދި ޕްރިންސް ލޮކްޑައުން އާއި ދިމާކޮށް ވިންޑްސޯ ގަނޑުވަރަށް!

އަންނަ ބުރާސްފަތި ދުވަހު އިނގިރޭސިވިލާތް ލޮކްޑައުންކުރުމަށް ނިންމާފައިވާތީ އެގައުމުގެ ރާނީ ކްއީން އެލިޒަބަތް 2 އަދި ޕްރިންސް ފިލިޕްސް ލޮކްޑައުންވާން ވިންޑްސޯ ގަނޑުވަރަށް ވަޑައިގެންފިއެވެ.

ސެންޑްރިހަމް އެސްޓޭޓްއިން އިން ހޯމަ ދުވަހުގެ ވަގުތެއްގައި ރާނީ އެލިޒަބަތާއި ޕްރިންސް ފިލިޕްސް ވިންޑްސޯ ގަނޑުވަރަށް ބަދަލުވިއިރު ވިންޑްސޯ ގަނޑުވަރުގެ މަރާމާތުގެ މަސައްކަތް ވަނީ ހުކުރު ދުވަހު ނިންމާލާފައެވެ. އަދި އެ ގަނޑުވަރުގެ ސެކިއުރިޓީ އިތުރަށް ވަރުގަދަ ކޮށްފައިވާ ކަމަށް މީޑިއާތަކުން ވަނީ ރިޕޯޓްކޮށްފައެވެ.

ހޮނިހިރު ދުވަހު ގައުމާއި މުހާތަބު ކުރައްވާ އިނގިރޭސިވިލާތުގެ ބޮޑު ވަޒީރު ބޮރިސް ޖޯންސަން ވިދާޅުވީ އަންނަ ބުރާސްފަތި ދުވަހުން ފެށިގެން ލޮކްޑައުންއަކަށް ދިއުމަށް އެގައުމުން ނިންމާފައިވާ ކަމަށާއި، އެހެންކަމުން ރެސްޓޯރެންޓުތަކާއި ފިހާރަތަކުގެ އިތުރުން ގައުމުގެ ބޯޑަރުވެސް ކުރިއަށް އޮތް ހަތަރު ހަފްތާއަށް ބަންދުވާނެ ކަމަށެވެ. އަދި މި ދުވަސްތަކުގައި އެއްވެ އުޅުން މަނާވާނެ ކަމަށާއި ގެއިން ބޭރަށް ނުކުމެ ހެދޭނީ ހަމައެކަނި ޒަރޫރީ ބޭނުންތަކަށް ކަމަށް ޖޯންސަން ވިދާޅުވިއެވެ. ނަމަވެސް ކެފޭ ރެސްޓޯރެންޓްތައް އަދި ފިހާރަތަކުން ޑެލިވަރީގެ ހިދުމަތް ދެވޭނެކަމަށް ޖޯންސަން ވިދާޅުވިއެވެ.

އިނގިރޭސިވިލާތަކީ މުޅި ދުނިޔެ އިން 9 ވަނައަށް އެންމެ ގިނަ މީހުން ކޮވިޑަށް ޕޮޒިޓިވްވެފައިވާ ގައުމެވެ. އެގައުމުން މިހާތަނަށް 1،053،864 މީހުން ކޮވިޑަށް ޕޮޒިޓިވްވެފައިވާއިރު، މިބަލީގައި 46،853 މީހުން ވަނީ އެގައުމުން މަރުވެފައެވެ.