ކުޑަކުދިންތަކަކަށް ޖިންސީ ގޯނާކުރި މައްސަލައިގައި ފިލްމީ ތަރި މުހައްމަދު ޔުނާން އާއި އޭނާގެ އަންހެނުން ފާތިމަތު ރިހުލާގެ މައްޗަށް ޕްރޮސެކިއުޓަރ ޖެނެރަލްގެ އޮފީހުން ދައުވާކޮށްފިއެވެ.

ޕީޖީ އޮފީހުން ބުނީ، 2019 ވަނަ އަހަރާއި 2020 ވަނަ އަހަރުގެ ތެރޭގައި އެކި ދުވަސް މަތިން އުމުރުން 18 އަހަރު ނުފުރޭ ކުޑަކުދިންތަކަކަށް ޖިންސީ ގޯނާކުރި މައްސަލައިގައި އެ ދެމަފިރިންގެ މައްޗަށް ދައުވާ ކުރުމަށް ހުޅުމާލެ މެޖިސްޓްރޭޓް ކޯޓަށް ހޯމަ ދުވަހު ހުށައަޅާފައިވާ ކަމަށެވެ. ޔުނާންގެ މައްޗަށް ނުވަ ދައުވާ އުުފުލާފައިވާއިރު އޭނާގެ އަންހެނުން މައްޗަށް ފަސް ދައުވާއެއް ވަނީ އުފުލާފައެވެ.

ޔުނާންގެ މައްޗަށް އުފުލާފައިވާ ދައުވާތަކުގެ ތެރޭގައި، ކުޑަކުއްޖަކަށް އިތުބާރުކުރަން ޖެހޭ މަގާމެއްގައި ހުރި މީހަކު ޖިންސީ އަމަލެއް ބަޔަކު ހިންގާ މަންޒަރު ކުޑަކުއްޖަކަށް ދެއްކުމުގެ ދެ ދައުވާ އާއި، އިތުބާރުކުރަން ޖެހޭ މަގާމެއްގައި ހުރި މީހަކު އެ ކުޑަކުއްޖަކު ލައްވާއި ޖިންސީ އަމަލެއް ހިންގުމުގެ ދެ ދައުވާ އާއިލާގެ މެމްބަރަކު އެ އާއިލާގެ ކުޑަކުއްޖަކާއެކު ޖިންސީ އަމަލު ހިންގުމުގެ ދައުވާ، ކުޑަކުއްޖަކު އިތުބާރު ކުރަންޖެހޭ މާގާމެއްގައި ހުރި މީހަކު، އެ ކުޑަކުއްޖާގެ ހާޒިރު ގައި އެ ކުއްޖާއަށް ދެއްކުމުގެ މަގްސަދުގައި އަމަލެއް ހިންގުމުގެ ދެ ދައުވާ އަދި އޮރިޔާންކާޑު ގެންގުޅުމުގެ އިތުރުން އޮރިޔާންކާޑު އުފެއްދުމުގެ ދައުވާ ހިމެނޭއެވެ.

ރިހުލާގެ މައްޗަށް އުުފުލާފައިވާ ފަސް ދައުވާގެ ތެރޭގައި، ކުޑަކުއްޖަކު އިތުބާރުކުރަން ޖެހޭ މަގާމެއްގައި ހުރި މީހަކު އެ ކުޑަކުއްޖާއާއެކު ޖިންސީ އަމަލެއް ހިންގުމުގެ ދައުވާ، ކުޑަކުއްޖަކު އިތުބާރުކުރަން ޖެހޭ މަގާމެއްގައި ހުރި މީހަކު، އެ ކުޑަކުއްޖާގެ ހާޒިރުގައި އެ ކުއްޖާއަށް ދެއްކުމުގެ މަގްސަދުގައި ޖިންސީ އަމަލެއް ހިންގުމުގެ ދެ ދައުވާ އަދި އޮރިޔާންކާޑު ގެންގުޅުމުގެ އިތުރުން އޮރިޔާން ކާޑު އުފެއްދުމުގެ ދައުވާއެވެ.

މި ދައުވާތައް ސާބިތުވެއްޖެ ނަމަ ދެ މީހުންނަށް ވެސް އުމުރު ދުވަހުގެ ޖަލު ހުކުމެއް އަންނާނެއެވެ. މިތަނުން ގިނަ ދައުވާތަކުގެ އެންމެ ލުއި ހުކުމަކީ ވެސް 15 އަހަރު ދުވަހު ޖަލަށް ލުމެވެ. އަދި އެ މީހުންގެ މައްޗަށް އުފުލާފައިވާ ދައުވާތަކުގެ ތެރޭގައި ބޮޑެތި ޖިނާއީ ކުށްތަކުގެ ގޮތުގައި ކަނޑައަޅާފައިވާ ދައުވާތައް ވެސް ހިމެނެއެވެ.