ބައިނަލްއަޤްވާމީ ގޮތުން ފާހަގަ ކުރާ "16 Days of Activism Against Gender Based Violence" ކެމްޕޭންގެ ޙަރަކާތެއްގެ ގޮތުން، "އާޓް ފޮރ އެކްޝަން" ގެ ނަމުގައި ކުރެހުމުގެ ކެމްޕޭނެއް ހުޅުވާލައިފިއެވެ.
މި ކެމްޕެއިން ކުރިއަށް ގެންދަނީ ފެމިލީ ލީގަލް ކްލިނިކް އާއި، އދ. ގެ ތަރައްޤީއާ ބެހޭ ޖަމްޢިއްޔާ (ޔޫއެންޑީޕީ) އަދި އުރީދޫ ގުޅިގެންނެވެ.
މި ކެމްޕޭންގެ މަޤްސަދަކީ، ދިވެހިރާއްޖޭގައި އަންހެނުންނަށް ކުރާ އަނިޔާ ހުއްޓުވުމަށްޓަކައި، މިފަދަ އަނިޔާ ލިބޭ ފަރާތްތަކަށް ޢަދުލު އިންޞާފު ހޯދައި ދެވޭނެ ގޮތްތަކާއި، އެ ފަރާތްތައް ބާރުވެރިކޮށް އެ ފަރާތްތަކަށް ދޭންޖެހޭ އެހީތެރިކަމާއި އޯގާތެރިކަން ފޯރުކޮށްދެވޭނެ ގޮތްތަކާއި، އަންހެނުންނަށާއި ކުދިންނަށް މުޖުތަމަޢުގައި އޮންނަންޖެހޭ ރައްކާތެރިކަމާމެދު ކުރާ އުއްމީދު ތަކާމެދު ޢާންމުންގެ ޝުޢޫރު ފާޅުކުރުމަށް ފުރުސަތު ހުޅުވާލުމެވެ.
މި ކެމްޕޭނަށް ކުރެހުން ހުށަހެޅުމުގެ ފުރުޞަތު ހުޅުވާލާފައިވަނީ 14 ނޮވެމްބަރ 2020 ގެ ނިޔަލަށެވެ. މި ކުރެހުމުގެ ކެމްޕޭން ހުޅުވާލާފައިވަނީ ޢުމުރުން 16 އަހަރުން ފެށިގެން މަތީގެ ފަރާތްތަކަށެވެ. މި ކެމްޕޭނަށް ކުރެހުންތައް ހުށަހެޅުމުގައި ކޮންމެ ވަސީލަތެއްވެސް ބޭނުންކުރެވިދާނެއެވެ.
މި ކެމްޕޭނަށް ހުށަހަޅާ ހުށަހެޅުންތަކުގެ ތެރެއިން ފެމިލީ ލީގަލް ކްލިނިކް، ޔޫއެންޑީޕީ، އަދި އުރީދޫގެ ބޭފުޅުންގެ މައްޗަށް އެކުލެވޭ ޕެނަލް އަކުން 16 ކުރެހުމެއް ހޮވުމަށް ވަނީ ނިންމާފައެވެ. އަދި މި 16 ފަރާތުގެ ކުރެހުންތައް ފެމިލީ ލީގަލް ކްލިނިކް، ޔޫއެންޑީޕީ، އަދި އުރީދޫގެ ސޯޝަލް މީޑިއާގައި 25 ނޮވެމްބަރ 2020 އިން ފެށިގެން 10 ޑިސެމްބަރ 2020 ގެ ނިޔަލަށް ޝާއިރު ކުރާނެއެވެ. އަދި މީގެ އިތުރުން އުރީދޫގެ ލެޑް ބޯޑުގައިވެސް މި 16 ކުރެހުން އިޝްތިހާރު ކުރުމަށް ވަނީ ހަމަޖެހިފައެވެ.
