އިތުރު 3 ކެނޑިޑޭޓަކު އަނބުރާ ނަން ގެންގޮސްފި
2 ނޮވެމްބަރު 2020 | ހޯމަ 08:39ނަން އަނބުރާ ގެންގޮސްފައިވަނީ، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބަށް ވާދަކުރާ 3 ކެނޑިޑޭޓުން
އިލެކްޝަންސް ކޮމިޝަނުގެ ބައެއް މެމްބަރުން، އަންނަ އަހަރުގެ މަރޗު މަހު ލޯކަލް ކައުންސިލްތަކުގެ އިންތިހާބު ބޭއްވުމަށް ދަނީ މަސައްކަތް ކުރަމުން
އަންނަ އަހަރު ބާއްވަން ނިންމާފައިވާ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބަށް ކުރިމަތިލާފައިވާ ކެނޑިޑޭޓުންގެ ނަން އަނބުރާ ގެންދިއުމުގެ ފުރުޞަތު ހުޅުވާލާފައިވާތީ، އިތުރު ތިން ކެނޑިޑޭޓަކު ނަން އަނބުރާ ގެންގޮސްފި އެވެ.
ނަން އަނބުރާ ގެންގޮސްފައިވަނީ، ލޯކަލް ކައުންސިލްތަކުގައި އަންހެނުންނަށް ހާއްސަ ކުރެވިފައިވާ ގޮނޑިތަކަށް ކުރިމަތި ލާފައިވާ ތިން ކެނޑިޑޭޓެކެވެ.
އެއީ، ޖުމްހޫރީ ޕާޓީގެ ޓިކެޓްގައި ރ، މަޑުއްވަރީ ކައުންސިލްގެ އަންހެނުންނަށް ހާއްސަކުރެވިފައިވާ ދެ ގޮނޑީގެ ތެރެއިން ގޮނޑިއަކަށް ކުރިމަތި ލާފައިވާ، އިލްހާމާ ޢީސާ އާއި ޕީޕީއެމްގެ ޓިކެޓްގައި، ހދ. ހިރިމަރަދޫ ކައުންސިލްގެ އަންހެނުންނަށް ޚާއްޞަކުރެވިފައިވާ ދެ ގޮނޑީގެ ތެރެއިން ގޮނޑިއަކަށް ކުރިމަތިލި މަރްޔަމް ޘަމްރާ، އަދި އެމްޑީޕީގެ ޓިކެޓްގައި ދ. ހުޅުދެލީ ކައުންސިލްގެ އަންހެނުންނަށް ޚާއްޞަކުރެވިފައިވާ ދެ ގޮނޑީގެ ތެރެއިން ޢާއިޝަތު ނާފިޡާ އެވެ.
ލޯކަލް ކައުންސިލްތަކުގެ އިންތިހާބުގެ ހާއްސަ ގާނޫނު 2020ގެ ތިންވަނަ މާއްދާގެ (ށ) ދަށުން، ކެނޑިޑޭޓުންގެ ނަން އަނބުރާ ގެންދިއުމުގެ ފުރުސަތު ހުޅުވާލީ ޖުލައި މަހުގެ 23 ވަނަ ދުވަހުއެވެ.
އިތުރު ތިން ކެންޑިޑޭޓަކު ނަން އަނބުރާ ގެންގޮސްފައިވާއިރު، މީގެކުރިން ވެސް ކެނޑިޑޭޓުންތަކެއް ވަނީ ނަން އަނބުރާ ގެންގޮސްފައެވެ.
ނަން އަނބުރާ ގެންދިއުމަށް ބޭނުންވާނަމަ އެކަމަށް އެދި ހުށަހަޅާނީ "ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގެ ކެނޑިޑޭޓުން ނަން އަނބުރާ ގެންދިއުމަށް އެދޭ ފޯމު" އިން ކަމަށް އީސީން ބުނެއެވެ.
ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު އަންނަ އަހަރުގެ މާރޗު މަހު މިހާރު ބޭއްވުމަށް މަސައްކަތް ކުރަމުންދާއިރު، އެ ދެ އިންތިހާބަކީ މި ހިނގާ 2020 ވަނަ އަހަރު އޭޕްރީލް މަހު ބާއްވަން ތާވަލް ކުރި އިންތިހާބެކެވެ. އިންތިހާބު ފަސްކުރަން ޖެހުނީ، ކޮވިޑް-19 އާއި ގުޅިގެން ނެވެ.
