ސްރީލަންކާގައި ކޮވިޑް-19ގެ ކޭސްތައް އިތުރުވެ ވެރިރަށް ކޮލަމްބޯ ތިން ދުވަހަށް ލޮކްޑައުން ކުރަން ނިންމާފައިވީ ނަމަވެސް މި މުއްދަތު އަނެއްކާވެސް އިތުރުކޮށްފިއެވެ.
ލަންކާ ސަރުކާރާއި ހަވާލާދި "ދަ ހިންދޫ" ނިއުސްއިން ބުނީ ތިންދުވަހު ލޮކްޑައުން ކުރަން ކޮށްފައިވާ އިޢުލާނުގައި، ލޮކްޑައުން އުސޫލުތައް ނޮވެމްބަރު މަހުގެ ނުވަވަނަ ދުވަހާއި ހަމައަށް ދެމެހެއްޓުމަށް އެ ޤައުމުގެ ސަރުކާރުން ނިންމައިފައިވާ ކަމަށެވެ.
މީގެ އިތުރުން ސްރީލަންކާގެ ސަރުކާރުންވަނީ އަމިއްލައަށް ގޭގައި ކަރަންޓީނުވެފައިވާ ޢާއިލާތަކަށް 10000 (ދިހަ ހާސް) ލަންކާ ރުޕީސް އަށްވާ ވަރަށް ކާބޯތަކެތި ފޯރުކޮށްދިނުމުގެ ޙަރަކާތަކެއްވެސް ފަށައިފައެވެ. މި ތަކެތި އެމީހުންނަށް ފޯރުކޮށްދޭނީ އެގައުމުގެ ސަލާމަތީ ބާރުތަކުގެ އެހީތެރިކަމާއި އެކުގައި ކަމަށް ސަރުކާރާ ހަވާލާދީ ހަބަރުތަކުން ބުނެއެވެ.
ލަންކާ ސަރުކާރުން ބުނީ މިގޮތައް ލޮކްޑައުންގެ މުއްދަތު އިތުރު ކުރަން ނިންމީ ފާއިތުވި ތިން ހަފްތާގެ ތެރޭގައި ބަލިޖެހޭ މީހުންގެ ޢަދަދު ލަންކާގައި އިތުރުވާން ފަށުމާއި ގުޅިގެން ކަމަށެވެ. އެގޮތުން ފާއިތުވި ދުވަސްތަކުގައި އެންމެ ބޮޑު ދެ ކްލަސްޓަރ ފެނިފައިވަނީ ހެދުން އުފައްދާ ކާރުޚާނާ އަކުންނާއި މަސް މާރުކޭޓަކުންނެވެ.
21 މިލިއަން މީހުންގެ އާބާދީއެއް އޮންނަ ސްރީލަންކާގައި މިހާތަނަށް 11،060 (އެގާރަހާސް ފަސްދޮޅަސް) އަށްވުރެ ގިނަ މީހުންނަށް ކޮވިޑް-19 ޖެހި 22 މީހުން ވަނީ މަރުވެފައެވެ. ފާއިތުވި 24 ގަޑީއިރުގެ ތެރޭގައިވެސް އެ ޤައުމުންވަނީ 397 މީހުން ކޮވިޑަށް ޕޮޒިޓިވްވެފައެވެ.
