މިއީ އެހެން ގަައުމެއް ނަމަ ފެންނާނީ މިނިސްޓަރ އިމްރާން މައާފަށް އެދި، އިސްތިއުފާ ދެއްވާ މަންޒަރު: މީކާއިލް
މި މައްސަލައާއި ގުޅިގެން މަޖިލީހަށް އޭނާގެ އިތުބާރު ނެތް ކަމުގެ މައްސަލަ ވެސް ވަނީ ހުށައަޅާފަ
ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް
މިއީ އެހެން ގަައުމެއް ނަމަ ފެނިގެންދާނީ ހޯމް މިނިސްޓަރ ޝެއިހް އިމްރާން އަބްދުﷲ މާފަށް އެދުމާއި އެކު އިސްތިއުފާގެ ސިޓީ ރައީސްއަށް އަރުވާ މަންޒަރު ކަމަށް ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ވިދާޅުވެއްޖެއެވެ.
މީކާއިލް މިހެން ވިދާޅުވެފައިވަނީ ހުޅުމާލޭ ފަޅުގައި އަޅާފައި އޮތް ސަފާރީއެއްގައި އަންހެނަކު ރޭޕް ކުރި ކަމަށް ބުނެ އާންމުންގެ ތެރޭ ވާހަކަ ދެކެވެނީ އެކަން ހިނގައި ދިޔަ ގޮތަށް ވުރެ ބޮޑުކޮށްލައިގެން ކަމަށް ދޭހަވާ ފަދަ މޭރުމަކުން ރޭޑިއޯ ޕްރޮގްރާމެއްގައި މިނިސްޓަރ ވާހަކަ ދެއްކެވުމާއި ގުޅިގެން އާއްމުންގެ ފާޑުކިއުން އަމާޒުވެފައިވަނިކޮށެވެ. އަދި މި މައްސަލައާއި ގުޅިގެން މަޖިލީހަށް އޭނާގެ އިތުބާރު ނެތް ކަމުގެ މައްސަލައެއް ވަނީ ހުށައަޅާފައެވެ.
ހޯމަ ދުވަހުގެ ޖަލްސާގައި މާލޭގައި ޓެކްސީ ކުރަމުންދާ ހަމައެކަނި އަންހެން ޑްރައިވަރު ކަމަށްވާ އައިމިނަތު ވަހީދާގެ ޓެކްސީއަށް އެކި ފަހަރު މަތިން ގެއްލުންދީފައިވާ މައްސަލައާއި ގުޅިގެން ދިވެހި މުޖުތަމައުގައި އަންހެނުންނަށް އޮތް ރައްކާތެރިކަމާއި ގުޅިގެން މެމްބަރުން ސުވާލު އުފައްދަވަމުން ގެންދަވާ ދަނޑިވަޅުގައި މީކާއިލް ވިދާޅުވީ ފުލުހުންގެ މުއައްސަސާގެ ބެލެނިވެރި ފަރާތްކަމަށްވާ ހޯމް މިނިސްޓަރ އެދުވަަހު ދެއްކެވި ވާހަކައިން ޖިންސީ ކުށުގެ އަމަލުތަކަށް ހިތްވަރު ދެވޭ ކަމަށެވެ. އެކަމަށްޓަކައި މިނިސްޓަރ މާފަށް އެދިވަޑައިގެންނެވި ނަމަވެސް މިއީ އެހެން ގައުމެއް ނަމަ ފެނިގެންދާނީ މާފަށް އެދުމާއި އެކު އިސްތިއުފާގެ ސިޓީ ރައީސްއަށް އަރުވާ މަންޒަރު ކަމަށެވެ.
މީކާއިލް ވިދާޅުވީ ދައުލަތުގެ އިސް މަގާމުތަކުގައި ތިއްބަވާ ބޭފުޅުންގެ އަމަލުތަކާއި ބަސްމަގު ހުންނަ ގޮތް ބަދަލު ކުރަން ޖެހޭ ކަމަށެވެ. އެގޮތުން ހޯމް މިނިސްޓަރަކަށް ހުންނަަަވާ ބޭފުޅަކަށް ޖެންޑަރ ބޭސްޑް ވަޔަލެންސްއަކީ ކޮބާ ކަމާއި ޖެންޑަރ ސެންސިޓިވް ބަސް މަގަކީ ކޮބައިކަން އެނގުން ވަރަށް މުހިއްމު ކަމަށް އޭނާ ވިދާޅުވިއެވެ. އަދި ފުލުހުންގެ އިދާރާގައާއި ތަހުގީގީ އިދާރާތަކުގައި ތިބެން ޖެހޭނީ މިކަންކަމަށް ހޭލުންތެރި ފަރާތްތައް ކަމަށްވެސް ވިދާޅުވިއެވެ.
އެހެންނޫންނަމަ ފެނިގެންދާނީ މި ފަދަ މައްސަލަތަކަށް ދައުލަތުން އަހަމިއްޔަތު ދޭ މިންވަރު ކުޑަވާ މަންޒަރާއި، މިފަދަ ކުށްތަކުގެ ޝިކާރައަކަށްވާ އެތައް ބަޔަކަށް އިންސާފު ނުލިބޭ މަންޒަރު ކަމަށް ވިދާޅުވިއެވެ.
ޝެއިހް އިމްރާންގެ މައްސަލަ ފެންމަތިވެގެން ދިއުމާއިއެކު އޭނާ ވިދާޅުވެފައިވަނީ ޖިންސީ އަނިޔާ ނުވަތަ ފުރައްސާރަ ކުރުމަކީ ކުޑަކަމެއް ކަމަށް ވިދާޅުވެފައި ނުވާނެ ކަމަށެވެ. އަދި މީޑިއާތަކުގައި މިކަން ރިޕޯޓްކޮށްފައިވަނީ ހަޤީގަތް އޮޅޭގޮތަށް ކަމަށް ވިދާޅުވެ ދިފާއުވެވަޑައިގެންނެވިއެވެ.
