ރައީސް ނަޝީދު ވިދާޅުވީ ހަރުކަށި ފިކުރުގެ މީހުން ބޭނުންވަނީ އަންހެނުން ގޭގައި ބައި ތިއްބަވާ، ނޯކިރީ ކުރާ ބައެއްގެ ގޮތުގައި ބެހެއްޓުމަށް
ރައްޔިތުންގެ މަޖިލީހުގެ ރައީސް މުހައްމަދު ނަޝީދު
ހަރުކަށި ފިކުރުގެ މީހުން ބޭނުންވަނީ އަންހެނުން ގޭގައި "ނޯކިރީ" ކުރަން ބައި ތިއްބަން ކަމަށް، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
މާލޭގައި ޓެކްސީ ކުރަމުންދާ ހަމައެކަނި އަންހެން ޑްރައިވަރު ކަމަށްވާ އައިމިނަތު ވަހީދާގެ ޓެކްސީއަށް އެކި ފަހަރު މަތިން ގެއްލުންދީފައިވާތީ އެކަމާއި ގުޅޭ ގޮތުން މަޖިލީހަށް ހުށައެޅި ކުއްލި މައްސަލައާއި ގުޅިގެން ރައީސް މުހައްމަދު ނަޝީދު ވިދާޅުވީ، ހަރުކަށި ފިކުރުގެ މީހުން ބޭނުންވަނީ އަންހެނުންނަކީ ގޭގައި ތިބޭ، "ނޯކިރީ" ކުރާ ބައެއްގެ ގޮތުގައި ބެހެއްޓުމަށް ކަމަށެވެ.
އަދި އެ ފިކުރަށް ދިވެހި މުޖުތަމައު އަނބުރާލުމަށްޓަކައި ބާރުގެ ބޭނުންކޮށްގެން ބަޔަކު މަސައްކަތް ކުރާ ކަމަށް ވިދާޅުވެ، އެމަނިކުފާނު ވަނީ މި ފަދަ މައްސަލަތަކުގައި ދައުލަތުގެ މުއައްސަސާތައް ވެސް ޝާމިލުވޭތޯ ސުވާލު އުފައްދަމުންދާކަން ފާހަގަކުރައްވާފައެވެ. އަދި އެއީ މިކަންކަމާއި ގުޅިގެން ހުރި ކަންބޮޑުވުންތައް އިތުރުވާ ކަމެއް ކަމަށް ރައީސް ނަޝީދު ވިދާޅުވިއެވެ.
އައިމިނަތު ވަހީދާއަށް ހަމަލާދިން މައްސަލައާއި ގުޅިގެން އަންހެނުންނަށް އާމްދަނީ ހޯދުމަށް ހުރަސް އަޅާ ބަޔަކު ރާއްޖޭގައި އުޅޭކަން ގިނަ މެމްބަރުން ބަހުސްގައި ފާހަގަކުރައްވާފައިވެ އެވެ. އަދި މެންބަރުން ވަނީ މި ފަދަ އަމަލުތައް ކުށްވެރިކުރައްވާފައެވެ.
