ޓެކްސީއަށް ގެއްލުން ދިނުމުގެ މައްސަލައާއި އެކު އާޒިމްގެ ފާޑުކިއުން ފުލުހުންގެ އިދާރާއަށް
މިއީ ހުރިހާ ފުލުހުންގެ މައްސަލައެއް ނޫން ކަމަށް އާޒިމް ވިދާޅުވި
މެދު ހެންވޭރު ދާއިރާގެ މެމްބަރު އަލީ އާޒިމް
މާލޭގައި ޓެކްސީ ކުރަމުންދާ ހަމައެކަނި އަންހެން ޑްރައިވަރު ކަމަށްވާ އައިމިނަތު ވަހީދާގެ ޓެކްސީއަށް އެކި ފަހަރު މަތިން ގެއްލުންދީފައިވާތީ އެކަމާއި ގުޅޭ ގޮތުން މަޖިލީހަށް ހުށައެޅި ކުއްލި މައްސަލައާއި އެކު މެދު ހެންވޭރު ދާއިރާގެ މެމްބަރު އަލީ އާޒިމްގެ ފާޑުކިއުން ފުލުހުންގެ މުއައްސަސާއަށް އަމާޒުވެއްޖެއެވެ.
މި މައްސަލަ މަޖިލީހުގެ ސަމާލުކަމަށް ގެނެސް، މަޖިލީހުގައި ވާހަކަދައްވަމުން އެމްޑީޕީގެ ޕީޖީ ލީޑަރު އާޒިމް ވިދާޅުވީ އައިންތުގެ ކާރަށް ގެއްލުންދިން މައްސަލަ ފަސް ފަހަރެއްގެ މަތިން ފުލުހުންނަށް ހުށައެޅިއިރު އެ މައްސަލަ ބަލާފައި ނުވުމަކީ އެ އިދާރާގެ މައްސަލައެއް ކަމަށެވެ. މިއީ ހުރިހާ ފުލުހުންގެ މައްސަލައަކަށް ނުވި ނަމަވެސް، އެ އިދާރާގެ މައްސަލަތަކެއް ވާކަން އެ އިދާރާ ހިންގަން ތިއްބެވި ވެރިން ގަބޫލުކުރަން ޖެހޭ ކަމަށް އާޒިމް ވިދާޅުވިއެވެ. އަދި މި ފަދަ މައްސަލަތައް ހައްލުކޮށް، ރައްޔިތުންގެ އިތުބާރު ހޯދަން ޖެހޭ ކަމަށް ވެސް ވިދާޅުވިއެވެ.
މިހާތަނަށް ހިނހގާފައިވާ ހާދިސާތައް ފާހަގަކުރައްވާ އާޒިމް ވިދާޅުވީ އެމައްސަލަތަކުގެ ތަހުގީގުތައް ހިނގާފައިވާ ގޮތަށް ބަލާލާއިރުވެސް އެ އިދާރާގައި މައްސަލަތަކެއް ވާކަން އެނގޭ ކަމަށެވެ. ފުލުހުންގެ މުއައްސަސާއަށް ބޮޑު ބަޖެޓެއް ދިނުމުންވެސް މައްސަލަތައް ބަލަންޖެހޭ މިންވަރަށް ނުބެލޭ ކަމަށެވެ.
އާޒިމް ވިދާޅުވީ ފުލުހުންގެ މުއައްސަސާގައި ހުރި މައްސަލަތައް ހައްލުކޮށް، އެ އިދާރާގެ މަސައްކަތްތައް ރަނގަޅުކުރުމަކީ އެ އިދާރާ ހިންގަން ތިބޭ ފަރާތްތަކުގެ މަސައްކަތެއް ކަމަށެވެ.
މާލޭގައި އާންމުންނަށް ޓެކްސީގެ ޚިދުމަތް ފޯރުކޮށްދޭ އާމިނަތު ވަހީދާ އަށް އެކި ގޮތްގޮތުން އެކި ފަހަރުމަތިން އޭނާ ދުއްވަމުންދާ ޓެކްސީތަކަށް ގެއްލުންދީ، އެކިކަހަލަ ގޯނާތައް ކުރާ ވާހަކައަކީ ފުލުހުންނާއި ކަމާބެހޭ މުއައްސަސާތަކުގެ ސަމާލުކަމަށްވެސް އެތައް ފަހަރެއްގެ މަތިން ހުށައަޅާފައިވާ މައްސަލަތަކެކެވެ. އެހެންނަމަވެސް މިއަދާ ހަމައަށްވެސް މި މައްސަލައާއި ގުޅިގެން އޭނާއަށް އިންސާފު ލިބިފައެއް ނުވެއެވެ.
