ހުޅުމާލެ، "ކޮމިއުނިޓީ އަރބަން ފަރމިންގ" އަށް ކުރިމަތިލުމުގެ މުއްދަތު އިތުރުކޮށްފި
ފޯމް ހުށަހެޅުމުގެ މުއްދަތު މިމަހުގެ 5 އާއި ހަމައަށް ވަނީ އިތުރުކޮށްފައި
ހުޅުމާލެ، \"ކޮމިއުނިޓީ އަރބަން ފަރމިންގ\" ޕްރޮޖެކްޓްގެ ކުރެހުމެއް
ހުޅުމާލެ، "ކޮމިއުނިޓީ އަރބަން ފަރމިންގ" ޕްރޮޖެކްޓަށް ކުރިމަތިލުމުގެ މުއްދަތު ހައުސިންގ ޑިވޮލޮޕްމަންޓް ކޯޕަރޭޝަން (އެޗްޑީސީ) އިން އިތުރުކޮށްފިއެވެ.
މިކަމުގެ މައުލޫމާތު "ރާއްޖެއެމްވީ" އަށް ދެއްވަމުން އެޗްޑީސީގެ ސީނިއަރ ރިސާރޗް އެންޑް ޑިވެލޮޕްމަންޓް އޮފިސަރ އައިޝަތު ނަޔަޝީން އަޙްމަދު ވިދާޅުވީ ފޯމް ހުށަހެޅުމަށް މުއްދަތު އިތުރުކޮށްފައިވަނީ ނޮވެމްބަރު މަހުގެ 5 ވަނަ ދުވަހުގެ ނިޔަލަށް ކަމަށެވެ. އަދި މި މަޝްރޫއަށް ބޮޑު ތަރުހީބެއް ލިބިފައިވާ ކަމަށާއި ފޯމް ހުށަހަޅާފައިވާ ފަރާތްތަކުންވެސް ބައެއް މައުލޫމާތު ފުރިހަމަ ނުވެ ހުރި ކަން ފާހަގަކުރެވޭ ކަމަށާއި އެ ފަރާތްތަކަށްވެސް އެ މައުލޫމާތު ފުރިހަމަކުރުމަށް ފުރުސަތު ދީފައިވާނެ ކަމަަށް ނަޔަޝީން ވިދާޅުވިއެވެ.
މި މަޝްރޫއުއަކީ، "ސަސްޓެއިނަބަލް އިކޮނޮމިކް އެމްޕަވަރމަންޓް ފޯ ޑިވެލޮޕްމަންޓް އޮފްއެމް.އެސް.އެމް.އީސް" (ސީޑްސް) މަޝްރޫޢުގެ ބައެއްގެ ގޮތުގައި ކުރިއަށް ގެންދާ މަޝްރޫޢެކެވެ. އެޗްޑީސީން ބުނި ގޮތުގައި މި މަޝްރޫޢު ޚާއްޞަ ކުރެވިފައިވަނީ، "ރަށްވެހި ދަނޑުވެރިކަން" ނުވަތަ "އަރބަން ފާމިންގ" ކުރިއަރުވައި ޒަމާނީ ވަސީލަތްތަކުގެ އެހީގައި ދަނޑުވެރިކަން ކުރާ އައު ޖީލެއް ބިނާ ކުރުމަށެވެ.
އެޗްޑީސީން ބުނީ މި މަޝްރޫޢު ކުރިއަށް ގެންދިޔުމަށް ހަމަޖެހިފައިވަނީ ހުޅުމާލޭ "ނެއިބަރހުޑް 3" ގައި ހުސް ޖާގައިގެ ގޮތުގައި ކަނޑައެޅިފައިވާ ދެވަނަ ލޮޓްގައި ކަމަށެވެ. އަދި މި މަޝްރޫޢަށް ޖުމްލަ 19,871 އަކަފޫޓުގެ ބިމެއް ކަނޑައަޅާފައިވެއެވެ.
އެޗްޑީސީން މި ސަރަޙައްދު ބަހާލާފައިވަނީ 600 އަކަފޫޓުގެ 16 ޕްލޮޓަށެވެ. ކޮންމެ ޕްލޮޓެއް ޙަވާލު ކުރެވޭނީ 03 ދަނޑުވެރިންގެ މައްޗަށް އެކުލެވޭ ގުރޫޕަކަށް ކަމަށް އެޗްޑީސީން ބުނެއެވެ. އަދި މި މަޝްރޫޢުގައި ބައިވެރިވުމުގެ ފުރުޞަތު 48 ދަނޑުވެރިޔަކަށް ލިބިގެންދާނެ ކަމަށް އެ ކުންފުނިން ބުންޏެވެ.
އެޗްޑީސީން ބުނި ގޮތުގައި މަޝްރޫޢު ކުރިއަށް ގެންދަނީ ތިން ފިޔަވައްސަކަށް ބަހާލައިގެންނެވެ. އެގޮތުން ފުރަތަމަ ފިޔަވަހީގެ ތިން މަސް ދުވަހު އެއްވެސް ފީއެއް ނުނަގާނެ ކަމަށް އެޗްޑީސީން ބުނެއެވެ. ހަތަރުވަނަ މަހުން ފެށިގެން 3 މަސް ދުވަހުގެ މުއްދަތަށް ކޮންމެ ޕްލޮޓަކުން މަހަކު 1275 ރުފިޔާގެ ފީއެއް ދައްކަން ޖެހެއެވެ. ތިންވަނަ ފިޔަވަހިން ފެށިގެން ޕްރޮޖެކްޓް ކުރިއަށް ގެންދިއުމަށް ނިންމާފައިވަނީ ވިޔަފާރި އުސޫލުންނެވެ. އެއީ ހަތްވަނަ މަހުން ފެށިގެން ކޮންމެ މަހަކު ޕްލޮޓަކަށް 2500 ރުފިޔާ ފީއެއް ދައްކަން ޖެހޭ ގޮތަށެވެ.
