މޯލްޑިވްސް ބޯޓިންގް އެވޯޑްސްގެ ނޮމިނޭޝަނަށް ކުރިމަތިލުމުގެ ފުރުސަތު ހުޅުވާލައިފި

މޯލްޑިވްސް ބޯޓިންގް އެވޯޑްސްގެ ނޮމިނޭޝަނަށް ކުރިމަތިލުމުގެ ފުރުސަތު ހުޅުވާލައިފިއެވެ.

މޯލްޑިވްސް ބޯޓިންގް އެވޯޑްސްއަކީ ލިވްއަބޯޑް އެސޯސިއޭޝަން އޮފް މޯލްޑިވްސްގެ ފަރާތުން އިސްނަގައިގެން ކަނޑުދަތުރު ފަތުރުގެ އިންޑަސްޓްރީގެ ހަރަކާތްތެރިވާ ފަރާތްތަކަށް ހިތްވަރުދީ އެ އިންޑަސްޓްރީ ކުރިއެރުވުމަށްގެ މަޤްސަދުގައި 2014 ވަނަ އަހަރުން ފެށިގެން ދެމުން އަންނަ އެވޯޑެކެވެ.

ޖުމްލަ 26 ކެޓަގަރީއަކަށް ކުރިމަތިލުމުގެ ފުރުސަތު ހުޅުވާލާފައި ވަނީ ނޮވެމްބަރު 5 ވަނަ ދުވަހާ ހަމައަށެވެ. ބޯޓިންގް އެވޯޑްސްއަށް ހުށަހަޅާ ފަރާތްތަކަށް އޮންލައިންކޮށް އަދި އެސްއެމްއެސް މެދުވެރިކޮށް ވޯޓުލުމަށް ނޮވެމްބަރު 5 ވަނަ ދުވަހުން ފެށިގެން ޑިސެމްބަރު 5 ވަނަ ދުވަހަށް ހުޅުވާލާނެއެވެ.

މިދިޔަ އަހަރު މޯލްޑިވްސް ބޯޓިންގް އެވޯޑްސްގެ ލައިފް ޓައިމް އެޗީވްމަންޓް އެވޯޑް ލިބުނީ އަހްމަދު ޒުބައިރު އާދަމްއަށެވެ. މިދިޔަ އަހަރު ތަފާތު 21 ކެޓަގަރީއަކުން އެވޯޑުތައް ވަނީ ހަވާލު ކޮށްފައެވެ. އެގޮތުން ލިވްއަބޯޑް ކެޕްޓަން އޮފް ދަ އިޔަރ އެވޯޑާއި ސާފް ގައިޑް އޮފް ދަ އިޔަރގެ އެވޯޑާއި ލައިފް ޓައިމް އެޗީވްމަންޓް އެވޯޑް ތިން މީހަކަށް ލިބިފައިވާއިރު ބާކީ 18 އެވޯޑު ލިބިފައިވަނީ ޕްރައިވެޓް ކުންފުނިތަކަށެވެ.

މޯލްޑިވްސް ބޯޓިންގް އެވޯޑު މިދިޔަ އަހަރު ދީފައި ވަނީ، އޮންލައިން ވޯޓިންގެ 40 އިންސައްތަ އާއި ޖަޖުންގެ 60 އިންސައްތަ މާރކްސްއާ އެކުގައެވެ.

މީގެ އިތުރުން އެ ހަފްލާގެ ތެރެއިން މިދިޔަ އަހަރުގެ އެވޯޑް ހަފްލާގައި ސްޕޮންސަރުންނާއި އަދި ޕާޓްނަރުންނަށް ވަނީ ހަނދާނީ ފިލާ އަރުވާފައެވެ.