ކޮވިޑް-19 އަށް އެސްޓްރަޒެނިކާއިން އުފައްދާ ވެކްސިން ރިވިއުކުރުން އިނގިރޭސިވިލާތުން އަވަސްކުރަނީ

އެސްޓްރަޒެނިކާ އިން ކޮވިޑް-19 އަށް އުފައްދަމުން އަންނަ ވެކްސިން އިނގިރޭސިވިލާތުގެ ހެލްތު ރެގިއުލޭޓަރ އިން ރިވިއު ކުރަމުންދާ ކުރުން އަވަސްކޮށްފި އެވެ.

އެކަމާއި ގުޅިގެން އެސްޓްރަޒެނިކާއިން ބުނީ އިނގިރޭސިވިލާތުގެ މެޑިސިންސް އެންޑް ހެލްތުކެއަރ ޕްރޮޑަކްޓްސް ރެގިއުލޭޓަރީ އެޖެންސީ(އެމްއެޗްއާރުއޭ) ން އެމީހުން ކޮވިޑް-19 އަށް އުފައްދަމުން އަންނަ ވެކްސިން ރިވިއުކުރަމުން އަންނަ ކަމަށެވެ. މިރިވިއުގެ ތެރޭގައި އެމްއެޗްއާރުއޭ އަށް ކްލިނިކަލް ޑާޓާތައް ވަގުތުން ބަލާލެވޭނެ އެވެ. އަދި ވެކްސިން އުފައްދާ ފަރާތްތަކާއެކު ވެކްސިން އުފެއްދުމުގެ މަސައްކަތް ކުރަމުންދާ ގޮތާއި ގުޅޭގޮތުން ވާހަކަ ދައްކާނެ އެވެ. މިކަންކަމަށް ބެލުމަށްފަހު ވެކްސިން ބޭނުންކުރުމުގެ ހުއްދަދިނުމުގެ ކަންކަން އަވަސްކުރެވިގެންދާނެ އެވެ.

މިއީ ޕަބްލިކް ހެލްތު އެމަރޖެންސީގައި ބޭނުންވާ ޑްރަގްސް އާއި ވެކްސިންގެ ކަންކަން އަވަސްކުރުމަށް ކުރާކަމެކެވެ.

އެސްޓްރަޒެނިކާއިން ކޮވިޑް-19 އަށް ވެކްސިން އުފައްދަމުން އަންނަނީ އޮކްސްފޯރޑް ޔުނިވަރސިޓީއާ ގުޅިގެންނެވެ. މީޑިއާ ރިޕޯޓްތައް ބުނާގޮތުގައި އެމްއެޗްއާރުއޭ އިން އަންނަނީ ފިޒަރ އިން ކޮވިޑް-19 އަށް އުފައްދަމުން އަންނަ ވެކްސިން ރިވިއު ކުރުންވެސް އަވަސްކުރަމުންނެވެ.

ކޮވިޑް-19 އަށް ވެކްސިން އުފެއްދުމުގައި ކުރީގައި އުޅޭ ކުންފުނިތަކުގެ ތެރޭގައި ހިމެނެނީ އެސްޓްރަޒެނިކާ، ފިޒަރ، ޖޯންސަން އެންޑް ޖޯންސަން އަދި މޮޑާނާ އެވެ. މިކުންފުނިތަކުން އުފައްދަމުން އަންނަ ވެކްސިންތައް މިހާރު އުޅެނީ އެންމެ ފަހު ޓްރެއަލް ގައެވެ. އަދި ކުރިއަށް އޮތް ހަފްތާތަކުގައި މިވެކްސިންތަކުގެ ޑާޓާތައް ލިބޭވަރުވާނެ ކަމަށް ބެލެވެއެވެ.

އެސްޓްރަޒެނިކާއިން ބުނީ އެކުންފުނިން ކޮވިޑް-19 އަށް އުފައްދަމުން އަންނަ ވެކްސިންގައި އުމުރުން ހަގު މީހުންނާއި ދުވަސްވީ މީހުންގެ ހަށިގަނޑުންވެސް ވައިރަސްއާ ދެކޮޅަށް ދިފާއީ ނިޒާމު މަސައްކަތްކުރެއެވެ.

އޮކްސްފޯރޑް ޔުނިވަރސިޓީ އާއި ގުޅިގެން އެސްޓްރަޒެނިކާއިން ކޮވިޑް-19 އަށް ވެކްސިން އުފައްދަން ފަށާފައިވަނީ މިއަހަރުގެ ޖެނުއަރީ މަހުއެވެ.