ރޮހިންޖާ މުސްލިމުންގެ މައްސަލައިގައި އުފައްދާފައިވާ ޕެނަލް އިން އެމެރިކާގެ ތަޖުރިބާކާރު ޑިޕްލޮމެޓް އިސްތިއުފާ ދެއްވައިފި

މިޔަންމާގެ ރޮހިންޖާ މުސްލިމުންގެ މައްސަލައިގައި މިޔަންމާގެ ލީޑަރު އަން ސަން ސޫޗީ އަށް ލަފާދެއްވުމަށް އުފައްދަވާފައިވާ ޕެނަލް އިން އެމެރިކާގެ ތަޖުރިބާކާރު ޑިޕްލޮމެޓް ބިލް ރިޗަޑްސަން އިސްތިއުފާ ދެއްވައިފިއެވެ.

ރިޗަޑްސަން އިސްތިއުފާދެއްވީ ރޮހިންޖާ މުސްލިމުންގެ މައްސަލާގައި އުފައްދަވާފައިވާ ޕެނަލް އިން "ހަގީގަތް ފޮރުވަން އުޅޭ ކަމަށް" ތުހުމަތުކޮށް އަދި "ސޫޗީގެ ކިބައިގައި ލީޑާރޝިޕް ނެތް" ކަމަށް ބުނެއެވެ. ރޮއިޓާސް އަށް ރިޗަޑްސަން ވިދާޅުވެފައި ވަނީ މިޔަންމާގެ ސަރުކާރަށް "ވާގިވެރިވާ މީހަކަށް ވާން" އޭނާ ބޭނުން ނުވާ ކަމަށެވެ.

ސޫޗީގެ ގާތް ރަހްމަތްތެރި ބޭފުޅެއް ކަމަށްވާ ރިޗަޑްސަން ވިދާޅުވެފައި ވަނީ މިޔަންމާގައި ޝަރީއަތް ކުރެވެމުންދާ ރޮއިޓާސްގެ ދެ ރިޕޯޓަރުންގެ ވާހަކަ މިޔަންމާގެ ސޫޗީއާ ހިއްސާ ކުރެއްވުމުން، އެކަމާ ވެސް އެކަމަނާ "ހިތްޕުޅުހަމަޖެހިވަޑައި ނުގެންނެވި" ކަމަށެވެ.

ބިލް ރިޗަޑްސަންގެ ވާހަކައާ ގުޅިގެން މިޔަންމާ އިން ބުނެފައި ވަނީ "މިޔަންމާގެ ލީޑަރާ މެދު އޭނާ ގުންގުޅެނީ ޒާތީ ގޮތްތަކެއް،" ކަމަށެވެ.

މިޔަންމާގެ އަސްކަރިއްޔާ އިން ރޮހިންޖާ މުސްލިމުންނާ ދެކޮޅަށް ހިންގަމުންދާ ލާއިންސާނީ އަމަލުތަކާ ހެދި އެގައުމަށް ވަނީ ވަރަށް ބޮޑަށް ފާޑުކިޔުން އަމާޒުވެފައެވެ. މިޔަންމާގައި 1.1 މިލިއަން ރޮހިންޖާ މުސްލިމުން އުޅެއެވެ. ގާތްގަނޑަކަށް އެހުރިހާ ރޮހިންޖާ މުސްލިމުން ދިރިއުޅެނީ މިޔަންމާގެ ހުޅަނގު އައްސޭރިފަށުގެ ސްޓޭޓެއް ކަމަށްވާ ރަކައިން ސްޓޭޓުގައެވެ. މިދިޔަ އަހަރު ރޮހިންޖާ މުސްލިމުންނާ ދެކޮޅަށް އަސްކަރިއްޔާ އިން ހިންގި އޮޕަރޭޝަނެއްގައި އެކަނި ވެސް 65000 އަށް ވުރެ ގިނަ ރޮހިންޖާ މުސްލިމުން އަަވަށްޓެރި ބަންގްލަދޭޝްއަށް ހިޖުރަކުރިއެވެ.