އައިންތުގެ ޓެކްސީއަށް ގެއްލުންދޭތީ، މަޖިލީހަށް ކުއްލި މައްސަލައެއް
2 ނޮވެމްބަރު 2020 | ހޯމަ 03:12އައިންތުގެ ޓެކްސީއަށް ގެއްލުންދޭ މައްސަލަ މަޖިލީހުން ބަލަން އެޖެންޑާކޮށްފައި ވަނީ ހޯމަ ދުވަހަށް
އައިމިނަތު ވަހީދާ ދުއްވަމުން އަންނަ ޓެކްސީއަށް ބަޔަކު މީހުން ގެއްލުންދީފަ
މާލޭގައި ޓެކްސީ ކުރަމުންދާ ހަމައެކަނި އަންހެން ޑްރައިވަރު ކަމަށްވާ އައިމިނަތު ވަހީދާގެ ޓެކްސީއަށް އެކި ފަހަރު މަތިން ގެއްލުންދީފައިވާތީ އެކަމާ ގުޅޭ ކުއްލި މައްސަލައެއް ހޯމަ ދުވަހު އޮންނަ ރައްޔިތުންގެ މަޖިލީހަށް އެޖެންޑާ ކޮށްފިއެވެ.
އައިންތުގެ ޓެކްސީއަށް ފަސް ފަހަރެއްގެ މަތިން ގެއްލުންދީ ބިއްލޫރިގަނޑު ތަޅާލާފައިވުމާ ގުޅިގެން އޭނާ ވަނީ އެކަން ސޯޝަލް މީޑިއާގައި ހިއްސާކޮށްފައެވެ. އެގޮތުން އެންމެ ފަހުން އޮކްޓޫބަރު މަހުގެ 27 ވަނަ ދުވަހު އޭނާގެ ކާރު ބިއްލޫރިގަނޑު ތަޅާލުމާއި ގުޅިގެން ޔޫތު މިނިސްޓަރު އަހުމަދު މަހުލޫފު ވަނީ އޭނާއަށް އެހީތެރިކަން ފޯރުކޮށްދީފައެވެ.
އައިންތުގެ ކާރަށް ތަކުރާރުކޮށް ގެއްލުންދޭ މައްސަލަ އާއި ގުޅިގެން ރައްޔިތުންގެ މަޖިލީހަށް ކުއްލި މައްސަލައެއް އެޖެންޑާކޮށްފައި މިވަނީ އެމްޑީޕީގެ ޕާލިމެންޓަރީ ގްރޫޕްގެ ލީޑަރު އަދި މެދު ހެންވޭރު ދާއިރާގެ މެމްބަރު އަލީ އާޒިމްއެވެ.
އެ މައްސަލަ ހުށަހެޅީ އެކިފަހަރު މަތިން އައިންތުއަށް ފުރައްސާރަކުރަމުންދާތީ އާއި ތަކުރާރުކޮށް އެކި ފަހަރުމަތިން އޭނާގެ ކާރަށް ގެއްލުންދޭތީ ކަމަށް އާޒިމް ހުށަހެޅުއްވި މައްސަލައިގައި ވަނީ ބުނެފައެވެ. އެ އަމަލުތަކަކީ ވަރަށް ދަށު ދަރަޖައިގެ އަމަލެއް ކަމަށާއި، އެ އަމަލުގެ ސަބަބުން އާމްދަނީ ހޯދުމަށް އައިންތު ކުރާ މަސައްކަތަށް ހުރަސް އެޅިފައިވާ ކަމަށްވެސް ކުއްލި މައްސަލާގައި ފާހަގަކޮށްފައިވެއެވެ.
އެހެންކަމުން އާމްދަނީ ހޯދުމަށް އަންހެނުން ކުރާ އެފަދަ މަސައްކަތަށް ހިތްވަރު ދިނުމަށް ކުއްލި މައްސަލާގައި ގޮވާލާފައިވެއެވެ.
އައިންތުގެ ކާރަށް ގެއްލުންދޭ މައްސަލައާއި ގުޅިގެން "ރާއްޖެއެމްވީ" އަށް މައުލޫމާތު ދެއްވަމުން މަހުލޫފު ވިދާޅުވީ މި މައްސަލަ މިހާރު ފުލުސް ކޮމިޝަނަރ އަދި ޖެންޑާ މިނިސްޓްރީ އާއި ހަމައަށް ވެސް ގެންގޮސްފައި ކަމަށެވެ.
މިނިސްޓަރު ވިދާޅުވީ، މިކަން ކުރާ ބަޔަކު އިނގޭ ކަމަށާއި މިކަމަކީ ވަރަށް ދަށު ދަރަޖައިގެ އަމަލެއް ކަމަށެވެ. އަދި އައިންތުގެ ކާރަށް ގެންލުން ދެމުންދާ މީހާ ވަރަށް އަވަހަށް އިންސާފުގެ ކުރިމައްޗަށް ގެނެސް ހައްގު އަދަބު ލިބޭނެ ކަމަށް މިނިސްޓަރ ވިދާޅުވިއެވެ.
