އާދީއްތަ ދުވަހުން ފެށިގެން ދުނިޔޭގެ އެކި ކަންކޮޅުތަކުގެ މީހުންނަށް އުމްރާއަށް ދިއުމުގެ ފުރުސަތު ހުޅުވާލުމަށް ސައުދީ އަރަބިއްޔާއިން ނިންމައިފިއެވެ.

ސައުދީގެ ހައްޖު އެންޑް އުމްރާ މިނިސްޓްރީއާއި ހަވާލާދީ އެގަމުގެ ނޫސްތަކުގައި ރިޕޯޓުކޮށްފައިވާ ގޮތުން، އުމްރާއަށް ދާ ކޮންމެ މީހެއްގެ އަތުގައިވެސް އެގައުމަށް ދިއުމުގެ ކުރިން 72 ގަޑީއިރު ވެފައި ނުވާ ޕީސީއާރް ޓެސްޓެއް އޮންނަން ޖެހެއެވެ. އަދި ކޮވިޑް ނެތް ކަމުގެ ލިޔުމެއް އަތުގައި އޮތުމާއެކު އުމްރާއަށްދާ ކޮންމެ މީހެއްވެސް ވެސް ތިން ދުވަހު ކަރަންޓީނު ވާންޖެހެއެވެ. އަދި، ހަރަމްފުޅަށް ވަނުމުގެ ކުރިން ހާއްސަ ހުއްދައެއް ވެސް ނަގަން ޖެހެއެވެ.

މިނިސްޓްރީ އޮފް ހައްޖު އެންޑް އުމްރާއިން ކަނޑައަޅާފައިވަ އުސޫލުގައި ވާގޮތުން، ސައުދީ ފިޔަވައި އެހެން ގައުމުތަކުން އުމްރާއަށް އާދެވޭނީ 18 އަހަރާއި 50 އަހަރާއި ދެމެދުގެ މީހުންނަށެވެ. އަދި، އެއްވެސް ޖަމާއަތަކާއި ނުގުޅި އުމްރާއަށް ނުދެވޭއިރު ހުއްދަ ދިނުމަށް ހަމަޖެހިފައިވަނީ 50 މީހުން ހަމަނުވާ ޖަމާއަތްތަކަށް އެކަންޏެވެ.

ބުރާސްފަތި ދުވަހު އެގައުމުގެ ހެލްތް މިނިސްޓްރީއިން ބުނީ ކޮވިޑްގެ 435 އައު ކޭސް ރިޕޯޓު ކޮށްފައި ވާކަމަށެވެ. އެއާއެކު އެގައުމުގައި ކޮވިޑް ޖެހުނު މީހުންގެ އަދަދު 346،482 (ތިން ލައްކަ ސާޅިސް ހަހާސް ހަތަރުސްތޭކަ އަށްޑިހަ ދޭއް) އަށް އަރާފައެވެ. ކޮވިޑް–19 ގައި އެގައުމުން މަރުވެފައިވަނީ 5،363 (ފަސްހާސް ތިންސަތޭކަ ފަސްދޮޅަސް ތިން) މީހުންނެވެ.

ދުނިޔޭގައި ކޮވިޑް–19 ގެ ބަލިމަޑުކަން ފެތުރުމާއެކު މައްކާގެ ހަރަމްފުޅު ބަންދުކުރުމަށްފަހު ހަތް މަސް ދުވަސްފަހުން ހަރަމްފުޅު ހުޅުވާލީ އޮކްޓޯބަރ މަހުގެ ހަތަރުވަނަ ދުވަހު ހަމައެކަނި އެގައުމުގައި އުޅޭ ފަރާތްކަށެވެ.