ޑިމޮކްރަސީ ހަރުދަނާކުރުމަށް އެމެރިކާއިން ލަންކާއަށް 14 މިލިއަން ޑޮލަރު ދީފި

ލަންކާގެ ޑިމޮކްރަސީ އިތުރަށް ހަރުދަނާކުރުމަށް އެމެރިކާއިން 14 މިލިއަން ޑޮލަރުގެ އެހީއެއް ދީފިއެވެ.

ލަންކާގެ ޤާނޫނު ހަދާ މަޖިލީހުގެ ރައީސް ކަރޫ ޖަޔަސޫރިޔާ ދާދިފަހުން އެމެރިކާއަށް ކުރެއްވި ދަތުރުފުޅަކަށް ފަހު ވިދާޅުވީ އެމެރިކާގެ މި އެހީއަކީ ލަންކާގެ ޤާނޫނު ހަދާ މަޖިލީހުގެ މެމްބަރުންގެ ޤާބިލްކަން އިތުރުކުރުމަށާއި، ޤާނޫނު ހަދާ މަޖިލީހުގެ ކޮމިޓީތަކުގެ ހިންގުމުގެ ނިޒާމް ހަރުދަނާކުރުމަށް އެމެރިކާއިން ދިން އެހީއެއް ކަމަށެވެ. އަދި ލަންކާގެ ސިޔާސީ މަސްރަހަށް އިސްލާހީ ބަދަލުތަކެއް އަންނަމުންދާ މި ދަނޑިވަޅުގައި ޤާނޫނު ހަދާ މަޖިލީހުގެ ހިންގާ ޤަވާޢިދު އިސްލާހުކުރުމުގެ މަސައްކަތް ވެސް ކުރަމުން އަންނަ ކަމަށް ޖަޔަސޫރިޔާ ވިދާޅުވިއެވެ.

މި ދުވަސްވަރަކީ ލަންކާގެ ޤާނޫނު އަސާސީ އިސްލާހުކުރުގެ މަސައްކަތާއި، އިންތިޚާބާ ބެހޭ މަސައްކަތްތަކެއް ޤާނޫނު ހަދާ މަޖިލިސް ތެރެއިން ކުރެވެމުން އަންނަ ދުވަސްވަރެކެވެ.

ލަންކާގެ ޤާނޫނު ހަދާ މަޖިލީހުގައ 225 މެމްބަރުން ތިއްބަވައެވެ.