އިނގިރޭސިވިލާތުގެ އިމިގްރޭޝަން އުޞޫލުތަކަށް ގެނައި ބަދަލުތަކުގެ ސަބަބުން އަސަރުކޮށްފައިވާ އެންމެންނަށް އިންސާފު ހޯއްދަވައި ދެއްވާނެ ކަމަށް އެޤައުމުގެ ދާޚިލީ ވަޒީރުކަމާ އަލަށް ޙަވާލުވެވަޑައިގަތް ސާޖިދު ޖާވިދު ވިދާޅުވެއްޖެއެވެ.

ޖާވިދު އިނގިރޭސި ދާޚިލީ ވަޒީރުކަމާ ހޯމަ ދުވަހު ހަވާލުވެވަޑައިގަތީ އެމަޤާމުގައި ހުންނެވި އެމްބަރ ރަޑް އިސްތިއުފާ ދެއްވުމާ ގުޅިގެންނެވެ. އެމްބަރ ރަޑް އިސްތިއުފާ ދެއްވީ އިނގިރޭސިވިލާތަށް 1940ގެ އަހަރުތަކުން ފެށިގެން 1970ގެ އަހަރުތަކާ ދެމެދު ހިޖުރަކޮށްފައިވާ ފަރާތްތަކުގެ ތެރެއިން ލިޔެކިޔުން ނެތް ފަރާތްތައް ޑީޕޯޓްކުރުމަށް އިނގިރޭސިވިލާތުން ގެންގުޅެން ފެށި ސިޔާސަތުގެ ސަބަބުން ކުރިމަތިިވި ޕްރެޝަރުތަކުގެ ސަބަބުންނާއި، އެމައްސަލައިގައި ޤާނޫނު ހަދާ މަޖިލީހަށް އެކަމަނާ އޮޅުވާލެއްވި ކަމަށް ތުހުމަތުކުރެވެން ފެށުމުންނެވެ. 

އިނގިރޭސި ޤާނޫނު ހަދާ މަޖިލީހުގައި ވާހަކަ ދައްކަވަމުން، ބައިމަދު ދަރިކޮޅަކަށް ނިސްބަތްވާ އިނގިރޭސި ފުރަތަމަ ދާޚިލީ ވަޒީރު ޖާވިދު ވިދާޅުވީ އިނގިރޭސިވިލާތަކީ އެޤައުމަށް ހިޖުރަކޮށްފައިވާ މީހުންނަށް ނުރައްކާތެރި މާހައުލެއް އޮތް ޤައުމެއް ކަމަށް ބަޔަކު މީހުން ބުންޏަސް އެއީ ހަޤީގަތެއް ނޫން ކަމަށެވެ. އެހެން ނަމަވެސް އެޤައުމަކީ އެޤައުމަށް ހިޖުރަކޮށްފައި ތިބި ބައެއް ފަރާތްތަކަށް 'އެހީތެރިކަން ކުޑަ' ޤައުމެކޭ ބުނެވިދާނެ ކަމަށެވެ. 

އިނގިރޭސިވިލާތުގެ ސިޔާސީ މަސްރަހު ހޫނުވެފައި ވަނީ އެޤައުމަށް 1948 ވަނަ އަހަރާއި 1971 ދެމެދު ކޮމަންވެލްތު ޤައުމުތަކުން ހިޖުރަކުރި ފަރާތްތަކުގެ ތެރެއިން ލިޔެކިޔުން ނެތް ފަރާތްތަކަށް ހިލޭ ސިއްހީ ފަރުވާ ފޯރުކޮށްދިނުން ހުއްޓާލައި، އެމީހުން ޑީޕޯޓްކޮށްލާނެކަމުގެ ބިރު ހީވުމުންނެވެ. 'ވިންޑްރަޝް ޖެނެރޭޝަން'ގެ ނަމުން މަޝްހޫރު އެމީހުންނަކީ ކޮމަންވެލްތު ޤައުމުތަކުގެ މެދުގައި ހުޅުވާލެވިފައިވާ ސިޔާސަތެއްގެ ދަށުން މީހުންނަށް ހުރަހެއް ނެތި ދަތުރުކުރެވުނު ޒަމާނުގައި އިނގިރޭސިވިލާތަށް ހިޖުރަކުރި މީހުންނެވެ. އެމީހުންގެ ލިޔެކިޔުންތައް ރަސްމީކޮށް އެޤައުމުން ބަލަހައްޓާފައިނުވާއިރު، ހިޖުރަކުރި ބައެއް މީހުންގެ އަތުގައި ޕާސްޕޯޓެއް ވެސް ނެތެވެ. 

އިނގިރޭސި ވިލާތުގައި 1971ވަނަ އަހަރު ފާސްކުރި އިމިގްރޭޝަން ޤާނޫނު ހުއްޓުމަކަށް އައުމާ އެކު ހިޖުރަކުރި މީހުން އިނގިރޭސިވިލާތުގައި އޭގެ ފަހުން ދާއިމަށް ދިރިއުޅެން ފެށިއެވެ. ވިންޑްރަޝް ޖެނެރޭޝަންގެ އާބާދީ ބައި މިލިއަނަށް އަރާނެ ކަމަށް ބެލެވެއެވެ.

މިމައްސަލަ ފެންމަތިވުމުން ވިންޑްރަޝް ޖެނެރޭޝަންގެ މީހުން އިނގިރޭސިވިލާތަށް ހިޖުރަކުރިއިރު އެމީހުން ފުރާފައިވާ 'ލޭންޑިންގ ކާޑު'ތައް 2009 ވަނަ އަހަރު ނައްތާލާފައި ވާކަމަށް މިދިޔަ އެޕްރީލް މަހުގެ 18 ވަނަ ދުވަހު ބޮޑުވަޒީރު ތެރީސާ މޭ ވަނީ ޤާނޫނު ހަދާ މަޖިލީހުގައި ވިދާޅުވެފައެވެ. އޭރު ވެރިކަމުގައި އޮތީ މިހާރު އިދިކޮޅުގައި އޮތް ލޭބަރ ޕާޓީއެވެ.