ކެލާ ޔޫތް ފޯރަމާއި ހޯރަފުށީ ކައުންސިލް ގުޅިގެން އެއަރޕޯޓްގައި ގަސް އިންދުމުގެ ޕްރޮގްރާމެއް ކުރިއަށް ގެންގޮސްފި
31 އޮކްޓޯބަރު 2020 | ހޮނިހިރު 08:31މިއަދު ވެސް 200 އެއްހާ ގަސް ހޯރަފުށީ އެއަރޕޯޓްގައި އިންދާފައިވޭ، މީގެކުރިންވެސް އެއަރޕޯޓް ފެހި ކުރުމުގެ ހަރަކާތްތަކެއް ހިންގާފައިވޭ
ހޯރަފުށި އެއަރޕޯޓުގައި ގަސް އިންދުމަށް ކެލާ ޔޫތް ފޯރަމްއިން ގަސް ހަދިޔާ ކުރަނީ
ހއ. ކެލާ ޔޫތް ފޯރަމާއި ހއ. ހޯރަފުށީ ކައުންސިލް ގުޅިގެން ހޯރަފުށީ އެއަރޕޯޓުގައި ގަސް އިންދުމުގެ ހަރަކާތެއް ބާއްވައިފި އެވެ.
ކެލާ ޔޫތް ފޯމަރަމްގެ ރައީސް އާމިރު އުސްމާނު "ރާއްޖެއެމްވީ" އަށް ވިދާޅުވީ، ހޮނިހިރު ދުވަހު ކުރިއަށް ގެންދިޔަ އެ ހަރަކާތުގައި ރައްޔިތުންގެ މަޖިލީހުގެ ހޯރަފުށި ދާއިރާގެ މެމްބަރު އަހުމަދު ސަލީމް އާއި ހޯރަފުށި ކައުންސިލް މެމްބަރުންގެ އިތުރުން ކެލާ ޔޫތް ފޯރަމްގެ އިސްވެރިން ބައިވެރިވި ކަމަށެވެ.
އާމިރު ވިދާޅުވީ، ގާތްގަނޑަކަށް 200 އެއްހާ ގަސް ހަދިޔާ ކޮށްފައިވާއިރު، ގަސް އިންދުމުގެ އެ ހަރަކާތްވެސް އެއަރޕޯޓްގައި ކުރިއަށް ގެންދިޔަ ކަމަށެވެ. ހަދިޔާކުރި ގަސްތަކުގެ ބާވަތްތަކުގެ ތެރޭގައި ދިވެހި ރުކާއި ފެންފޯއްރުއް، ދިއްގާ، ކާނި، އަދި ނިކަ ފަދަ ގަސްތައް ހިމެނޭ ކަމަށެވެ.
އާމިރު ވިދާޅުވީ، ކުރިއަށް އޮތް ތަނުގައި ވެސް، ގަސް ހަދިޔާކުރުމުގެ ހަރަކާތްތަކެއް ހިންގުމަށް ރާވާފައިވާ ކަމަށެވެ.
ހޯރަފުށީ އެއަރޕޯޓް ފެހި ކުރުމުގެ ހަރަކާތްތައް މީގެކުރިން ވެސް ކުރިއަށް ގެންގޮސްފައި ވެއެެވެ.
ހޯރަފުށީ އެއަރޕޯޓުގައި އެއް ލައްކަ ގަސް އިންދުމުގެ ޕްރޮގުރާމު ފަށާފައިވަނީ 7 ޖެނުއަރީ 2020 ގައެވެ. "ހޯރަފުށި އެއަރޕޯޓު ފެހި ކުރުން، އަހަރުމެން އެންމެންގެ ޒިންމާ" މި ޝިއާރުގެ ދަށުން ކުރިއަށްދާ މި ހަރަކާތަށް ރަށުގެ ރައްޔިތުންގެ ފަރާތުން ބޮޑު އެއްބާރުލުމެއް ލިބެ އެވެ. ހޯރަފުށި ދާއިރާގެ މެންބަރު އަޙްމަދު ސަލީމާއި އެރަށު ކައުންސިލްގެ އިސްނެންގެވުމުގެ މަތިން ކުރިއަށް ގެންދާ މި ހަރަކާތަށް ހޯރަފުށި ކައުންސިލާއި، މުއައްސަސާތަކާއި ކުންފުނިތަކާއި، ރަށުގެ ރައްޔިތުންގެ ފަރާތުން ބޮޑު އެއްބާރުލުމެއް ލިބެ އެވެ. ރަށުގެ ރައްޔިތުން ގުޅިގެން ކުރިއަށް ގެންދާ މި ހަރަކާތަށް ބޮޑު އެއްބާރުލުމެއް ލިބިގެން ގޮސްފައިވާއިރު، އަތޮޅުގެ އެހެން ރަށްރަށުން ވެސް ގަސް ހަދިޔާކޮށްފައިވާ ކަން ފާހަގަކުރެވެ އެވެ.
ހޯރަފުށީގައި ސަރުކާރުން ތަރައްޤީ ކުރަމުން ގެންދާ އެއާޕޯޓަށް ބޭނުންވާނޭ ކަރަންޓް ފޯރުކޮށްދެވޭނެ ނިޒާމެއް ފެނަކައިން ޤާއިމުކޮށް ކަރަންޓްގެ ހިދުމަތް ދޭން ވަނީ ފަށާފަ އެވެ.
ހޯރަފުށީ އެއާޕޯޓް ނޮވެމްބަރު 8 ގައި ނިންމައި 11 ވަނަ ދުވަހު ހުޅުވުމަށްޓަކައި އެމްޓީސީސީން ދަނީ 24 ގަޑިއިރުގައި މެދުނުކެނޑި މަސައްކަތް ކުރަމުންނެވެ.
