ކުރިން ވޯޓުލުމުގެ މަރުހަލާގައި އެމެރިކާގެ 85 މިލިއަނަށްވުރެ ގިނަ މީހުން ވޯޓުލައިފި
2016 ވަނަ އަހަރާއި އަޅާބަލާއިރު އެމެރިކާގެ ހުރިހާ ސަރަހައްދު ތަކެއްގައިވެސް މިއަހަރު އަންނަނީ ގިނައިން ވޯޓުލާން މީހުން ނިކުންނަމުން
ވޯޓުލުމަށްފަހު މީހަކު އަތް ސެނެޓައިޒް ކުރަނީ
އެމެރިކާގެ ރިޔާސީ އިންތިޚާބު ބާއްވަން ހަތަރު ދުވަހަށް ވެފައިވާއިރު ކުރިން ވޯޓުލުމުގެ މަރުހަލާގެ ދަށުން 85 މިލިއަނަށްވުރެ ގިނަ މީހުން ވޯޓުލައިފި އެވެ.
މީގެތެރޭގައި ޓެކްސަސްގެ 9 މިލިއަން މީހުން ހިމެނޭއިރު މިއަދަދާއެކު ޓެކްސަސް ވެގެން ގޮސްފައިމިވަނީ 2016 ވަނަ އަހަރުގެ އިންތިޚާބުގައި އެސްޓޭޓުން ވޯޓުލާން ނިކުތް މީހުންނަށްވުރެ ގިނައިން ވޯޓުލާން މިއަހަރު މީހުން ނިކުތް ސްޓޭޓަކަށެވެ. މީގެކުރިން މިރިކޯޑް ގާއިމުކުރި ސްޓޭޓަކީ ހަވާއީ އެވެ.
ޔުނިވަރސިޓީ އޮފް ފްލޮރިޑާގެ ޔޫއެސް އިލެކްޝަން ޕްރޮޖެކްޓުން ދައްކާގޮތުގައި 2016 ވަނަ އަހަރާއި އަޅާބަލާއިރު އެމެރިކާގެ ހުރިހާ ސަރަހައްދު ތަކެއްގައިވެސް މިއަހަރު އަންނަނީ ގިނައިން ވޯޓުލާން މީހުން ނިކުންނަމުންނެވެ.
ކުރިން އަންދާޒާކުރި ވަރަށްވުރެ ގިނަ ބަޔަކު ކުރިން ވޯޓުލުމުގެ މަރުހަލާގެ ދަށުން ވޯޓުލާން ނިކުންނަމުން ދިއުމާއެކު އިންތިޚާބުގައި ވާދަކުރައްވާ ރިޕަބްލިކަން ކެންޑިޑޭޓް، އެމެރިކާގެ ރައީސް ޑޮނަލްޑް ޓްރަމްޕާއި ޑިމޮކްރަޓިކް ކެންޑިޑޭޓް ޖޯ ބައިޑަން އާއި ދެމެދު އޮތް ވާދަވެރިކަން ހާމައެވެ. މީގެއިތުރުން އެމެރިކާގައި ހަލުވިކަމާއެކު ކޮވިޑް-19 ފެތުރެމުންދާތީ ގިނައިން މީހުން އެއްވާ ތަންތަނަށްނުގޮސް ވައިރަސް އަށް ހުށަހެޅުމުން ރައްކާތެރިވުމަށް ގިނަ ބަޔަކު އެގޮތަށް އަމަލުކުރަނީ ކަމަށްވެސް ބެލެވެ އެވެ.
ކުރިން ވޯޓުލުމުގެ މަރުހަލާގެ ދަށުން ގިނަ ސްޓޭޓްތަކެއްގައި ވޯޓުލުމަށް އޮތް އެންމެ ފަހު ދުވަހަކީ ހުކުރު ދުވަހު އެވެ. ހުކުރާ ދުވަހާ ހަމައަށް ކުރިން ވޯޓުލުމުގެ މަރުހަލާގެ ދަށުން 2016 ވަނަ އަހަރުގެ ރިޔާސީ އިންތިޚާބުގައި ވޯޓުލީ މީހުންނަށްވުރެ އިތުރަށް 20 މިލިއަން މީހުން ވަނީ ވޯޓުލާފައެވެ.
ޓެކްސަސް އަކީ 1976 ވަނަ އަހަރުން ފެށިގެން ޑިމޮކްރަޓިކް ކެންޑިޑޭޓަކަށް އިންތިޚާބުގެ ނަތީޖާ ބުރަވެފައިވާ ސްޓޭޓެއް ނޫނެވެ. އެހެންނަމަވެސް ޕޯލްތަކުން ދައްކާގޮތުގައި ކުރިން ވޯޓުލީ މީހުންގެ ކުރީގައި މިފަހަރު އުޅެނީ ބައިޑަން އެވެ.
