ކުރީގެ މެމްބަރު ނަޝީދުގެ މައްޗަށް 150،000 ޑޮލަރު ދެއްކުމަށް ކުރި ހުކުމް ހައިކޯޓުން ބާތިލް ކޮށްފި

ރައްޔިތުންގެ މަޖިލީހުގެ ކުުޅުދުއްފުށި ދެކުނު ދެކުނު ދާއިރާގެ ކުރީގެ މެމްބަރު އަދި ގާނޫނީ ވަކީލު މުހައްމަދު ނަޝީދުގެ މައްޗަށް 150،000 ޑޮލަރު ދެއްކުމަށް ސިވިލް ކޯޓުން ކުރި ހުކުމް ހައިކޯޓުން ބާތިލް ކޮށްފިއެވެ.

އިންޑިއާގެ ރައްޔިތެއް ކަމަށްވާ، ޑރ. އަލަކާ ސިންގްއަށް 150،000 ޑޮލަރު ދެއްކުމަށް ނަޝީދުގެ މައްޗަށް ސިވިލް ކޯޓުން ހުކުމް ކޮށްފައިވަނީ، 8 ނޮވެމްބަރު 2018 ވަނަ ދުވަހުއެވެ. އަދި ހުކުމް ކުރި ދުވަހުން ފެށިގެން 15 ދުވަހުގެ ތެރޭގައި ސިވިލް ކޯޓަށް ދެއްކުމަށް ވެސް އެހުކުމުގައި ބުނެފައިވެއެވެ.

ސިވިލް ކޯޓުގެ ހުކުމް ނަޝީދުގެ ފަރާތުން ހައިކޯޓުގައި އިސްތިއުނާފް ކޮށްފައިވަނީ 26 ނޮވެމްބަރު 2018 ވަނަ ދުވަހުއެވެ. މި މައްސަލާގައި 28 އޮކްޓޯބަރު 2020 ވަނަ ދުވަހު ހައިކޯޓުން ބުނެފައިވަނީ، ސިވިލް ކޯޓުގެ އެ ނިންމުމަށް ބަދަލު ގެންނަންޖެހޭ ކަމަށާއި އެ ހުކުމް ބާތިލްކަމަށް އެ މައްސަލަ ހައިކޯޓުގައި ބެއްލެވި ފަނޑިޔާރުންގެ އިއްތިފާގުން ނިންމާ ކަމަށެވެ.

މިމައްސަލައަކީ، ޑރ. އަލަކާ އިންވެސްޓް ކޮށްގެން ނަޝީދުގެ ނަމުގައި ރެޖިސްޓްރީ ކޮށްފައިއޮތް "ބަރުތީލަ" ކިޔާ ކަނޑު އުޅަނދު އަލަކާ ބޭނުންވި އަގަށް ވިއްކާލެވެން ނެތުމުން، އެ އަގަށް ވުރެ ކުޑަކޮށް، އެ ދުޅަނދު ވިއްކާލަންޖެހިފައި ވާތީ، އެ އުޅަނދަށް އިންވެސްޓް ކުރުމަށް އަލަކާ އެޑްވައިސްކޮށްފައި ވަނީ ނަޝީދު ކަމަށްވާތީ، އަލަކާއަށް ނަޝީދު ދިނުމަށް އަމިއްލައަށް ހުށަހެޅި 150،000 ޑޮލަރު ހޯދުމަށް ސިވިލް ކޯޓަށް ހުށަހެޅި މައްސަލަ އެކެވެ.

މި މައްސަލާގައި ހައިކޯޓުން ކޮށްފައިވާ ހުކުމުގައި ވަނީ، ދެ ފަރާތުގެ ދެމެދުގައި ބަދަލުކުރި އީމެއިލްތަކުގައި، އެ ފައިސާއާ ގުޅޭގޮތުން ނަޝީދު ދެކޭ ގޮތް އޮޅުން ނާރާގޮތަށް ޑރ. އަލަކާއަށް ސާފުކޮށްދީފައިވާ ކަމަށާއި އެ ފައިސާއަކީ ލާޒިމުވުމެއް ނެތި ދިނުމަށް ހުށަހަޅާފައިވާ ފައިސާއެއް ކަމަށް ނަޝީދު ބުނުމުން، އަލަކާ ސިންގް އެއްބަސްވެފައިވާ ކަމަށެވެ. އަދި އެ އީމެއިލްތައް ބަދަލުކުރެވުނު އިރު، އެ އުޅަނދު ވިއްކާލުމާ ގުޅޭގޮތުން، އަލަކާ އާއި ކްރިސްޓޮފް ޕީޓަ ގްރޯއާ ދެމެދު އެއްބަސްވުމެއް ވުޖޫދުވެފައި ނުވާ ކަމަށާއި އެ އުޅަނދުގެ މިލްކުވެރިކަން ބަދަލުކޮށްފައި ނެތުމުގެ ސަބަބުން، މި މުއާމަލާތް ނިމުމަކަށް ގެނައުމުގެ ފުރިހަމަ ބާރާއި އިހުތިޔާރު އަލަކާއަށް އެ ވަގުތު ލިބިފައި އޮތް ކަމަށްވެސް ހުކުމުގައިވެއެވެ.