މުސްލިމުންނަށް ފުރައްސާރަ ކޮށްގެން ހުޅަނގުން ބޭނުންވަނީ އަނެއްކާވެސް ހަނގުރާމަ ފަށަން: އުރުދުޣާން

ހުޅަނގުގެ ގައުމުތަކުން އިސްލާމް ދީނަށާއި މުސްލިމުންނަށް ފުރައްސާރަކޮށްގެން ބޭނުންވަނީ އަނެއްކާވެސް މުސްލިމުންނާއި ދެކޮޅަށް ހަނގުރާމަ ކުރަން ކަމަށް ތުރުކީގެ ރައީސް ތޮއްޔިބް އުރުދުޣާން ވިދާޅުވެއްޖެ އެވެ.

ކީރިތި ރަސޫލާ (ޞ) ގެ ކާޓޫން ކުރަހައި ކުލާސްރޫމެއްގެ ތެރޭގައި ތިބި ކުދިންނަށް ކާޓޫން ދެއްކުމާއި ގުޅިގެން އެމީހާ ވަނީ މަރާލާފައެވެ. މަގެއްގެ މަތިން އެމީހާ މަރާލާފައިވާއިރު ފްރާންސްގެ ސަރުކާރުގެ އިސް އޮފިޝަލުން އަންނަނީ ކީރިތި ރަސޫލާ(ޞ)ގެ ކާޓޫނު ކުރެހުމަށް ބާރު ލިބޭ ގޮތައް ވާހަކަ ދައްކަމުންނެވެ. އެއާއެކު ދުނިޔޭގެ އެކި ހިސާބުތަކުގައި ފްރާންސް އާއި ދެކޮޅަށް މުސްލިމުން ވަނީ އަޑުއުފުލަން ފަށާފައެވެ.

މިކަމުގައި ފްރާންސް އާއި ދެކޮޅަށް އެންމެ ފާޅުކަން ބޮޑު ގޮތެއްގައި ވާހަކަދައްކަވަމުން ގެންދަވާ މުސްލިމް ލީޑަރަކީ ތުރުކީގެ ރައީސް އުރުދުޣާން އެވެ. ބުދަ ދުވަހު އެގައުމުގެ ޤާނޫނު ހަދާ މަޖިލީހުގައި ވާހަކަ ދައްކަވަމުން އުރުދުޣާން ވިދާޅުވީ ކީރިތި ރަސޫލާ(ޞ) އަށް ފުރައްސާރަކުރާ ބަޔަކާދެކޮޅަށް ތެދުވުމަކީ ލިބޭ ފަހުރެއްކަމަށެވެ. އަދި މިކަމުގައި ތުރުކީން ދިގުދެމިގެންދާ ސިޔާސަތުތަކެއް ގެންގުޅެންޖެހޭ ކަމަށް އުރުދުޣާން ވަނީ ވިދާޅުވެފައެވެ.

މީގެއިތުރުން އުރުދުޣާން ވަނީ ތުރުކީވިލާތުން ފްރާންސްގެ ޕްރޮޑަކްޓްތައް ބޮއިކޮޓް ކުރަން ނިންމާފައިވާ ކަމަށް ވިދާޅުވެފައެވެ. އުރުދުޣާން ފާޅުގައި ފްރާންސަށާއި ފްރާންސްގެ ރައީސަށް ފާޑުވިދާޅުވެ ވާހަކަދައްކަވާތީ ކީރިތި ރަސޫލާ(ޞ) ގެ ކާޓޫން މީގެކުރިން ކުރެހި ނޫސްކަމުގައިވާ ޗާލީ ހެބްޑޯ އިން ވަނީ އުރުދުޣާންގެ ކާޓޫނެއް ކުރަހާ އެމީހުންގެ މަޖައްލާގެ ކަވަރ ފޮޓޯގެ ގޮތުގައި ޖަހާފައެވެ. އުރުދުޣާން އަށް ފުރައްސާރަކުރާ ގޮތަށް ކުރަހާފައިވާ މިކުރެހުމާއި ގުޅިގެން ތުރުކީގެ އޮފިޝަލުން ވަނީ މިކަމާއިމެދު ޤާނޫނީ ގޮތުން އަޅަންޖެހޭ ފިޔަވަޅުތައް އަޅާނެކަމަށް ބުނެފައެވެ.

އަދި މިއީ ނަސްލީ ތަފާތުކުރުންތަކާއި ނަފްރަތު އުފެއްދުމަށް ކުރާ މަސައްކަތަށް އިތުރުވެގެންދިޔަ ބޮޅެއްކަމަށާއި މިކަމުގައި ޤާނޫނީ ގޮތުންވެސް އަދި ޑިޕްލޮމެޓިކް ގޮތުންވެސް ކުރެވެން ހުރި ކަންތައްތައް ކުރާނެ ކަމަށް ތުރުކީގެ އޮފިޝަލުން ވަނީ ބުނެފައެވެ.

މިކުރެހުމާއި ގުޅިގެން އުރުދުޣާން ވިދާޅުވެފައިވަނީ މިއީ ވަރަށްވެސް ދަށު ދަރަޖައިގެ އަމަލެއް ކަމަށެވެ. އަދި ފްރާންސާ ދެކޮޅަށް އެމަނިކުފާނު ވާހަކަފުޅު ދެއްކެވީ ކީރިތި ރަސޫލާ(ޞ) އަށް ފުރައްސާރަކުރުމުން ކަމަށް އުރުދުޣާން ވިދާޅުވިއެވެ.

އަދި މިއަމަލާއެކު ހުޅަނގުން އަނެއްކާވެސް އަނިޔާވެރިކަމާއި އަޅުވެތިކަމުގެ ދުވަސްވަރަށް ހިނގައްޖެކަމަށް އުުރުދުޣާން ވިދާޅުވިއެވެ.

"އެމީހުން ބޭނުންވަނީ އަނެއްކާވެސް ޞަލީބީ ހަނގުރާމަ ފަށަން. އަނިޔާވެރިކަމާއި ރުޅިވެރިކަން މިވަނީ މުސްލިމު އުއްމަތަށް ކުރިމަތިވެފައި. މިއާއެކު އަނެއްކާވެސް ހަމަޖެހުމަށް ބުރުއަރާނެ" އުރުދުޣާން ވިދާޅުވިއެވެ.

ފްރާންސާ ދެކޮޅަށް މުސްލިމު ގައުމުތަކުގައި އަޑުއުފުލަމުން ދާއިރު ފްރާންސުން ވަނީ އެގައުމުގެ ރައްޔިތުން މުސްލިމް ގައުމުތަކަށް ދަތުރުކުރުމުގައި ސަމާލުވުމަށް އިލްތިމާސްކޮށްފައެވެ.