އަދުރޭ ހުތުރު އެއްޗެހި ގޮވީ ފަނޑިޔާރުންނަށް، މައްސަލަ ހުށައެޅީ ޑީޖޭއޭއިން!

އިދިކޮޅު ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ހަޑިހުތުރު އެއްޗެހި ގޮވި މައްސަލައަކީ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުން ފުލުހުންނަށް ހުށައަޅައިގެން ތަހުޤީޤު ކުރި މައްސަލައެއް ކަމަށް ޕްރޮސެކިއުޓަރ ޖެނެރަލް (ޕީޖީ) އޮފީހުން ބުނެފިއެވެ.

އަދުރޭއަށް އުފުލާފައި ވަނީ ސިޔާސީ ދައުވާއެއް ކަމަށް އިދިކޮޅު ފަރާތްތަކުން އަޑު އުފުލަމުންދާ މި ދަނޑިވަޅުގައި އެކަމާ ގުޅޭ ގޮތުން "ރާއްޖެއެމްވީ" އިން ސުވާލުކޮށް ލުމުން ޕީޖީ އޮފީހުގެ މީޑިއާ އޮފިޝަލު ވިދާޅުވީ، އަދުރޭގެ މައްސަލަ ފުލުހުންނަށް ހުށައަޅާފައި ވަނީ ޑީޖޭއޭގެ ފަރާތުން ކަމަށެވެ. އަދި އެއީ ފުލުހުން ތަހުޤީޤު ކުރުމަށް ފަހު ދައުވާ ކުރަން ފޮނުވި މައްސަލައެއް ކަމަށް ޕީޖީ އޮފީހުގެ މީޑިއާ އޮފިޝަލު ވިދާޅުވިއެވެ.

އޭނާ އިތުރަށް ވިދާޅުވީ، އަދުރޭގެ މައްސަލަ ޑީޖޭއޭއިން ފުލުހުންނަށް ފޮނުވާފައި ވަނީ ކުރީގެ ރައީސް އަބްދުﷲ ޔާމީނަށް ޙުކުމް ކުރި ދުވަހު ކްރިިމިނަލް ކޯޓު ސަރަޙައްދުގައި ހުންނަވައި ހަޑިހުތުރު ބަހުން ދެއްކެވި ވާހަކައަކާ ގުޅިގެން ކަމަށެވެ. އެގޮތުން ރައީސް ޔާމީނަށް ޙުކުމް ކުރެއްވުމުން އަދުރޭ ވަނީ ކްރިމިނަލް ކޯޓުގެ 5 ފަނޑިޔާރުންނަށް އަމާޒުކޮށް ހަޑިހުތުރު ބަސް ބޭނުން ކުރައްވައި ވާހަކަ ދައްކަވާފައެވެ.

އެ މައްސަލައާ ގުޅިގެން ޕީޖީ އޮފީހުން ވަނީ ޤާނޫނުލްއުގޫބާތުގެ 615 ވަނަ މާއްދާގެ ދަށުން ހަޑިހުތުރު އެއްޗެހި ކިއުމާއި ހަޑިހުތުރު ބަސް ބޭނުން ކުރުމުގެ ކުށުގެ ދައުވާ އަދުރޭގެ މައްޗަށް އުފުލާފައެވެ.

ޕީޖީ އޮފީހުން އިތުރަށް ބުނީ، އެ އޮފީހުން މައްސަލަތަކުގައި ދައުވާ ކުރަނީ ވަކި މީހަކަށް އަމާޒުކޮށްގެން ނޫން ކަމަށާއި، ޤާނޫނުގެ ވެރިކަން ދެމެހެއްޓުމުގައި ވަކި މީހެއްގެ މޫނަކަށް ނުވަތަ ސިޔާސީ ފިކުރަކަށް ނުބަލާނެ ކަމަށެވެ.

ކުރީގެ ރައީސް ޔާމީނަށް ކުށް ސާބިތުވާ ކަމަށް ނިންމާ ފަސް އަހަރަށް ޖަލަށް ލައި، ފަސް މިލިއަން ރުފިޔާއިން ޖޫރިމަނާކޮށް، ހަ މަސް ދުވަހުގެ ތެރޭގައި ފައިސާ މީރާއަށް ދައްކަން ޖެހޭ ގޮތަށް ހުކުމް އިއްވީ 28 ނޮވެންބަރު 2019 ގައެވެ. އެ ދުވަހު ކްރިމިނަލް ކޯޓު ސަރަޙައްދުގައި އެ މަނިކުފާނުގެ ސަޕޯޓަރުން މުޒަހަރާ ވެސް ކޮށްފައި ވެއެވެ.

އަބްދުއްރަޙީމްއަށް ދައުވާ އުފުލާފައިވާ އިރު، މި ފަހުން ބާއްވާ މުޒާހަރާތަކާއި، ނޫސްވެރިންގެ ބައްދަލުވުންތަކުގައި ބޭއަދަބީ ބަސް ބޭނުން ކުރައްވާ މަންޒަރު ދައްކުވައިދޭ ވީޑިއޯތައް ދޭތެރެ ދޭތެރެއިން މީސްމީޑިއާގައި ދަނީ ދައުރުވަމުންނެވެ. އެގޮތުން 26 ސެޕްޓެމްބަރު 2020 ވީ ހޮނިހިރު ދުވަހުގެ ރޭ އަބްދުއްރަހީމް ވަނީ ލައިވް ޓީވީގައި ރައީސް އިބްރާހިމް މުހައްމަދު ސޯލިހުއަށް ނިސްބަތްކޮށް އައުގުރާނަ ވެސް ގޮވާފައެވެ.