ގައިޑްލައިނާއި އެއްގޮތަށް އޮފީސްތައް ހިންގަމުންދޭތޯ ބެލުމަށް ކުރިއަށްދާ އިންސްޕެކްޝަންގައި 10 އޮފީހެއް އިންސްޕެކްޓްކޮށްފި
ބައެއް އޮފީސްތަކުގައި ގައިިދުުރުކަން ނެތްކަން ފާހަގަވެފައިވާ ކަމަށް ޑރ ނަޒްލާ ވިދާޅުވި
ވެލާނާގެ- ސަރުކާރުގެ ގިނަ އޮފީސްތަކެއް ހިންގަމުން އަންނަ އިމާރާތެއް
ސަރުކާރު އޮފީސްތަކާއި ޕްރައިވެޓް އޮފީސްތަކުގައި މަސައްކަތް ކުރަމުންދަނީ މިހާލަތުގައި އޮފީސްތައް ހިންގުމަށް ހެލްތު ޕްރޮޓެކްޝަން އެޖެންސީ(އެޗްޕީއޭ)އިން އެކުލަވާލާފައިވާ ގައިޑްލައިނާއި އެއްގޮތަށްތޯ ބެލުމަށް ކުރިއަށް ގެންދާ އިންސްޕެކްޝަންގެ ދަށުން ހޯމަ ދުވަހު 10 ތަނެއް ބަލާފައިވާކަމަށް ހެލްތު އެމަރޖެންސީ އޮޕަރޭޝަން ސެންޓަރ(އެޗްއީއޯސީ)ން ބުނެފި އެވެ.
އެސެންޓަރުން ހޯމަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ސެންޓަރުގެ ތަރުޖަމާން ޑރ ނަޒްލާ ރަފީގް ވިދާޅުވީ މިތަންތަން އިންސްޕެކްޓް ކުރުމުގެ މަސައްކަތް އެޗްޕީއޭއާއި ފުލުހުން ގުޅިގެން ކުރަމުން އަންނަ ކަމަށެވެ. އަދި ހޯމަ ދުވަހު ބެލިތަންތަން އާންމު ގޮތެއްގައި ރަނގަޅު ނަމަވެސް ޓީމުން ފާހަގަކުރާ ބައެއް ކަންކަން އެބަހުރި ކަމަށް ޑރ ނަޒްލާ ވިދާޅުވިއެވެ.
އެގޮތުން ބައެއް އޮފީސްތަކުގައި ގައިިދުުރުކަން ނެތްކަން ފާހަގަވެފައިވާ ކަމަށް ޑރ ނަޒްލާ ވިދާޅުވިއެވެ.
ޑރ ނަޒްލާ ވިދާޅުވީ ޚިދުމަތް ހޯދުމަށްދާ ބައެއް އޮފީސްތަކުގައި މާސްކު އެޅުމާއި ގައިދުރުކަން ގެންގުޅުންފަދަ ކަންކަން އަންގައިދޭ ލިޔުންތައް ފެންނަ ގޮތަށް ހަރުކޮށްފައި ނެތްކަން ފާހަގަކުރެވިފައިވާ ކަމަށެވެ. އޮފީސްތައް ހުންނަންޖެހޭ ގޮތުގައި ގައިޑްލައިނެއް އެޗްޕީއޭއިން އާންމުކޮށްފައިވާ ކަމަށާއި އެކަމާއި ގުޅޭގޮތުން ސުވާލެއް އޮތްނަމަވެސް ގުޅައިގެން މައުލޫމާތު ސާފުކުރެއްވުމަށް ޑރ ނަޒްލާ އެދިވަޑައިގެންނެވި އެވެ.
އެޗްޕީއޭގެ ފަރާތުން މީގެކުރީގައި ވަނީ މާލެ ސަރަހައްދުގައި އާންމު ޚިދުމަތްދޭ ތަންތަން ހިނގަމުންދަނީ އެޗްޕީއޭގެ ގައިޑްލައިނާ އެއްގޮތަށްތޯ ބެލުމުގެ ޕްރޮގްރާމެއް ކުރިއަށް ގެންގޮސްފައެވެ. އަދި އަތޮޅުތެރޭގައިވެސް އެޕްރޮގްރާމް ހިންގާފައިވެ އެވެ.
