ކުޅުދުއްފުށި ސިޓީން ކޮވިޑް-19 އަށް ބަޔަކު ޕޮޒިޓިވްވެ އެރަށުގައި ލޯކަލް ޓްރާންސްމިޝަން އޮތުމާއެކު ބަލި އޮތްމިންވަރު ދެނެގަތުމަށް ކުރަމުންދާ މަސައްކަތުގެ ތެރެއިން ދެ ވަނަ ފަހަރަށް ރޭންޑަމް ސާމްޕަލްގެ ގޮތުގައި ނެގި 100 ސާމްޕަލްވެސް ނެގެޓިވްވެފައިވާ ކަމަށް ހެލްތު އިމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބުނެފި އެވެ.
ކުޅުދުއްފުށިން މީގެކުރިންވެސް ވަނީ ރޭންޑަމް ސާމްޕަލް ތަކެއް ނަގާފައެވެ. އެފަހަރު 120 ސާމްޕަލް ނަގާފައިވާއިރު އެސާމްޕަލްތައް ވަނީ ނެގެޓިވްވެފައެވެ.
އެސެންޓަރުން ހޯމަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ އެޓޯލް ޕްރިޕެއާޑްނަސް ޓީމުގެ އަބްދުﷲ މައުރޫފް ވިދާޅުވީ ކުޅުދުއްފުށި މޮނިޓަރިންގ ގެ ހާލަތުގައި އޮތްއިރު އެސިޓީއަކީ ގިނަ ބަޔަކު ސިއްހީ ޚިދުމަތް ހޯދުމަށް ދާ ރަށަކަށްވާއިރު އެރަށަށް ޑޮކްޓަރަށް ދެއްކުމަށްދިއަ މީހުންގެ ތެރެއިން ބަލީގެ އަލާމާތް ހުރި މީހުންގެ ތެރެއިން މިހާތަނަށް 84 މީހެއްގެ ސާމްޕަލެއް ނަގާފައިވާ ކަމަށެވެ. އަދި ފަހުން ނެގި ރޭންޑަމް ސާމްޕަލްތަކުގެ ތެރޭގައި އެކި ގެތަކާއި އާންމުން ގިނައިން އެއްވެއުޅެ ޚިދުމަތް ހޯދާ ތަންތަން ހިމެނޭ ކަމަށް މައުރޫފް ވިދާޅުވިއެވެ.
މިސާމްޕަލްތަކުގެ ތެރޭގައި ކުޅުދުއްފުށި ގޭގެއިން ވަކިވަކިން 15 ގެއަކަށް ގޮސް 15 ފަރަތެއްގެ ސާމްޕަލް ނެގުނު، އަދި ހަމައެހެންމެ ކެފޭ ރެސްޓޯރެންޓް ފިހާރަތަކުންވެސް 25 ސާމްޕަލް، އަދި ކުޅުދުއްފުށި އާންމު ޚިދުމަތްދޭ އެއަރޕޯޓް، ކަސްޓަމްސް ފަދަ ތަންތަނުގެ ތެރެއިން 9 ސާމްޕަލް، ޓެކްސީ ޑްރައިވަރުންގެ 11 މީހެއްގެ ސާމްޕަލް ނަގާފައިވޭ ރޭންޑަމް ސާމްޕަލްގެ ތެރެއިން. އޭގެ ނަތީޖާ ލިބިފައިވަނީ މިހާރު. ހުރިހާ ސާމްޕަލެއްވެސް ނެގެޓިވްއަބްދުﷲ މައުރޫފް
މައުރޫފް ވިދާޅުވީ އިތުރަށް ބަލަންޖެހޭ ކަންކަން ބަލަމުންދާ ކަމަށެވެ. އަދި ކިރިޔާވެސް ބަލީގެ އަލާމާތެއް ހުންނަ މީހަކު ނަމަ އެމީހަކު ޑޮކްޓަރަށް ދެއްކުމަށް މައުރޫފް ވަނީ އިލްތިމާސް ކުރައްވާފައެވެ.
ކުޅުދުއްފުށިން ފުރަތަމަ ކޮވިޑް ކޭސްއެއް ފެނިފައި ވަނީ މިދިޔަ ސެޕްޓެމްބަރު މަހުގެ 28 ވަނަ ދުވަހުއެވެ. އެންމެ ފަހުން ކުޅުދުއްފުށިން ޕޮޒިޓިވް ކޭސްތަކެއް ފެނިފައި ވަނީ މި މަހުގެ 18 ވަނަ ދުވަހުއެވެ. ކުޅުދުއްފުށިން އެންމެ ފަހުން ޕޮޒިޓިވް ވެފައިވަނީ އެރަށުގައި މަސައްކަތްކުރާ ފުލުހެއްގެ އާއިލާގެ ހަތަރު މެންބަރުންނެވެ.
އުތުރު ޕޮލިސް ކްލަސްޓާއާއި ގުޅިގެން މިހާތަނަށް ޖުމްލަ 19 މީހަކު ވަނީ ޕޮޒިޓިވްވެފައެވެ. އެއީ ކުޅުދުއްފުށިން ޕޮޒިޓިވްވި 13 މީހަކާއި ކުރިނބިން ޕޮޒިޓިވްވި މީހަކާއި ފޯކައިދޫން އިން ޕޮޒިޓިވްވި މީހެއްގެ އިތުރުން ދިއްދޫން އިން ޕޮޒިޓިވްވި ހަތަރު މީހުންނެވެ.
