މިލާނުގެ މޮޅުވުމުގެ ރިކޯޑު ނިމުމަކަށް

އަމިއްލަ ދަނޑުގައި ރޯމާއާ އެއްވަރުވެ، މި ސީޒަނުގެ އިޓާލިއަން ލީގުގައި އޭސީ މިލާނުން ހުރިހާ މެޗަކުން މޮޅުވެ ދަމަހައްޓަމުން އައި ރިކޯޑު ނިމުމަކަށް އަތުވެއްޖެއެވެ.

ލީގުގައި ހޯމަ ދުވަހުގެރޭ މިލާނާއި ރޯމާ ބައްދަލުކުރި މެޗު އެއްވަރުވީ 3-3 ގެ ނަތީޖާއަކުންނެވެ. މި މެޗާ ހަމައަށް އައިރު، ޔޫރަޕުގެ ގަދަ ފަސް ލީގުގައި ސައްތައިން ސައްތަ ރިކޯޑާއެކު އޮތް ހަމައެކަނީ ޓީމަކީ މިލާނެވެ.

މިލާނުގެ ދަނޑުގައި ކުޅުނު މެޗު ފަށައިގެން ދެވަނަ މިނެޓުގައި އެ ޓީމުން ވަނީ ލީޑު ނަގާފައެވެ. ރަފައެލް ލެއާއޯ ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ އުމުރުން 39 އަހަރުގެ ޒްލަޓާން އިބްރަހިމޮވިޗެވެ. އެކަމަކު މެޗުގެ 14 ވަނަ މިނެޓުގައި އެޑިން ޒެކޯގެ ލަނޑުން ރޯމާއިން ވަނީ ނަތީޖާ އެއްވަރުކޮށްފައެވެ.

މެޗުގައި މިލާނުން ދެވަނަ ފަހަރަށް ލީޑު ނެގީ ދެވަނަ ހާފު ފަށައިގެން ދެވަނަ މިނެޓުގައެވެ. ލެއާއޯ ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ އެލެކްސިސް ސައެލެމޭކާސްއެވެ. އެކަމަކު މެޗުގެ 71 ވަނަ މިނެޓުގައި ޖޯޑަން ވެރެޓޫޓް ކާމިޔާބުކުރި ޕެނަލްޓީން ރޯމާއިން ވަނީ ދެވަނަ ފަހަރަށް ނަތީޖާ އެއްވަރުކޮށްފައެވެ. މިއީ އޭރިއާ ތެރެއިން ރޯމާގެ ޕެޑްރޯ ރޮޑްރިގޭޒަށް ކުރި ފައުލަކަށް ރެފުރީ ދިން ޕެނަލްޓީއެކެވެ.

މެޗުގެ 79 ވަނަ މިނެޓުގައި އިބްރަހިމޮވިޗް ކާމިޔާބުކުރި ޕެނަލްޓީން މިލާނުން އަލުން ލީޑު ނެގި ނަމަވެސް، މެޗު ނިމެން ހަ މިނެޓަށް ވެފައި ވަނިކޮށް ކޯނަރަކުން މަރަޝް ކުމްބުލާ ވަނީ ލަނޑެއް ޖަހާ މިލާން ހުއްޓުވާފައެވެ.

މި މެޗު އެއްވަރުވި ނަމަވެސް މިލާން އަދިވެސް އޮތީ އިޓާލިއަން ލީގުގެ އެއްވަނައިގައެވެ. އެ ޓީމަށް ކުޅުނު ފަސް މެޗުން ވަނީ 13 ޕޮއިންޓް ލިބިފައެވެ. ދެވަނައިގައި އޮތް ނާޕޮލީ އާއި ތިންވަނައިގައި އޮތް ސަސުއޯލޯއަށް ފަަސް މެޗުން ލިބިފައިވަނީ 11 ޕޮއިންޓެވެ. އަދި މިލާނާ އެއްވަރުކުރި ރޯމާ އޮތީ ތާވަލުގެ ނުވަވަނައިގައި ފަސް މެޗުން އަށް ޕޮއިންޓާއެކުއެވެ.