ޕްރިމިއާ ލީގު: ލިވަޕޫލް އަތްދަށުވެ ސިޓީގެ ރެކޯޑު ނިމުމަކަށް

އިނގިރޭސި ޕްރިމިއާ ލީގުގައި ލިވަޕޫލްއާ ދެކޮޅަށް ކުޅުނު މެޗުން ބަލިވެ މި ސީޒަނުގައި އެއްވެސް މެޗަކުން ބަލިނުވެ މެންޗެސްޓާ ސިޓީއިން ދަމަހައްޓަމުން އައި ރެކޯޑު ނިމުމަކަށް އަތުވެއްޖެއެވެ.

ލިވަޕޫލްގެ ދަނޑު ކަމަށްވާ އެންފީލްޑްގައި ކުޅުނު މެޗުން ސިޓީ ބަލިވީ 4-3 ގެ ނަތީޖާއަކުންނެވެ. މި މެޗުގައި ދެ ޓީމުގެ ފަރާތުން ވެސް ފޯރިގަދަ ބަލާހިތްވާ ޒާތުގެ ކުޅުމެއް ފެނިގެންދިޔައިރު ދެ ޓީމުން ވެސް ވަނީ ލަނޑު ޖެހުމަށް ރަނގަޅު ފުރުސަތުތަކެއް ތަނަވަސްކޮށްފައެވެ. މި މެޗުގައި ލިވަޕޫލްއާ އަލަށް ގުޅުނު ޑިފެންޑަރު ވާޖިލް ވެންޑައިކް ފެނިފައިނުވާއިރު ސިޓީގެ މެދުތެރޭގެ މައި ތަނބު ކަމަށްވާ ޑޭވިޑް ސިލްވާ ވެސް މި މެޗުގައި ފެނިފައެއް ނުވެއެވެ.

ފުރަތަމަ ހާފު ފެށިގެން ލިވަޕޫލްއިން ވަނީ ސިޓީގެ ހާފަށް ބާރުބޮޑުކޮށް އެ ޓީމުގެ ގޯލަށް ނުރައްކާކޮށްފައެވެ. މެޗުގެ ފުރަތަމަ ލަނޑު ނުވަ ވަނަ މިނެޓުގައި ލިވަޕޫލްއަށް ޖަހައިދިނީ އެލެކްސް އޮކްސްލޭޑް ޗެމްބަލިންއެވެ. މި ލަނޑަށް ފަހުވެސް ލިވަޕޫލްއިން ވަނީ ރަނގަޅު ކުޅުމެއް ދައްކައި ސިޓީގެ ގިނަ ހަމަލާތައް ހުއްޓުވާފައެވެ. އެހެން ނަމަވެސް އެ ޓީމުން ރަނގަޅަށް ކުޅެމުން ދަނިކޮށް ލެރޯއި ސާނޭ ވަނީ 40 ވަނަ މިނެޓުގައި ލަނޑެއް ޖަހައިދީ ސިޓީއަށް ނަތީޖާ ހަމަހަމަކޮށްދީފައެވެ.

ދެ ޓީމު އެއްވަރުވެއޮވެ ފުރަތަމަ ހާފު ނިމިގެންދިޔައިރު ލިވަޕޫލްއިން ވަނީ ދެވަނަ ހާފުގައި އެ ޓީމުގެ ކުޅުން އިތުރަށް ވަރުގަދަކޮށްފައެވެ. އެގޮތުން މެޗުގެ 59 ވަނަ މިނެޓުގައި ރޮބާޓޯ ފިރްމީނޯ ލިވަޕޫލްއަށް އަލުން އަނބުރާ ލީޑު ހޯދައިދިންއިރު އޭގެ ދެ މިނެޓު ފަހުން ސަދިއޯ މާނޭ ވަނީ ރީތި ލަނޑެއް ޖަހައިދީ ލިވަޕޫލްގެ ލީޑު ފުޅާކޮށްދީފައެވެ. ތަކުރާރުކޮށް އެ ޓީމުން އުފައްދަމުންދިޔަ ހަމަލާތަކުގެ ނަތީޖާއަކަށް ވެގެންދިޔައީ 68 ވަނަ މިނެޓުގައި މުހައްމަދު ސަލާހު އެ ޓީމަށް ލަނޑެއް ޖަހައިދީ އެ ޓީމު ލީޑު އިތުރަށް ފުޅާކޮށްދިނުމެވެ.

މި ލަނޑުތަކަށްފަހު ސިޓީއިން އެ ޓީމުގެ ކުޅުން އިތުރަށް ރަނގަޅު ކުރުމަށް ކުރި މަސައްކަތުގެ ނަތީޖާއަކަށް ވެގެންދިޔައީ 84 ވަނަ މިނެޓުގައި ބަދަލު ކުޅުންތެރިޔެއްގެ ގޮތުގައި ކުޅެންއެރި ބަނާޑޯ ސިލްވާ ލަނޑެއް ކާމިޔާބުކޮށް ނަތީޖާގެ ފަރަގު ކުޑަކޮށްދިނުމެވެ. ސިޓީގެ ތިންވަނަ ލަނޑު ފުރިހަމަ ވަގުތު ހަމަވެގެން ރެފްރީ ކުޅެން ދެއްކި އިތުރު ވަގުތުގެ ތެރޭގައި އިކޭ ގުންޑޮގަން ޖަހައިދިންއިރު އެ ޓީމަށް ނަތީޖާ ހަމަހަމަ ކުރެވިފައެއް ނުވެއެވެ.

މިއީ މި ސީޒަނުގެ ޕްރިމިއާ ލީގުގައި ސިޓީ ބަލިވި ފުރަތަމަ މެޗުކަން ފާހަގަކޮށްލެވެ.

ޕްރިމިއާ ލީގުގައި އާސެނަލް ވެސް ވަނީ ރަށުން ބޭރުގައި ބޯންމައުތް އަތުން 2-1 ގެ ނަތީޖާއަކުން ބަލިވެ ތާވަލުގެ ހަވަނައަށް ވެއްޓިފައެވެ. ހެކްޓާ ބެލެރިން ލަނޑެއް ޖަހައިދީ އާސެނަލްއަށް ލީޑު ނަގައިދިން ނަމަވެސް ކެލަމް ވިލްސަންއާ ޖޯޑަން އައިބް ވަނީ ކޮންމެ ކުޅުންތެރިޔަކު ލަނޑެއް ޖަހައިދީ ބޯންމައުތް މެޗުން މޮޅުކޮށްދީފައެވެ.

މި މެޗުން ބަލިވި ނަމަވެސް ޕްރިމިއާ ލީގުގެ ޕޮއިންޓް ތާވަލުގެ އެއްވަނައިގައި 62 ޕޮއިންޓާއެކު އޮތީ މެންޗެސްޓާ ސިޓީއެވެ. ދެވަނައިގައި 47 ޕޮއިންޓާއެކު ލަނޑުގެ ތަފާތުން މެންޗެސްޓާ ޔުނައިޓެޑް އޮތްއިރު ތިންވަނައިގައި ހަމަ 47 ޕޮއިންޓާއެކު އޮތީ ލިވަޕޫލްއެވެ. ހަތަރު ވަނައިގައި އޮތް ޗެލްސީއަށް ވެސް ލިބިފައިވަނީ 47 ޕޮއިންޓްއެވެ.