އޭސީ މިލާނުގެ ކުރީގެ މިޑްފީލްޑަރ ސުލޭ މުންތާރީ ޑިޕޯޓިވޯ އަށް ސޮއިކޮށްފި

އިޓަލީގެ އޭސީ މިލާނަށް ކުޅުނު ގާނާގެ މިޑްފީލްޑަރ ސުލޭ މުންތާރީ، ސްޕެއިންގެ ކްލަބް ޑިޕޯޓިވޯ ލަ ކޮރޫނާ އަށް ސޮއިކޯށްފި އެވެ.

ސްޕެނިޝް ލީގުގެ ރެލިގޭޝަން ޒޯނުގައި އޮތް ޑިޕޯޓިވޯ އަށް މުންތާރީ ސޮއިކޮށްފައިވަނީ މިސީޒަނުގެ ނިޔަލަށް ކަމަށް ރިޕޯޓްތައް ބުނެއެވެ.

މީގެ ކުރިން ސަންޑަލެންޑާއި ޕޯޓްސްމައުތަށް ކުޅެފައިވާ މުންތާރީ އެންމެ ފަހުން ކުޅެފައިވަނީ އިޓަލީގެ ކްލަބް ޕެސްކާރާ އަށެވެ. އެހެންނަމަވެސް، ޕެސްކާރާ އާއެކު ހަދާފައިވާ ކޮންޓްރެކްޓްގެ މުއްދަތު މިދިޔަ ހޫނު މޫސުމުގައި ހަމަވި ފަހުން އޭނާ އެއްވެސް ކްލަބަކާއި ގުޅިފައެއްނުވެއެވެ. ޑިޕޯޓިވޯ އާ އޭނާ ގުޅިފައިވަނީ އެކްލަބާއެކު ހެދި ޓްރަޔަލް އަށްފަހު، ޑިޕޯޓިވޯގެ ކޯޗު ކްލަރެންސް ސީޑޯފްގެ ހިތް އަތުލުމަށްފަހު ކަމަށް ރިޕޯޓްތައް ބުނެއެވެ.

މުންތާރީ އަކީ ސީޑޯފް އާއެކު މީގެ ކުރިން އިޓަލީގެ އޭސީ މިލާނަށް ކުޅުނު ކުޅުންތެރިޔެކެވެ. މީގެ އިތުރުން، އޭސީ މިލާނަށް ސީޑޯފް އިރުޝާދު ދިން ދުވަސް ވަރުވެސް މުންތާރީ އެ ކްލަބަށް ކުޅެފައިވެއެވެ.

މުންތާރީ އިޓަލީގައި ކުޅުނު ފުރަތަމަ ކްލަބަކީ އުދިނޭޒީ އެވެ. އޭގެ ފަހުން އޭނާ ވަނީ އޭސީ މިލާނުގެ އިތުރުން އިންޓަރ މިލާނަށްވެސް ކުޅެފައެވެ. އޭނާ އަކީ މިލާނުގެ ވާދަވެރި ދެ ޓީމަށް ކުޅުމުގެ ޝަރަފް ލިބިފައިވާ މަދު ކުޅުންތެރިންގެ ތެރެއިން ކުޅުންތެރިޔެކެވެ.

ގާނާގެ ގައުމީ ޓީމަށް 84 މެޗު ކުޅެފައިވާ މުންތާރީ، 2014 ވަނަ އަހަރުގެ ފަހުން ގާނާގެ ގައުމީ ޓީމަށް ކުޅެފައެއްނުވެއެވެ.