ރ. އުނގޫފާރުން މީހަކު ކޮވިޑް-19 އަށް ޕޮޒިޓިވް ވުމާއި ގުޅިގެން އެރަށް މޮނިޓަރިންގގެ ހާލަތަށް ގެންދެވިފައިވާ ކަމަށް ހެލްތް އިމަޖެންސީ އޮޕަރޭޝަން ސެންޓަރ (އެޗްއީއޯސީ) އިން ބުނެފިއެވެ.

ހޯމަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އެޗްއީއޯސީގެ އަތޮޅުތަކުގެ ކްލަސްޓާއާއި ހަވާލުވެ ހުންނެވި އަބްދުﷲ މައުރޫފް ވިދާޅުވީ އުނގޫފާރުން މީހަކު ޕޮޒިޓިވް ވެފައި ވަނީ ހޯމަ ދުވަހު އެރަށުގައި ނެގި ރެންޑަމް ސާމްޕަލިންގެ ތެރެއިން ކަމަށެވެ. އަދި އެކޭސްއާ ގުޅިގެން ރަށް މޮނިޓަރިންގެ ހާލަތަށް ގެނެވިފައިވާ ކަމަށެވެ.

މައުރޫފް ވިދާޅުވީ ހޯމަ ދުވަހު އެރަށުން 60 މީހެއްގެ ރެންޑަމް ސާމްޕަލް ނެގިފައިވާ ކަމަށެވެ.

އެގޮތުން ސާމްޕަލް ނެގިފައިވަނީ ހޮސްޕިޓަލުގައި ފްރޮންޓްލައިންގައި މަސައްކަތްކުރާ 20 ސްޓާފަކާއި، ކެފޭ ރެސްޓޯރެންޓް އަދި ފިހާރަތަކުން 15 މުވައްޒަފެއް، އަދި އެރަށުގައި ބަލީގައި އަލާމާތް ހުރިކަން ފާހަގަ ކުރެވޭ 20 ފަރާތެއްގެ ކަމަށެވެ.

މީގެ އިތުރުން އެރަށުގައި ދިރިއުޅޭ ބިދޭސީންގެ ތެރެިއން ފަސް ބިދޭސީއެއްގެ ސާމްޕަލް ނެގިފައިވާ ކަމަށް އޭނާ ވިދާޅުވިއެވެ.

މައުރޫފް ވިދާޅުވީ ރަށް މޮނިޓަރިން ލެވިފައި ވުމާއި ގުޅިގެން މިވަގުތުން ފެށިގެން މަގުމަތީގައި ނުވަތަ ބޭރަށް ނުކުންނަ ނަމަ މާސްއަޅަން ޖެހޭނެ ކަމަށާއި އެރަށަށް އަރާފޭބުން ވަނީ މަނާވެފައިވާ ކަމަށެވެ. މީގެ އިތުރުން ސްކޫލްތައް ބަންދުވެ، ގިނަ މީހުން ބައިވެރިވާ ކުޅިވަރުތައް ކުޅުން މަނާވާނެ ކަމަށެވެ.

އާންމު ޚިދުމަތްދޭ ތަންތަނުގައި ތިބޭ ފަރާތްތަކުންވެސް މާސްކުއެޅުމަށް ވަނީ އިލްތިމާސް ކޮށްފައެވެ. އަދި ކެފޭ ރެސްޓޯރެންޓް ތަކުން ޑައިން އިން މެދުކެނޑިގެން ދާނެ ކަމަށާއި ހަމައެކަނި ދެވޭނީ ޓޭކްއަވޭގެ ޚިދުމަތްކަމަށް އޭނާ ވިދާޅުވިއެވެ. އިޖުތިމާއީ ގައިދުރުކަން ބެހެއްޓުމަށް ސަމާލުކަން ދިނުމަށްވެސް ވަނީ އިލްތިމާސްކޮށްފައެވެ.

އުނގޫފާރު ރީޖަނަލް ޖޮސްޕިޓަލަށް ސިއްޚީ ޚިދުމަތް ހޯދަން އެހެންރަށްރަށުން އެރަށަށްދާ ފަރާތްތަކުންވެސް އެޗްޕީއޭގެ ލީގަލް އީމެއިލް މެދުވެރިކޮށް ހުއްދަ ލިބިގެން ނޫނީ ރަށަށް ނޭރޭނެ ކަމަށެވެ.

މީގެ އިތުރުން މާލެ ދަތުރުކުރާ ދޯނި ފަހަރުން ގެންދާ ކާބޯތަކެތި ބޭލުމުގެ އިންތިޒާމް ކައުންސިލާއި މަޝްވަރާކޮށްގެން ހަމަޖައްސަމުންދާ ކަމަށް މައުރޫފް ވިދާޅުވިއެވެ.