ޓެނިސް އެސޯސިއޭޝަން އޮފް މޯލްޑިވްސްގެ އިންތިޚާބުގައި އެ އެސޯސިއޭޝަނުގެ ރައީސްގެ މަގާމަށް އަޙްމަދު ހަފީޒް ކުރިމަތިލައްވައިފިއެވެ.

މަޝްހޫރު ވިޔަފާރިވެރިޔާ ހަފީޒަކީ ފުޅާ ދާއިރާއެއްގައި ރިސޯޓް ވިޔަފާރީ ކުރައްވާ ލިލީ ހޮޓެލްސްގެ މެނޭޖިންގ ޑިރެކްޓަރު (އެމްޑީ) އެވެ.

ޓެނިސް އެސޯސިއޭޝަނުގެ އިންތިޚާބު ނޮވެމްބަރު މަހުގެ ހަތްވަނަ ދުވަހު ބޭއްވުމަށް ތާވަލުކޮށްފައިވާއިރު، މި އިންތިޚާބުގައި ރައީސްގެ މަގާމަށް ކުރިމަތިލެއްވީ ހަފީޒް އެކަންޏެވެ. އެކަމަކު އެ އެސޯއިއޭޝަނު ނައިބު ރައީސްގެ މަގާމަށް މުޙައްމަދު އަމީން އާއި މުޙައްމަދު ހާނިމް ވަނީ ކުރިމަތިލައްވާފައެވެ. އަމީނަކީ މިހާރުވެސް ޓެނިސް އެސޯސިއޭޝަނުގެ ނައިބު ރައީސެވެ.

އިތުރު މެންބަރުންގެ ގޮތުގައި އިންތިޚާބުކުރާ ތިން މަގާމަށް ހަތަރު ބޭފުޅުން ވަނީ ކުރިމަތިލާފައެވެ. އޭގެ ތެރޭގައި ހިމެނެނީ މިހާރުގެ ހިންގާ ކޮމިޓީގައިވެސް ހިމެނިވަޑައިގަންނަވާ ހަސަން ޝާމުގެ އިތުރުން އަލަށް ކުރިމަތިލެއްވި އަޒުމާ އިބްރާހިމާއި ޔޫސުފް ރިޒާ އަދި މޫސާ އާޒިމެވެ.

ނޮވެމްބަރު މަހުގެ ހަތްވަނަ ދުވަހު ބާއްވަން ނިންމާފައިވާ އިންތިޚާބުގައި ވޯޓުން އިންތިޚާބު ކުރުމަށް ނިންމާފައި ވަނީ ފަސް މަގާމެކެވެ. އެއީ ރައީސް އާއި ނައިބު ރައީސް އަދި އިތުރު ތިން މެންބަރުންނެވެ. ހަޒާންދާރުގެ މަގާމާއި ޖެނަރަލް ސެކްރެޓަރީއެއް އައްޔަނު ކުރާނީ އިންތިޚާބުވާ ހިންގާ ކޮމިޓީން ކަމަށް ޓެނިސް އެސޯސިއޭޝަނުން މައުލޫމާތުދެއެވެ.

ޓެނިސް އެސޯސިއޭޝަންގެ އިންތިޚާބުގެ ގަވާއިދުގައިވާ ގޮތުގެ މަތިން ވޯޓުލުމުގެ ހައްގު ލިބިގެންވަނީ އެ އެސޯސިއޭޝަނުގެ އާންމު މެންބަރުންގެ ތެރެއިން އިންތިޚާބަށް ކުރިމަތިލުމުގެ ފުރުސަތު ހުވާލެވުނު ދުވަހުގެ ނިޔަލަށް މެންބަރުންގެ ގޮތުގައި ރަޖިސްޓްރީގައި ހިމެނިފައިވާ މެންބަރުންނަށެވެ. އެ ގޮތުން މި ވަގުތު ޓެނިސް އެސޯސިއޭޝަނުގެ މެންބަރުންގެ ގޮތުގައި ތިބީ 215 މެންބަރުން ކަމަށް އެ އެސޯސިއޭޝަނުން ބުނެއެވެ.

ޓެނިސް އެސޯސިއޭޝަނުގެ މިހާރުގެ ހިންގާ ކޮމިޓީގެ ދެވަނަ ދައުރު ފުރިހަމަކޮށްފައިވާއިރު، މިހާރުގެ ހިންގާ ކޮމިޓީގެ ދައުރު މި އަހަރުގެ ޖުލައި 17 ވަނަ ދުވަހު ވަނީ ހަމަވެފައެވެ. އެހެން ނަމަވެސް ކޮވިޑް-19 ގެ ހާލަތާ ގުޅިގެން އައު ހިންގާ ކޮމޓީއެއް އިންތިޚާބުވެ، ސްޕޯޓްސް ކޮމިޝަނުން ބަލައިގަންނަންދެން މިހާރުގެ ހިންގާ ކޮމިޓީގެ ދައުރު ސްޕޯޓްސް ކޮމިޝަނުން ވަނީ ދަމަހައްޓާދީފައެވެ.

ޓެނިސް އެސޯސިއޭޝަނުގެ މިހާރުގެ ރައީސް އަކީ އަޙްމަދު ނަޒީރެވެ. މަޝްހޫރު ވިޔަފާރިވެރިޔާ ނަޒީރު ވަނީ ދެ ދައުރު ޓެނިސް އެސޯސިއޭޝަންގެ ރައީސްގެ މަގާމު އަދާކޮށް ޓެނިހުގެ ވަސީލަތް އެންމެ ޒަމާނީ ފެންވަރަށް ތަރައްގީ ކުރުމަށް ބޮޑު ހޭދައެއް ކުރައްވާފައެވެ. އެސޯސިއޭޝަނުގެ މިހާރުގެ ނައިބު ރައީސަކަށް މުޙައްމަދު އަމީން ހުންނެވިއިރު، ހަޒާންދާރަކީ މަޙްމޫދު ރަމީޒެވެ. އިތުރު ތިން މެންބަރުންނަކީ ހަސަން ޝާމް އާއި، އަޙްމަދު ޝާމް އަދި އިބްރާހީމް ހުސައިނެވެ.

ރާއްޖޭގައި ޓެނިސް ކުޅޭތާ ގިނަ އަހަރުތަކެއް ވެފައިވާއިރު، ގައުމީ ކުޅިވަރު އެސޯސިއޭޝަންތަކުގެ ތެރެއިން އެންމެ ރަނގަޅު ކުޅިވަރު ވަސީލަތް ގާއިމުވެފައިވާ ކުޅިވަރަކީ ޓެނިހެވެ. ކޮންމެ އަހަރަކުވެސް ޓެނިހުން ގިނަ މުބާރާތްތަކެއް ބާއްވަމުންދިޔަ ނަމަވެސް، ޓެނިސް ކުޅޭ ކުޅުންތެރިންގެ އަދަދު އިތުރުވަމުންދަނީ ވަރަށް މަދުންނެވެ. އަދި ބައިނަލްއަގުވާމީ މައިދާނުގައި ޓެނިހުން ރާއްޖެއަށް އެކަށީގެންވާ ކާމިޔާބީއެއް ހޯދިފައިނުވާއިރު ޓެނިހަކީ ނިސްބަތުން މަދު އެތްލީޓުން ހިމެނޭ ކުޅިވަރެކެވެ.