އިފްލާސްވުމާއި އިފްލާސްކުރުމުގެ ބިލް ހުށައަޅާ ބަހުސް ފަށައިފި
26 އޮކްޓޯބަރު 2020 | ހޯމަ 06:59މިއީ ދަރަނިވެރިޔާގެ ދަރަނި ނުދެއްކިގެން އެފަދަ ފަރާތެއް އިފްލާސްވުމާއި އިފްސާކުރުމުގެ ކަންކަން ބަޔާންކޮށްފައިވާ ބިލެއް
ރާއްޔިތުންގެ މަޖިލިސް
އިފްލާސްވުމާއި އިފްލާސްކުރުމުގެ ބިލު ހުށައަޅާ، ބިލުގެ އިބްތިދާއީ ބަހުސް ފަށައިފިއެވެ.
ހޯމަ ދުވަހުގެ ޖަލްސާގައި މި ބިލު ސަރުކާރުގެ ފަރާތުން ހުށައަޅުއްވައި ދެއްވީ ފުވައްމުލަކު އުތުރު ދާއިރާގެ މެމްބަރު މުހައްމަދު ރަޝީދެވެ. ބިލުގެ ފުރަތަމަ ކިއުން އިއްވާފައި ވަނީ މި މަހުގެ 14 ވަނަ ދުވަހު ބޭއްވި ޖަލްސާގައެވެ.
ބިލު ހުށައަޅުއްވަމުން މެމްބަރު ވިދާޅުވީ މި ބިލަކީ ދަރަނިވެރިޔާގެ ދަރަނި ނުދެއްކިގެން އެފަދަ ފަރާތެއް އިފްލާސްވުމާއި އިފްލާސްކުރުމުގެ ކަންކަން ބަޔާންކޮށްފައިވާ ބިލެއް ކަމަށެވެ. އަދި އޭނާ ވަނީ މި ބިލު ހުށައެޅުމުގެ މަގްސަދުތައް މަޖިލީހާއި ހިއްސާ ކުރައްވާފައެވެ.
މީގެ އިތުރުން މެމްބަރު ވިދާޅުވީ ގާނޫނު އަސާސީގެ 55 ވަނަ މާއްދާގެ ދަށުން މަދަނީ އެއްބަސްވުމެއްގެ ދަށުން އަދާ ކުރަންޖެހޭ ޒިންމާއެއް އަދާ ނުކުރެވުމުން ނަމަވެސް އެފަދަ މީހެއް ހައްޔަރުކޮށް، ބަންދު ކޮށްގެން ނުވާނެ ކަމަސް ބަޔާން ވެގެންވީ ނަމަވެސް ކަނޑައެޅިގެން އަސާސީ ހައްގާއި ހިލާފަށް ކޯޓުތަކުން އަމަލު ކުރަމުންދާ ކަމަށެވެ. އަދި ހަރުދަނާ އިފްލާސްކުރުމުގެ ނިޒާމެއް ތައާރަފް ވުމުން ކުރިއަރާފައިވާ އެހެން ގައުމުތަކެކޭ ވެސް އެއްފަދައިން އަރަނިވެރިޔާ އިފްލާސްވުމުގެ މަރުހަލާތައް ކަނޑައްތުކޮށް ނިމުމުން އަނެއްކާ ވެސް ވިޔަފާރިކުރުމުގެ ފުރުސަތު ލިބިދޭނެ ކަމަށް ވެސް އޭނާ ވިދާޅުވިއެވެ.
