މޯލްޑިވިއަންގެ އެހީއާ އެކު އިންޑިއާގައި ސީޕްލޭންގެ ޚިދުމަތް ފަށަނީ!
މިމަހުގެ 31 ގައި ޚިދުމަތް ފަށާނެ
އިންޑިއާގައި ސީޕްލޭންގެ ޚިދުމަތް ދިނުމަށް، މޯލްޑިވިއަންގެ ކްރޫއިން ފުރުމަށް ތައްޔާރުވަނީ
ގައުމީ އެއަރލައިން މޯލްޑިވިއަންގެ އެހީތެރިކަމާ އެކު އިންޑިއާގައި ސީޕްލޭން ޚިދުމަތް ފެށުމަށް ތައްޔާރުވެއްޖެއެވެ.
ސީޕްލޭން ޚިދުމަތް ފެށުމުގެ ގޮތުން މޯލްޑިވިއަންގެ ސީޕްލޭނެއް ޗާޓަރު ކޮށްގެން އިންޑިއާ ގޮސްފައިވާ އިރު، މި މަހުގެ 31 ވަނަ ދުވަހު މި ޚިދުމަތް ފެށުމަށް ވަނީ ނިންމާފައެވެ. އިންޑިއާގެ ސީޕްލޭން ޚިދުމަތް ފައްޓަވައި ދެއްވާނީ އިންޑިއާގެ ބޮޑުވަޒީރު ނަރެންދުރަ މޯދީއެވެ.
މި ޕްރޮޖެކްޓާ ގުޅޭ ގޮތުން ރާއްޖޭގައި ހުންނަ އިންޑިއާގެ ހައި ކޮމިޝަނުން ކުރި ޓްވީޓެއްގައި ބުނީ އިންޑިއާގެ ފުރަތަމަ ސީޕްލޭންގެ ދަތުރު މި މަހުގެ 31 ގައި ފަށާއިރު، މޯލްޑިވިއަންގެ ޕައިލެޓުންނާއި ކްރޫންގެ އެހީ ހޯދާ ކަމަށެވެ.
މީގެ އިތުރުން ރާއްޖެއަކީ މި ދާއިރާގައި އެންމެ ކާމިޔާބު އެއް ގައުމު ކަމަށް ސިފަކޮށް މޯލްޑިވިއަންގެ ފަރާތުން ލިބެމުންދާ އެހީތެރިކަން އިންޑިއާގެ ހައި ކޮމިޝަނުން ވަނީ ފާހަގަ ކޮށްފައެވެ.
އިންޑިއާގައި ސީޕްލޭންގެ ޚިދުމަތް ދޭނީ އެ ގައުމުގެ ސްޕައިސް ޖެޓް އެއާލައިނުންނެވެ. އަދި ސީޕްލޭން ދަތުރުތަކުގެ އަގު އުޅެނީ ބޮލަކަށް 4800 އިންޑިއާ ރުޕީސްގައެވެ. އިންޑިއާގެ އަޙްމަދުއާބާދުން ގުޖުރާތުގައި އޮންނަ އަވަށެއް ކަމަށްވާ ކެވަޑިއާއަށް ދަތުރުތައް ކުރުމަށް ނިންމާފައިވާ އިރު، ދުވާލަކު 8 ދަތުރު ބާއްވާނެއެވެ. ކޮންމެ ދަތުރެއްގައި 14 ފަސިންޖަރުންނަށް ޖާގަ ލިބޭނެއެވެ.
